Page Text
________________
पउमनाहनिवो
जो य
थिरयाए विजियमेरू, सोमत्तगुणेण परभवियचंदो । रूवेण कुसुमसरमाणखंडणो तेयसा सूरो ॥ ४८ ॥ जस्स भयं परलोयाओ चेव तुच्छत्तणं च दोसेसु । वसणं सत्थत्थवियारणम्मि अइगहणरूवम्म ॥ ४९ ॥ पीडा परोऽवयारस्स दंसणे तह जसम्मि अइलोभो । निरवेक्खत्तं नियइंदियत्थविसए न अन्नत्थ ॥ ५० ॥ (जुयलं )
जस्स य -
सहइ रणे अरिकरिकुंभदलणसंलग्गमोत्तिओ खग्गो । दढमुट्ठिपीडणुव्वमियधारजलबिंदुकलिओ व्व ॥ ५१ ॥ सोहग्गगुणविसाला पसत्थभाला निसग्गसोमाला । विज्झवियदोसजाला, सुवन्नमाला पिया तस्स ।। ५२ ।। सयलंतेउरसारा, पणइजणोवहयदुक्खवित्थारा । जा सयलतिहुयणम्मि वि, अच्चब्भुयसीलगुणभारा ।। ५३ ।। सकलंकरायपासं, निसासु दिवसेसु समहुयं पउमं । जा जाइ पयइचवला, सा जीए सिरी वि हीणुवमा ॥ ५४ ॥ ती सह तस्स जियलोयपवरपंचप्पयारविसयसुहं । बुहयणपसंसणिज्जं, धम्माइतिवग्गअक्खलियं ॥ ५५ ॥ अणुहवमाणस्स सुहंसुण जा केत्तिओ गओ कालो । ता पवरलक्खणधरो, धराइ आणंदजणओ य ॥ ५६ ॥ पुत्तो स पउमनाभो, ताणं जाओ न नाममेत्तेण । किंतु गुणेहिं वि नरयंतकारओ पउमनाभो जो ॥ ५७ ॥ (विसेस ) तहा हि
धरणिप्पसिद्धनंदयसुदंसणो लच्छिविहियआवासो । जो अच्चब्भुयसच्चरिओ, रिउअसुरभयावहो दूरं ॥ ५८ ॥
३
किंच
विज्जाओ नईओ व अंबुरासिममला गुणाण मालाओ । सयलकलाओ व चंदं, जं वुड्ढकए अणुगयाओ ॥ ५९ आरूढपोढजोव्वणभरो वि लीलावईण लीलासु । न रमइ मइमंतमणेसु जणिय गुरुविम्हओ जो य ॥ ६० ॥ सोराया तेण सुएण उचियसुयजलहिपारपत्तेण । सहिओ गमेइ कालं, सेवंतो रज्जसिरिमउलं ॥ ६१ ॥ अन्नम्म दिणे नियपुरवरस्स देवउलहट्टघरसोहं । अवलोइउमारूढो, राया पासायउवरितलं ॥ ६२ ॥ पेच्छंतो पवरसुवन्नरयणरयणाइ अहियरमणीयं । पुरसोहं वित्थारइ, दससु वि आसासु जा चक्खुं ॥ ६३ ॥ एगम्मि पल्लले ताव तस्स दिट्ठी गया विसालम्मि । पासम्मि पंकबहुले, मज्झे निप्पंकजलकलिए ॥ ६४ ॥ (जुयलं) पाऊण जलं तत्थुत्तरंतमह नियइ चउपयं बहुयं । तम्मज्झवत्तिमेगं, जरग्गवं खीणदेहबलं ॥ ६५ ॥ घणचिक्खल्लक्खुत्तं, अतरंतं पायमुक्खिविउमेत्थ । कंपंतसव्वगत्तं, मरणभयत्तं विगयसत्तं ॥ ६६ ॥ (जुयलं ) तं पासिउं नरिंदो, वेरग्गविसुद्धिबुद्धिमणुपत्तो । पारद्धो चिंतेउं, संसारसरूवमइविसमं ॥ ६७ ॥ पेच्छह जहेस गोणो, तरुणत्ते निययढेक्कियरवेण । तासंतो गोनिवहं, सुसमत्थं गरुयदप्पं पि ॥ ६८ ॥ सिंगग्गदारियगिरी, एत्ताहे कं अवत्थमणुपत्तो | अहवा भवेऽणवट्ठियरूवे सव्वं पि खणखइयं ॥ ६९ ॥ (जुयलं) तहा हि
पडुपवणपहयदेवउलसिहरसंठियधयं चलचलाई | जीवाण जीयजोव्वणबलाई तह संपयाओ य ।। ७० ।।
Jain Educagon International
For Private & Personal Use Only
www.jainelibrary.org
| SR No. | 001587 |
| Book Title | Chandappahasami Chariyam |
| Original Sutra Author | Jasadevsuri |
| Author | Rupendrakumar Pagariya, Jitendra B Shah |
| Publisher | L D Indology Ahmedabad |
| Publication Year | 1999 |
| Total Pages | 246 |
| Language | Prakrit |
| Classification | Book_Devnagari, Story, & Biography |
| File Size | 17 MB |