Page Text
________________
सिरिचंदप्पहजिणचरियं
तत्तो य अणालोइयअपडिक्कंता तयज्झवसिया उ । सुद्धं सावगधम्मं, पालिय कालंतरम्मि मया ॥ २७९ ॥ देवित्तेणुववण्णा, सोहम्मे तत्थ देवभवजोग्गं । अणुहविय सुहं तत्तो, चुया य दुज्जोहणनिवस्स ।। २८० ।। सुभगाए देवीए जाया दुहियत्तणेण सिरिकता । जा तुह नियजीयाओ, वि वल्लहा अग्गमहिसि त्ति ।। २८१ ।। एसा य तन्नियाणाणुभावअन्तरियपुत्तजणणसुहा । न लहइ नरवर ! नवजोव्वणम्मि अंगुब्भवुप्पत्तिं ॥ २८२ ॥ दियहेसु केत्तिएसु वि गएसु उवसंतसयलतद्दोसा । संपाउणिही तणयं, भवणभरुद्धरणधोरेयं ॥ २८३ ।। धीरे धराभरं धरिय तम्मि पुत्तम्मि रायकयकिच्चो । अक्खयसोक्खं मोक्खं, जाहिसि तं पत्तजिणदिक्खो ।। २८४ सोऊण वयणमेयं, मुणिस्स निवई पमोयमावन्नो । निययावासं वच्चइ, चारणसमणं पणमिऊण ।। २८५ ॥ निययाभिप्पेयपयं पत्तो साहू वि कहिय नरवइणो । देवीए पुव्वभवं, संखेवेणं समियपावो ॥ २८६ ।। राया वि गमइ कालं, पालंतोऽणुव्वयाइगिहिधम्मं । जिणपूयामुणिसुस्सूसणाइवावारहयविग्घो ॥ २८७ ॥ अन्नम्मि दिणे नंदीसरस्स पव्वम्मि आगए रम्मे । देवीए समं राया, पत्तो जिणनाहभवणम्मि ॥ २८८ ॥ कयउववासो जिणवरपडिमाणाढत्तयम्मि ण्हवणम्मि । तदधो भागे होउं पहाओ ण्हाया य सा देवी ।। २८९ ।। तत्तो परमपमोयं, उव्वहमाणो गओ निययगेहं । नियकज्जसिद्धिसंभावणाए संजायरोमंचो ॥ २९० ॥ अह अन्नया य केसु वि दिणेसु सुहसुमिणसूइओ गब्भो । संभूओ देवीए तीए कयगुरुमणाणंदो ॥ २९१ ।। तस्सणुभावेण इमा, सुंदरदेहा वि अहियलायण्णा । जाया पुन्निमरयणि व्व उदयअंतरियससिबिंबा ॥ २९२ ।। अहवा अंबुधरालि व्व मज्झ विलसंतगूढरविबिंबा । भूमि व्व कप्पतरुबीयलंकिया मज्झभागम्मि ।। २९३ ।। तओ य - सविहविहुग्गमरिद्धिं जलनिहिवेल व्व वीइनिवहेहिं । सा कहइ गब्भवुड्डिं, पइदिवसोवचियअंगेहिं ।। २९४ ।। राया य निययसिरिपहरिसाण उचियट्ठमंगलं तीए । सकुलक्कमेण कारवइ नट्टगेयाइ सोहिल्लं ॥ २९५ ॥ जाए पसूइ दिवसे सुवार-तिहि-रिक्ख-जोग-करणम्मि । उच्चसुहग्गहदिट्ठम्मि पवरलग्गम्मि लग्गम्मि ।। २९६ सुहहोराए धम्मं दय व्व कप्पडुमंकुरमिलणं व्व । नाणसिरी इव चारित्तमुत्तमं जणइ सा पुत्तं ।। २९७ ।। (जुयलं) उवसंतरयं गयणं, दिसा पसन्ना य सुरहिवायवहो । दिणयरकरा अचंडा, संजाया तम्मि दियहम्मि ।। २९८ ॥ वद्धाविज्जसि सुयसंभवेण सोउं जणस्स भणइ निवो । मोत्तुमिह मं सुयं मम, दइयं च परं जणो लेउ ।। २९९ पहय-पडु-पडहपाडाणुसारवज्जंतमद्दलुद्दामं । नच्चंतवरविलासिणिपीणथणुल्लसिरहारलयं ।। ३०० ।। गिज्जंतविविहमंडलगेयज्झुणिजणियजणमणाणंदं । दिज्जंतपउरदाणाणंदियबहुभट्ट-चट्टजणं ।। ३०१ ॥ उम्मुक्कसुंककरदंडचड्डणं मुक्कगुत्तिवंदं च । रुद्धभडभंडणं जणियमंडलं हट्टसोहाहिं ॥ ३०२ ॥ कारावियं महंतं, महापमोएण राइणा तत्तो । वद्धावणयं सुयजम्मपिसुणयं सयललोयस्स ॥ ३०३ ।। (कुलक) अवि य - बहुललियविलासेहिं, बहुनडविडभडविसिट्ठहासेहिं । ववहियबहुदेसागयजणकयगुरुदाणमाणेहि ॥ ३०४ ।।
Jain Education International
For Private & Personal Use Only
www.jainelibrary.org
| SR No. | 001587 |
| Book Title | Chandappahasami Chariyam |
| Original Sutra Author | Jasadevsuri |
| Author | Rupendrakumar Pagariya, Jitendra B Shah |
| Publisher | L D Indology Ahmedabad |
| Publication Year | 1999 |
| Total Pages | 246 |
| Language | Prakrit |
| Classification | Book_Devnagari, Story, & Biography |
| File Size | 17 MB |