Page Text
________________
सिरिचंदप्पहजिणचरियं
तत्थ य पढमे पव्वे, रन्नो कणगप्पहस्स जह जायं । वेरग्गं निययसुयस्स रज्जदाणं च पव्वज्जा ॥ २३ ॥ बीए तत्तणयस्सेव पउमनाहस्स पुव्वभवसुणणं । सिरिहरमुणिंदपासे, सिरिधम्मो तत्थ पढमभवे ॥ २४ ॥ जह जाओ जह से रज्जसंपया जह वयं च देवत्तं । तइयम्मि य तइयभवे, जह जाओ अजियसेणो सो ।। २५ ।। जुवरायत्तम्मि ठिओ, य जह हिओ पिउसहाए मज्झाओ । हणिऊण महिंदनिवं, धरणिद्धयखयरनाहं च ।। २६ ।। परिणइ ससिप्पहं दिव्वकन्नयं नियपुरिं च जह एइ । तुरियम्मि य अजियंजय तप्पिउणो जह वयग्गहणं ॥ २७ पंचमए जियसेणस्स चेव जह अच्चुयम्मि उप्पत्ती । छट्ठम्मि वेजयंते, उप्पाओ पउमनाहस्स ॥ २८ ॥ सत्तमए चंदप्पहजिणस्स गब्भागमो य जम्ममहो । अट्ठमए रज्जं तित्थकरण - उच्छाहणा दिक्खा ॥ २९ ॥ नवमम्मि केवलं देसणा य दसमम्मि जह य मोक्खगमो । तह सपबंधं सव्वं, पव्वे पव्वे भणिस्सामो ॥ ३० ॥ ( पढमो पव्वो)
२
इइ चंदप्पहचरिए, पढमे पव्वम्मि पीढियाबंधो । भणिओ एत्तो उड्ढं, कहासरीराणुगं वोच्छं ।। ३१ ।। अत्थि पमाणंगुल-दिट्ठमाणचउलक्ख - जोयणपमाणो । धायइसंडो दीवो, मणुस्सखेत्तस्स मज्झम्मि ॥ ३२ ॥ सनइ-ससेल-सकाणण-सपुर-सपासाय- सघर - पायारो । बहुरूव- रूवयालीकलिओ मज्झिल्लवलओ व्व ॥ ३३ माणुस्सखेत्तमहिमहिलियाए जो सहइ अंतरा थक्को । लवणोयहि-कालोयाण वलयसंठाणकलियाण ॥ ३४ ॥ (जुयलं) भरहाइ- सत्त-खेत्ताइं जाई सिट्ठाई जंबुदीवम्मि । दो दो ताइं जहियं, पुव्वावरओ विरायंति ॥ ३५ ॥ तत्थ य महाविदेहेसु दोसु दो चेव गिरिवरा मेरू । एगो पुव्वविभागे, पच्छिमभागम्मि अवरो य ॥ ३६ ॥ जो सो पुव्वविभागे, तस्सेव य पुव्वदेसभागम्मि । सुपसिद्धमंगलावइविजयं रमणीयतरमत्थि ॥ ३७ ॥ जं च सुवेयड्ढं पि हु, न चलइ कइयावि निययठाणाओ । विविहावयाहिकलियं पि नेय दीसंति दुक्खियणं ॥ ३८ ॥ गुरुकविबुहसंजुत्तं, सुमित्तरायं सुकन्नयं सुविसं । सुहरिं सुमेसमिहुणं, गयणं व विराय सययं ॥ ३९ ॥ अवि य
संपुन्नचंदवयणा, सुतारनयणा पओहरपहाणा । जं नहलच्छी चुंबइ, नरलोयपईस्स वयणं व ॥ ४० ॥ तत्थत्थि ठाणठाणप्पहाणगुरुरयणसंचयसुसोहं । नामेण रयणसंचयनयरं नयराइ पडिबिंबं ॥ ४१ ॥ पंचधणुस्सय परिमाणमाणवुम्माणविरइयगिहाई । सुकयाहियाण सोहंति जम्मि सग्गद्धसग्गे व्व ॥ ४२ ।। जत्थ य जिणम्मि भत्ती सच्चे सत्ती जसम्मि अणुरत्ती । सद्धम्मकम्मतत्ती, सुसीललाभम्मि अक्खिती ॥ ४३ ॥ परउवयारपवित्ती, परलोयाबाहजीवियावित्ती । एसा सहावओ च्चिय, लोयस्स गुणाण संपत्ती ॥ ४४ ॥ (जुयलं) किंच
जम्मि य बहेडय च्चिय कसाइणो करिवर च्चिय पमत्ता । अइरागिणो कुसुंभा, न उणो तव्वासिणो लोया ।। ४५ ।। सालम्मि अलियसद्दो, दोसासंगो दिणक्खए जत्थ । कव्वम्मि वंकभणिई, जणम्मि न उ पयइभद्दम्मि ॥ ४६ ॥ तम्मि गुरुवइरिवारणवियारणप्पवणतरुणनहरच्छो । कणगप्पहो त्ति नामेण नरवई आसि विक्खाओ || ४७ ||
Jain Education International
For Private & Personal Use Only
www.jainelibrary.org
| SR No. | 001587 |
| Book Title | Chandappahasami Chariyam |
| Original Sutra Author | Jasadevsuri |
| Author | Rupendrakumar Pagariya, Jitendra B Shah |
| Publisher | L D Indology Ahmedabad |
| Publication Year | 1999 |
| Total Pages | 246 |
| Language | Prakrit |
| Classification | Book_Devnagari, Story, & Biography |
| File Size | 17 MB |