Chandappahasami Chariyam

SR No.: 001587
Original Sutra Author: Jasadevsuri
Author: Rupendrakumar Pagariya, Jitendra B Shah
Publisher: L D Indology Ahmedabad
Publication Year: 1999
Total Pages: 246
Language: Prakrit
Classification: Book_Devnagari, Story, & Biography
File Size: 17 MB

Page 165

१३४
सिरिचंदप्पहजिणचरियं
मित्तस्स अमित्तस्स व सयणस्स व परजणस्स व इयाणि । समभावो च्चिय मझं ता मं खामेउ सव्वो वि ॥ ३४८० ॥ खामेमि जीवरासिं सव्वमहं सो वि खमउ मह इण्हि । सव्वत्थ वि मह मेत्ती अमित्तभावो न कत्थ वि य ।। ३४८१ इय सत्तखामणासुं चित्तं विणिवेसिऊण सुहभावो । गिण्हइ पच्चक्खाणं, चउविहाहारविसयं पि ।। ३४८२ ।। इहपरलोगासंसाइदोसपरिचत्तमाणसो धीरो । निम्ममनिरहंकारो निराकारसाकारसमचित्तो ।। ३४८३ ।। उवओगसुद्धिसारे सब्भावुब्भावणानिहयदोसे । अणसणपच्चक्खाणे, बद्भुच्छाहो अणागारे ।। ३४८४ ।। अरहंतसिद्धसाहूसु तह य धम्मे जिणप्पणीयम्मि । आबद्धसरणबुद्धी पंच नमोक्कारमह कुणइ ।। ३४८५ ॥ अट्ठमहासुरकयपाडिहेरपूयाइ जे सया अरहा । अरहंताणं ताणं भत्तीए अहं पणिवयामि ॥ ३४८६ ।। अट्ठविहकम्मबीयक्खएण न रुहंति जे भवमहीए । अरुहंताणं ताणं भत्तीए अहं पणिवयामि ।। ३४८७ ॥ रागद्दोसकसायाइदुज्जयारी विणिज्जिया जेहिं । अरिहंताणं ताणं भत्तीए अहं पणिवयामि ।। ३४८८ ॥ जेसिमिह पत्थणाए , पावंति जिया समाहिमरणाई । अरहंताणं ताणं भत्तीए अहं पणिवयामि ।। ३४८९ ।। चिंतामणि व्व जे विगयरागदोसा वि चिंतियप्फलया । हुंति जियाणं तेसिं अरहंताणं पणिवयामि ॥ ३४९० ॥ अट्ठविहं पि य कम्मं अणाइभवसंतईसियं जेहिं । झाणजलणेण धंतं सिद्धाणं ताण पणमामि ।। ३४९१ ।। सयलं पि जाण कज्जं सिद्धं नियएण जीवविरिएण । सिद्धिगइमुवगयाणं सिद्धाणं ताण पणमामि ॥ ३४९२ ।। जे शंतनाणदंसणवीरियसुहसिद्धिमुत्तमं पत्ता । नट्ठट्ठारसदोसाण ताण सिद्धाण पणमामि ।। ३४९३ ।। सारीरमाणसाणं पत्ता दुक्खाण जे परं पारं । असरीराणं अमणाण ताण सिद्धाण पणमामि ।। ३४९४ ।। सिवमयलमरुयमक्खयमाबाहविवज्जियं अणागमणं । ठाणं जे संपत्ता सिद्धाणं ताण पणमामि ॥ ३४९५ ॥ देसकुलजाइरूवेहिं जे जुया सपरसमयकुसला य । पंचविहायारधराण ताण पणमामि भत्तीए ॥ ३४९६ ।। संघयणधिइबलड्ढाणासंसी देसकालभावन्नू । सुत्तत्थोभयनिउणा, जे ताण नमामि भत्तीए ॥ ३४९७ ॥ गंभीरा सिवसोमा दित्तिजुया विविहदेसभावविऊ । जे विजियनिद्दपरिसा ताणं पणमामि भत्तीए । ३४९८ ॥ थिरपरिवाडीआदेयवक्कआसन्नलद्धपइभा जे । आहरणहेउकारणनियनिउणाणं नमो तेसिं ॥ ३४९९ ।। अविकंथणा अमाई गाहणदक्खा पभूयगुणजुत्ता । जे आयरिया तेसिं भत्तीए नमामि कमकमलं ।। ३५०० ।। जे सीसाणुवयारं कुणंति सुत्तप्पयाणओ निच्चं । अगणियनियस्समाणं ताणुज्झायाण पणमामि ॥ ३५०१ ॥ जे खलु दुवालसंगं पढिऊण सयं पढाविऊणऽन्ने । साहिति मोक्खसोक्खं ताणुज्झायाण पणमामि ।। ३५०२ ।। साहिज्जइ नाणायारं अट्ठप्पयारमाराहिऊण जे धीरा । लोगोवयारनिरया, ताणुज्झायाण पणमामि ॥ ३५०३ ।। दंसणनाणचरित्तेसु तह तवे संजमे य उज्जुत्ता । जे जावज्जीवं पि हु ताणुज्झायाण पणमामि ॥ ३५०४ ॥ मोक्खोवायपरूवणपरायणा पंचभेयसज्झाए । निरया जे निच्चं पि हु ताणुज्झायाण पणमामि ।। ३५०५ ।। पंचमहव्वयसारा, समतणमणिलेठुकंचणा जे य । पत्तपउमाइउवमा, साहूणं ताण पणमामि ॥ ३५०६ ॥ सावज्जजोगविरई, जावज्जीवं पि जेहिं काऊण । साहिज्जइ परलोओ, साहूणं ताण पणमामि ॥ ३५०७ ॥