Page Text
________________
१३६
।
सिरिचंदप्पहजिणचरियं (सत्तमो पव्वो) मज्जंतं मोहमए महंधकूवम्मि जगमिणं सयलं । उद्धरिउं जे धरिया अवलंबणरज्जुदंड व्व ॥ ३५३४ ॥ सिरिचंदप्पहतित्थयरदेहउल्लसियकिरणसंघाया। भवियकुमुयागराणं सिरीए ते हंति निच्चं पि ।। ३५३५ ।। नवकोडिसएसु गएसु सागराणं सुपासनाहाओ । उप्पन्नो जो भवयं भरहे दसपुव्वलक्खाऊ ॥ ३५३६ ।। देहुस्सेहपमाणं च जस्स सड्ढं धणुस्सयं जायं । तस्सुज्जलपुन्नपरंपराइ सम्मत्तलाभभवं ॥ ३५३७ ॥ छब्भवगहणाई इमाई अप्पमइणा वि निययसत्तीए । भणियाई संपयं से तित्थयरभवं भणीहामि ।। ३५३८ ।। (चंदप्पहजिणचरियं) अस्थि नवसेयपक्खो व्व पइदिणोवचियरायसब्भावो । निच्चं मित्तुदयकरो राइ पव्वविरायमाणो य ।। ३५३९ ।। विहियमहातिहिपूओ, अलद्धदोसावयासकालो य । नामेण पुव्वदेसो देसो, इह भरहखेत्तम्मि ।। ३५४० ॥ (जुयल) अवि य - थणसोणिभरेण जहिं उट्ठिमसहाओ कलमगोवीओ । गीएणं चिय थंभंति सालिकणटुपए हरिणे ॥ ३५४१ ।। जत्थ य चिक्काररवच्छेलेण पहियाणमिक्खुजंतेहिं । आहवणं व करितेहि वाडभूमीओ रायंति ॥ ३५४२ ।। इक्खुरसामयपाणेण जत्थ सुहिया पए पए पहिया । मग्गपरिस्सममप्पं पि नेय जाणंति हिंडंता ॥ ३५४३ ।। सइतुंगत्ते फलसंपयाइ ओणयसिरा तरू जत्थ । सच्छाया सप्पुरिस व्व तावमवणिंति लीणाण ॥ ३५४४ ॥ विउलफलग्गलिएहिं नीरंधेहिं अकिट्ठपव्वेहिं । संपन्नं जं च पसस्ससस्सनिवहेहिं सव्वेहिं ॥ ३५४५ ।। दुन्भिक्खाई दोसा, कुग्गहसंचारमाइसंजणिया । दुज्जणजणाववाया निदोसनरं व न फुसंति ॥ ३५४६ ।। (जुयलं) दव्वगुणजाइसमवायसुप्पइट्ठो विसिट्ठ सिवकलिओ। कम्मविसेसपहाणो सोहइ वइसेसिउ व्व जो य फुडं ॥ ३५४७ (गीतिका) तियसपुरि व्व विरायंतसुमणनिवहेहिं अहियकयसोहा । तत्थत्थि रायहाणी चंदउरी नाम विक्खाया ॥ ३५४८ ॥ चंदाणणाहिं जा किर तरुणीहिं विराइया पइगिहं पि । चंदाणण त्ति पत्ता पसिद्धमइमुत्तमं लोए ॥ ३५४९ ।। ससिबिंबचुंबणूसुयमुहीहिं वायासलग्गसिहराहिं । जायसुहपंकधवलाहिं सहइ पासायमालाहिं ।। ३५५० ।। जीसे पायारो वि हु उन्नयसिहरावलीकरग्गेहिं । उत्तंभइ व गयणं निरासयं जायकारुण्णो ॥ ३५५१ ।। पवणपहल्लिरवीइच्छलेण उव्वेल्लमाणबाहुलया। नच्चइ व नयररिद्धीए रंजिया खाइया जत्थ ।। ३५५२ ।। किंच - गंभीरखायवलएण परिगया सव्वओ वि जा सहई । सेवागएण जलरासिण व्व रयणाण इच्छाए ।। ३५५३ ।। जत्थ य तरुसु विओगो मूसयमाईण जइ परविलावो । अइपीलिएक्खुदंडे व्व विरसया न उण अन्नत्थ ।। ३५५४ ।। जत्थ य नागसहस्सोवसेवियं नागलोयठाणं व । हिययं व सज्जणाणं वित्थिनं जणियजणतोसं ॥ ३५५५ ।। सुगयमयं पिव बहुभूमियाहिमामाइ परिगयं रन्नो। भवणं भुवणस्स वि जणियविम्हयं निययसोहाए ॥ ३५५६ ॥ (जुयलं) तत्थ य राया निययप्पयाववसवत्तिविहियसयलनिवो । महसेणो नामेणं न परं अत्थेण वि तहेव ।। ३५५७ ।।
Jain Education International
For Private & Personal Use Only
www.jainelibrary.org
| SR No. | 001587 |
| Book Title | Chandappahasami Chariyam |
| Original Sutra Author | Jasadevsuri |
| Author | Rupendrakumar Pagariya, Jitendra B Shah |
| Publisher | L D Indology Ahmedabad |
| Publication Year | 1999 |
| Total Pages | 246 |
| Language | Prakrit |
| Classification | Book_Devnagari, Story, & Biography |
| File Size | 17 MB |