Page Text
________________
दत्त - मूलदेवकहाण
परिभावियं च जइ एरिसाणि नरवइघरेसु वि इमाणि । चरियाई विविहरक्खाविहाणरक्खिज्जमाणाण ।। ९४५ ।। तो अन्न संतिसुं भवणेसुं चोज्जमइमहंतमिणं । बाहिंगयाओ पुणरवि, जमिति सट्ठाणमबलाओ || ९४६ || होउ इमं तह वि अहं, अन्नत्थ वि कोउयं पलोएमि । एयाणमिह विचिंतिय, समुट्ठिओ ताओ ठाणाओ || ९४७ नियगेहमइगओ रयणिसेसमइवाहिउं पहायम्मि । कयपाहाइयकिच्चो, नीहरिओ निययगेहाओ ।। ९४८ ॥ पासइ परिब्भमंतो, एगं अवधूयवेसरूवेण । भिक्खाए परियडतं, वट्टंतमुदारतारुणे ।। ९४९ ।। लायन्नगुणनिवासं, कुलभवणं मंततंतसिद्धीण । खरहरयमहव्वइयं, वियडजडामउडकयसोहं ।। ९५० ॥ वयपभवेण जसेण व, उद्भूलणभूइरेणुणा धवलं । मुहकमलमडुयरेहिं व, नवमुहरोमेहिं राहिल्लं ।। ९५१ ।। नियकित्ती इव कुमुदुज्जलाए कलियं तु मुंडमालाए । ऊरुजुओवरि आबद्धघंटियाराव भरियदिसं ॥ ९५२ ॥ चरणनिवेसियनेउररवेण धम्मियजणं व सद्दितं । वामक्खंधारोवियखट्टंगविरायमाणं च ।। ९५३ ।। दट्ठूण मूलदेवो, तस्सणुरागेण जाइ अणुलग्गो । सो उण जणम्मि इंदियअलोलुयत्तेण अक्खलिओ ।। ९५४ ।। गेहाई पंच अडिउं, जहोवलद्धं गहाय भिक्खं च । गंतूण सिवतलायं, हरसिद्धी देवया पुरओ ।। ९५५ ।। तिगुणं तं पक्खालिय, जल-थल - नहयरजियाण दाउं च । एक्केक्कं तब्भागं, उव्वरियं भक्खर सयं च ॥ ९५६ तो आयमणं काउं, कयसंज्झोवासणो य संझाए । अत्थायलसिहरगए, रविम्मि खीणम्मि दिणसेसे || ९५७ ॥ तमनिवहबहलिएसु य, पहसानीसेसदिसविभागेसु । दिठि विणिक्खिवंतो, इओ तओ भमिउमाढत्तो ॥ ९५८ ॥ तद्दिट्ठिवायमसरिसमवलोईऊण मूलदेवो वि । दूरट्ठिओ पच्छन्नं, अलक्खिओ तमणुगच्छेइ ।। ९५९ ।। तो अब्भत्थियसूरस्स गणवइस्सत्थि पुव्वदिसभाए । गिहमेगं कुंभारस्स अन्नगेहाण दूर गयं ॥ ९६० ।। सो तत्थ पविसिऊणं इओ तओ जोइऊण पासाइं । पुव्वं संकेइयकुंभयारओ गहिय सुरभरियं ।। ९६१ ।। कायमयकूवयदुगं, थालीपट्टाइ तह य बहुमंसं । खट्टंगं मोत्तूणं, कंथापावरियसयलतणू ।। ९६२ ।। नीहरिऊणं तत्तो, ठाणाओ समागओ नियमढम्मि । जत्थेगागी निच्चं, निवसइ सो निययइच्छाए || ९६३ ।। तप्पायारंतो सव्वओ वि अवलोइउं मढपओलिं । ढक्केऊण पविट्ठो, मढस्स वरपट्टसालाए ।। ९६४ ।। लिहिऊण तत्थ मंडलमासणबंधं थिरं च काऊण । निच्चलसमाहिलग्गो, खणमेक्कं अच्छिऊण तहिं ।। ९६५ ।। अंगुट्ठमेत्तमेक्कं रमणि नीहारिऊण हिययाओ । कुणइ कमंडलुसलिलेण सिंचिउं जोव्वणारूढं ।। ९६६ ।। अवि य
पुलिंदुमंडलेण व, निज्जिय अंबुरुहसोहपसरेण । वयणेण विरायंति, देवाण वि विहियचोज्जेण ॥ ९६७ ॥ उल्लसिरवयणससिकंतिवियसिए कुवलएं इव धरतिं । लच्छीए वासभवणे, नयणे तरुणयणमणहरणे ।। ९६८ ।। नासावंसं रुइरं, जोव्वणतरुपल्लवं व तह अहरं । वहमाणि तह रेहाहिं कंबुतुल्लं व वरकंठं ।। ९६९ ।। अंगुलिदलाण करपंकयाण निम्फत्तिविसलयाहिं व । अइकोमलाहिं उब्भासमाणियं बाहुलइयाहिं ॥ ९७० ॥ मरगयमणिमालालंकिएहिं रक्खाहिं वेढिएहिं च । मयरद्धयनिहिकुंभेहिं तुंगसिहणेहिं पासंति ।। ९७१ ।।
Jain Education International
३७
For Private & Personal Use Only
www.jainelibrary.org
| SR No. | 001587 |
| Book Title | Chandappahasami Chariyam |
| Original Sutra Author | Jasadevsuri |
| Author | Rupendrakumar Pagariya, Jitendra B Shah |
| Publisher | L D Indology Ahmedabad |
| Publication Year | 1999 |
| Total Pages | 246 |
| Language | Prakrit |
| Classification | Book_Devnagari, Story, & Biography |
| File Size | 17 MB |