Page Text
________________
३४
सिरिचंदप्पहजिणचरियं
एमाइ बहुवियप्पं, जा वुत्तो राइणा कहकहं पि । ता पडिवज्जिय वयणं, रन्नो पडिभणइ एवं सो ।। ८६२ ।। देव ! जइ मज्झ उवरिं, करुणा सयमेव ता गवेसेउं । परिणावउ मं कन्नं, देवो जच्चंधयं किं पि ।। ८६३ ॥ अन्निसिऊणं कस्स वि, कन्नं जच्चंधयं तओ रन्ना । परिणाविओ सजुत्तं, रूवाइगुणेहिं सेसेहिं ॥ ८६४ ।। तीए समं कमेणं, पोढा वारूढजोव्वणभराए । लोयणवज्जं नीसेससुंदरावयवसोहाए ॥ ८६५ ।। भुंजतो रइसोक्खं, मन्नंतो सारदारववहारं । वोलेइ कं पि कालं, कयसम्माणो नरिंदेण ।। ८६६ ॥ (जुयलं) पइदियहं च जया जाइ राइसेवाइकज्जओ बाहिं । उड्ड काऊण तयं, तया पलोएइ तीए तणुं ॥ ८६७ ॥ नीसेसावयवेहिं वि, अजायपरपुरिससंगदोसेहिं । तह इंगियआयाराइएहिं अविगाररूवेहिं ।। ८६८ ॥ गिहमागओ वि एसो, पुणो वि सव्वं पि पासई तीए । उड्ढं धरिऊण तहेव जंति दियहाइ से एवं ॥ ८६९ ।। अह अन्नया कयाइ वि, पोढत्तमुवागए निदाहम्मि । पवणसुहमभिलसंती, नियभवणस्सुवरिमं भूमिं ॥ ८७० ॥ माइगिहसंतियाए चेडीए चवलियाभिहाणाए । सहिया आरुहिऊणं, जा चिट्ठइ तत्थ जच्चंधा ॥ ८७१ ।। तो तेण पएसेणं, रायउलं पट्ठियस्स सेट्ठिस्स । कयरमणीमणमोहणउब्भडसिंगारवेसस्स ॥ ८७२ ।। दत्तस्स रूवजोव्वणलच्छीए वन्नणं करेमाणी । सुणिऊण चवलियं सा, भणइ तहिं जायअणुराया ॥ ८७३ ।। को एस हला तुमए, वन्निज्जइ केरिसो य मे कहसु । तीए भणियं सामिणि ! एसो खलु सव्ववणियाणं ।। ८७४ उज्जेणिनयरिवत्थव्वगाण सामी इहच्चनरवइणो । पवरपसायट्ठाणं, दत्तो नामेण वरसेट्ठी ॥ ८७५ ।। रूवेण कामदेवो, देवकमारो व्व जोव्वणगणेणं । ईसरिएणं धणउ व्व विमललायण्णजलजलही ।। ८७६ ।। एवं सोऊण इमा, जच्चंधा तम्मि गाढमणुरत्ता । जंपइ एवं चवलो, जणणीगिहसंतिया तं मे ॥ ८७७ ॥ ता तुह न गोवणिज्जं, किंचि वि एत्तो भणामि तुह पुरओ । जइ मह रहस्सभेयं, न कुणसि तं चवलभावेण ॥ ८७८ तो चवलियाए भन्नइ, सामिणि ! किं एवमाइससि मज्झं । तुह जीविएण जीवामि तेण निस्संकमाइससु ॥ ८७९ जच्चंधा भणइ तओ, जइ एवं सुणसु अवहिया होउं । जइया ते मह पुरओ, सलाहिओ वाणिओ दत्तो ।। ८८० तइय च्चिय अणुराएण मज्झ हियए पयं निवेसेउं । ठियमयलबुद्धिणा ता, तह कुण जह होइ तस्संगो ॥ ८८१ अन्नह पुण पच्चासं, पियसहि ! मह मुंच जीवियव्वे वि । मयणसरविहुरदेहाण अहव भण कित्तियं एयं ॥ ८८२ इय भणिऊण तयं पट्ठवेइ मुत्तावलीण वरजुयलं । बहुमोल्लाणि य वत्थाणि अप्पिउं तस्स पासम्मि ॥ ८८३ अह सा वि तस्स भवणं, गंतूणं अत्तणो परिचियस्स । कस्सइ नरस्स दारेण गेहमज्झम्मि पविसित्ता ॥ ८८४ ॥ विन्नवइ दत्तसेटिंठ पुरिसोत्तम ! देसु मज्झ खणमेक्कं । एगंतं जेणाहं, किं पि रहस्सं तुह कहेमि ।। ८८५ ।। (विसेसयं) तो तेण तीए दिन्नो, एगंतो सा वि जंपइ पहट्ठा । सुपुरिस ! सुण विन्नत्तिं, एक्कं काऊण सुपसायं ॥ ८८६ अम्हाण सामिणीए, जइ य च्चिय राउलम्मि वच्चंतो । नरवइपहेण निसुओ, वन्निज्जतो तुमम्हेहिं ॥ ८८७ ॥ नियभवणोवरिभूमिगयाइ तप्पभिइ चेव सा जाया । मयणसरपहरविहुरा, न लहइ सोक्खं कहिं पि ठिया । ८८८ ता काऊण पसायं, अइगरुयं तत्थ गमणकरणेण । सुंदर ! अणुग्गहिज्जउ, सा तुमए साणुकंपेण ॥ ८८९ ॥
Jain Education International
For Private & Personal Use Only
www.jainelibrary.org
| SR No. | 001587 |
| Book Title | Chandappahasami Chariyam |
| Original Sutra Author | Jasadevsuri |
| Author | Rupendrakumar Pagariya, Jitendra B Shah |
| Publisher | L D Indology Ahmedabad |
| Publication Year | 1999 |
| Total Pages | 246 |
| Language | Prakrit |
| Classification | Book_Devnagari, Story, & Biography |
| File Size | 17 MB |