Page Text
________________
सिरिसेणकहा
१३
पहरिसमउव्वरइ निम्मिओ व्व सविलाससोक्खमइओ व्व । सो मासो तस्स नराहिवस्स लीलाइ वोलीणो ।। ३०५ ।। (जुयलं) देवगुरुगरुयसम्माणपुव्वयं तयणुलोयपच्चक्खं । सिरिधम्मो त्ति नरिंदो, नाम से कुणइ सुहदिवसे ।। ३०६ ॥ लालिज्जतो पंचहिं धाईहिं विविहलालणाहिं सो । वड्ढंतो य कमेणं, संजाओ अट्ठ वारिसिओ ॥ ३०७ ।। जो य - मित्तोदयपत्तपिहुप्पहावअक्खंडसयलकलनिलओ । वंकत्तमंतरेण वि, पावियसंपुण्णसुहदेहो ॥ ३०८ ॥ निच्चमुदिओदओ नो तमेण कइया वि खंडियपभावो । दूरं कलंकमुक्को, रेहइ अप्पुव्वचंदो व्व ॥ ३०९ ॥ (जुयलं) कय चूलोवणयाई, सुहगुरुसंसग्गिसंगहियविज्जो । सो सव्वविण्णुगुणिगव्वखव्वयं कुणइ अन्नेसिं || ३१० ॥ समईयबालभावो, सो थेवदिणेहिं जोव्वणं पत्तो । सोहइ महिं व दटुं, सग्गोइन्नो सुरकुमारो ।। ३११ ॥ परिणाविओ य पिउणा, पभावई नाम रायवरकन्न । तरगुणपेरियमणसा, अहिसित्तो जोवरज्जे य ॥ ३१२ ।। कालंतरेण तस्स वि, पभावई गब्भसंभवो पुत्तो । सिरिकतो नामेणं, जाओ नीसेसगुणजुत्तो ॥ ३१३ ॥ सिरिकता कंतकवोलभत्तिसविचित्तपत्तवल्लीण । लिहणे अक्खित्तमणो, सयं च कालं गमइ राया ।। ३१४ ।।
अन्नदिणे नियगिहवरगवक्खमज्झे सुहासणासीणो । पेच्छइ सघरे कंतं, पसाययंतं वणिजुवाणं ॥ ३१५ ॥ नाणाविहचाडुसएहिं तह य वयणेहिं नेहसारेहिं । पायप्पणामकरजोडणाइचिट्ठाविसेसेहिं ।। ३१६ ॥ एवं पि जा न तूसइ, सा सुमुही ताव एस अप्पाणं । अह निंदिउं पयट्टो, विलक्खओ गरुयसद्देण ।। ३१७ ॥ हा हा !! हय म्ह इह अंगणाए कज्जेण मुक्कअहिमाणो । दीणत्तं अवलंबिय, परिहरिय विसिट्ठइट्ठपहं ।। ३१८ परिचइडं धीरत्तं, सुहब्भमाओ वयामु दुक्खपहं । किच्चाकिच्चविभायं, अमुणंता गहगहीय व्व ॥ ३१९ ।। ता धी धी मं धी धी, इमं च धी धी मई तह ममेयं । जो सप्पिओ हमेवं, सुनिप्पिहाए वि एयाए ॥ ३२० ।। तह एयाए च्चिय चाडुकम्मकरणम्मि जीए विनिउत्तो । ताए मईए कज्जं न मज्झ नो महिलियाए वा ॥ ३२१ ॥ किंच - भोगेहिंतो सोक्खं, भवम्मि इत्थीण ते य आयत्ता । ताओ य जइ नराणं, न व से कत्तोच्चयं सोक्खं ॥ ३२२ ॥ ता मूढ च्चिय अम्हे, संसारे जे करेमु सुहबुद्धिं । तीए पिसाइया इव, छलिया मन्ना वि मोय इमा ।। ३२३ ।। अन्नं पि अत्थि सोक्खं, अपरायत्तं सुहाणुबंधिं च । परिचत्तकामभोगा, वि जम्मि निरया महामुणिणो ॥ ३२४ ॥ तहाहि - नेवऽत्थि चक्कवट्टीण तं सुहं नेव देवराईण । जं सुहमिहेव साहूण लोयवावाररहियाण ।। ३२५ ।। । ता तम्मि चेव जुत्तो, जत्तो सत्ताण बुद्धिमन्ताण । एवं भणमाणो च्चिय, समुट्ठिउं ताउ ठाणाउ ॥ ३२६ ॥ जा नीहरइ गिहाओ, ता खलिओ तीए धाविउं एसो । वत्थंचलम्मि धरिउं, तो भणइ इमो वि तस्समुहं ।। ३२७ भद्दे ! भोगेसु वि णिप्पिहाण वलणं न मुणिवरमणाण । जइ पर जलहिजलाइ, वलंति नियठाणचलियाई ॥ ३२८ जह कट्ठलेठ्ठपाहाणमाइदव्वेसु कणयकयबुद्धी । धत्तूरयजणियभमेण भमइ लोगो पणट्ठप्पा ॥ ३२९ ॥
Jain Education International
For Private & Personal Use Only
www.jainelibrary.org
| SR No. | 001587 |
| Book Title | Chandappahasami Chariyam |
| Original Sutra Author | Jasadevsuri |
| Author | Rupendrakumar Pagariya, Jitendra B Shah |
| Publisher | L D Indology Ahmedabad |
| Publication Year | 1999 |
| Total Pages | 246 |
| Language | Prakrit |
| Classification | Book_Devnagari, Story, & Biography |
| File Size | 17 MB |