Page Text
________________
दत्त-मूलदेवकहाणयं सो य भरहम्मि वासे, पढमो राया जिणेसरो पढमो । ओसप्पिणीए जाओ, तइए अरए बहुगयम्मि ॥ ८३६ ॥ तस्स य दो भज्जाओ, नामेण सुमंगला सुनंदा य । भरहो बंभी जुयलं, सुमंगलाए तहिं जायं ॥ ८३७ ।। अउणापन्नं जुयले, पुत्ताण सुमंगला पुणो जणइ । देवी पुणो सुनंदा, बाहुबली सुंदरी जुयलं ॥ ८३८ ॥ कालंतरे भयवया, लोयन्तियदेवबोहिएण तहिं । संवच्छरियं दाणं, दाउं अब्भुज्झएण लहुं ।। ८३९ ॥ सव्वेसि जेट्ठपुत्तो, भरहो रज्जम्मि ठाविओ बीओ । बाहुबली तक्खसिलाए नायगो सो य संठविओ ॥ ८४० अन्नेसिं कुरुमाईण भूमिखंडाई जाई दिन्नाई । ताणं चिय नामेहि, ते विक्खाया तओ देसा ।। ८४१ ॥ जो सुय अवंतिसेणो, पुत्तो दिन्नो य तस्स जो देसो । सोऽवंतीनामेणं, सुपसिद्धो अत्थि भरहम्मि ॥ ८४२ ।। उज्जेणी तत्थ पुरी, धणकणयसमिद्धलोयपरिकलिया । अमरावइ व्व रम्मा, विबुहमणाणंदसंजणणी ॥ ८४३ ॥ तीए अच्चब्भुयचारुचरियसंपत्तिपत्तवरकित्ती । नियभुयविक्कमअक्कंतसत्तुसामंतसंघाओ ।। ८४४ ॥ राया विक्कमसूरो, तस्स य कुसलो कलासु सव्वासु । नामेण मूलदेवो, मित्तं पत्तं सिणेहस्स ।। ८४५ ॥ सो य अहिगयसमपासंडनीइसत्थो वियड्ढवग्गं पि । वंचंतो चउरे वि हु, पयारयंतो बहुपयारं ॥ ८४६ ।। दमयंतो दक्खे वि हु, धुत्तंतो धुत्तजूययारे वि । परिपिंडइ अइबहुयं, अनन्नसममत्तणो लच्छि ॥ ८४७ ॥ महिलाणं चरिएसुं, अवीससंतो उ मूलओ चेव । निच्छइ विवाहमेसो, कयाइ पुट्ठो तओ रन्ना ।। ८४८ ॥ कीस तुमं नो परिणेसि सो वि पडिभणइ नत्थि मे देव ! । महिलाहिं किं पि कज्ज, जहिच्छियं संचरंतस्स ।। ८४९ एयाणं वसवत्ती, जो किर न हु तस्स नियय इच्छाए । संकमणमासणं भोयणं च अन्नं च जं किंचि ।। ८५० ॥ जं देव ! दुराराहाओ एत्थ दुट्ठासयाओ नारीओ । चवलसहावा खणरागिणीओ नीयाणुगाओ य ॥ ८५१ ॥ परपुरिसमणुसरंतीण को व एयाण रक्खणं काउं । सक्कइ सुबुद्धिमंतो वि सव्व सामत्थकलिओ वि ॥ ८५२ ॥ सुइसत्थेसु वि सुव्वइ, किल अद्धमिमाओ नरसरीरस्स । एया णु दुट्ठयाए, पुरिसस्स वएइ दुट्ठत्तं ।। ८५३ ।। जओ - जइ वि न करेइ पावं, अइधम्मपरो य चिट्ठइ सया वि । तह वि हु कलत्तपावे ण लिप्पई चिंतिई रिसिणो ॥ ८५४ ता अहयमदारपरिग्गहो वि नरनाह ! एय मह जम्मं । एमेव क्खवइस्सं, वढ्तो निययइच्छाए । ८५५ ॥ तो भणइ नरवरिंदो, मा मा भण मूलदेव ! एवं ति । जम्हा तिवग्गसिद्धी, आयत्ता एत्थ रमणीए || ८५६ ॥ सोक्खस्स य आययणं, कित्तीए कारणं च पवराए । तह वंससंतईए, एयाओ मूलभूयाओ ।। ८५७ ॥ किंच गिहत्थत्तमिमं, सयलासमबीयभूयमुवइठं । एयाओ विणा एवं, न होइ गिहिणी गिहं जम्हा ।। ८५८ ।। पुत्तविहीणो पुरिसो, पियराण रिणाओ मुच्चए नेय । पुन्नामाओ नरगाओ तायए तह य किर पुत्तो ॥ ८५९ ॥ तावस्सं कायव्वो, पुरिसेणं दारसंगहो एत्थ । न य अइसंकावंतेण कह वि लोयम्मि होयव्वं ॥ ८६० ॥ जओ - आसंकिज्जिहि मोहा उ वाहगं जो अजायमवि नियमा । सो सव्वव्ववहारेसु संसयप्पा खयं जाइ || ८६१ ।।
Jain Education International
For Private & Personal Use Only
www.jainelibrary.org
| SR No. | 001587 |
| Book Title | Chandappahasami Chariyam |
| Original Sutra Author | Jasadevsuri |
| Author | Rupendrakumar Pagariya, Jitendra B Shah |
| Publisher | L D Indology Ahmedabad |
| Publication Year | 1999 |
| Total Pages | 246 |
| Language | Prakrit |
| Classification | Book_Devnagari, Story, & Biography |
| File Size | 17 MB |