Munisuvratasvamicarita

SR No.: 001564
Original Sutra Author: Chandrasuri
Author: Rupendrakumar Pagariya, Yajneshwar S Shastri, R S Betai
Publisher: L D Indology Ahmedabad
Publication Year: 1989
Total Pages: 376
Language: Sanskrit
Classification: Book_Devnagari, Literature, & Story
File Size: 9 MB

Page 96

सिरिमुनिसुव्वयजिणिंदचरियं तो जइ मंडलियाणं पसंतवयणं कहिस्सह तुममे । तो सब्वसेन्नसहिओ पुरओ वि अहं गमिस्सामि ॥२००२।। अन्नह पुण तत्थेवयसेन्नं सव्वं पि संठवेऊण । अप्पपरिवारजुत्तो गंतूणं सामिपासम्मि ॥२००३॥ काऊण मंगलीयं समागमिस्सामि सेन्नमज्झम्मि । इय सिक्खविउं सम्माणिउं च सो ते विसज्जेइ ॥२००४॥ तम्मि दिणे तत्थेवयवसिऊणं अप्पणा पभावम्मि । दाऊण पयाणाइं भणिय पएसम्मि चिठेइ ।।२००५।। मंति-निवपेसियनरा दूएहि समन्निया वि संपत्ता। चउ जोयणंतरट्टियमंडलियाणं समीवम्मि ॥२००६॥ कहियं दूएहि तओ मंतिनिवाइट्ठमग्गओ तेसि । तं सोउं ते सव्वे समकालं पमुइया जाया ॥२००७॥ दिन्नो तेहिं पसाओ उत्तारेऊण नियसरीराओ । वत्थाहरणाईओ दूयाईणं समग्गाणं ।।२००८।। मंतिनरिंदस्स नरा सम्माणेउं पुणो वि तस्सेव । संपेसिया समीवे एवं भणिऊण जह अम्हे ।।२००९।। रणबुद्धीए लोयं अइबहुयं मेलियं विसज्जेउं । थेवपरिवारजुत्ता पहुणो पणिवायकरणत्थं ॥२००१।। मंगलियं हय-गय-वत्थ-भूसणप्पभिइयं गहेऊण । नियनियदेसेहितो सिग्घं पि समागमिस्सामो ॥२०११॥ ता खेओ दरणिज्जो न कोवि अम्हुवरिमंतिपवरेण । इन्हि खमियव्वाइं पुव्विल्लाइं दुरुत्ताइ ।।२०१२।। मंडलिएहि दिन्नं सिक्खं इय' एरिसं गहेऊण । आगंतूण निवेयंति ते पुरो मंतिरायस्स ॥२०१३।। अहसो पहिचित्तो तत्तो दाउं पयाणयं पुरओ । वच्चइ नरिंदनयरे समनिओ सव्वसेन्नेण ॥२०१४।। कारइ रज्जहिसेयं पुणो वि निवइस्स अंबुवीचिस्स । अइगरुयविभूईए समनिओ रायलोएण ॥२०१५।। तो रायलोयसहिओ पणमइ महिमिलियमत्थओ तत्थ । उवविसिउं कारावइ निवदंसणमन्नलोयस्स ।।२०१६।। नायरपमुहस्स उवायणाइं घेत्तूणं दारपत्तस्स । गाम-नवरेसु कारइ महसवं पेसिउं पुरिसे ।।२०१७।। गायतयाई नच्चंतयाइं पमयाउलाइं पविसंति । सम्माणिऊण दाणेण ताई अह पट्टविज्जति ॥२०१७।। पूइज्जतिय देवा सम्माणिज्जति लिगिणो सव्वे । दीणाईणं दाणं दिज्जइ मुच्चंति गुत्तीओ।।२०१९।। तह कह वि कारिओ तेण मंतिणा ऊसवो पुरे तम्मि । तत्थ समए जणो जह विम्हइओ पासवत्ती वि ।।२०२०।। सचिवस्स सामिभत्ति पासंतो कि पुणो वि दूरत्थो। एत्थ समयम्मि पत्ता मंडलियाणं तहिं दूया ॥२०२१॥ विन्नत्तो नमिऊणं मंतिवरो तेहिं सामिणो अम्ह । एंता चिटुंति इहं तइयपयाणम्मि दिन्नम्मि ।।२०२२। अम्हे तेहि निउत्ता जह तुब्भे जाह अग्गओ होउं । मंतिस्स कहह वत्तं तो ते सचिवेण परिपुट्ठा ।।२०२३।। तुब्भे वि इहायाया कि बहुयदिणेहि तेहितो भणियं । तुम्ह पुरिसा जया इह विसज्जिया अम्ह सामीहिं ।।२०२४। अम्हे तया निवाणं संगरबुद्धिए । संवहेऊण । आवंताणं समुहा पट्टविया वत्तकहणत्थं ॥२०२५।। अम्ह मुहाओ ते अंबुविचिरन्नो सरीरमारोग्गं । सोऊण पहसियमुहा सव्वे सहस त्ति संजाया ।।२०२६॥ दाउं अम्ह पसायं गहिओ तत्थेव तेहिं आवासो। तम्मि समयम्मि पत्तो रायकलत्तस्स दूओ वि ।।२०२७॥ निय पिउणो नरवइणो पासे संपेसिओ कुसलवत्तं । निय भत्तुणो सरीरस्स अक्खिउं गहियलेहकरो ॥२०२८॥ तं वाइऊण लेहं तस्सत्थो सेसपुहइवालाणं । तेण कहिओ तओ ते विसेसओ पमुइया जाया ॥२०२९।। तो तेहि नरिंदेहि इय भणिऊणं विसज्जिया अम्हे । जह अम्हे गंतूणं नियनिथदेसेसु अह तत्तो ॥२०३०।। मंगलियं गहिऊणं नरिंदपासे समागमिस्सामो । तुब्भे गंतूण इमं निय' सामीणं निवेएह ।।२०३१।। तत्तो आगंतुणं मिलिया अम्हे नियाण सामीणं । संवहिउँ नियनयराहि नीहरंताण इहभिमुहं ।।२०३२।। तेहि समंचिय पत्तो दोन्निपयाणे समागया अम्हे । तइयपयाणे पुरओ होऊणं आगया एत्थ ।।२०३३।। एवं जपंताण वि तेसि मंडलवईण पुरिसाणं । पच्चंतिय निवईण वि समागया तक्खणे पुरिसा ।।२०३४।।