Page Text
________________
सिरिमुनिसुव्वयजिणिंदचरियं जो को वि कलायरिओ मग्गेणं तेण एइ वच्चइ वा । तं कइ वि दिणे अइगोरवण तत्थेव धारेउं ।१६०९॥ सिक्खावेइ कलाओ पासाओ तस्स सूरपालं सो । एवं कमेण जाओ सव्वकलापारपत्तो सो॥१६१०॥ उत्तमकुलसंभूयं तत्तो परिणावए वरं कन्नं । तं निवसेवाए कए वि सज्जए नेय कत्थ वि य ।।१६११॥ अइसइयनेहवसओ सो वि न अन्नत्थगंतुमीहेइ । तस्सेव समीवत्थो चिट्ठ आणाए वतो ॥१६१२।। ते कओ निच्चितो सव्वत्थ वि जोगपाल पट्टइलो। आवज्जिओ समग्गो गामजणो नियगुणोहेण ।।१६१३।। पट्टइलजोणपालेण कारियं सूरपालजोग्गगिहं । नियगेहासन्नमईववित्थडं नियनिवाससमं ।।१६१४।। वरणेण जोग्गपालस्स सूरपालो वि मंदिरे तम्मि । जणणी-कलत्तसहिओ संचरिओ सोहणदिणम्मि ।।१६१५।। इय काले वच्चंते संजाया दोन्नि सूरपालस्स । पुत्ता कमेण पवरा अणूपम्वा तह य धूया य ।।१६१६।। परलोग (ग) मणसमयं अप्पणयं जोग्गपालपट्टइलो। नाऊण सयललोग मेलेऊणं इमं भणइ ।।१६१७।। एस मह सूरपालो नियपुत्ताओ वि दुग्गपालाओ । अब्भहिओ सयकालं जाणह तुब्भे वि ताव इमं ॥१६१८।। एसो वि मज्झ भत्तो विणयं तह कह वि कुणइ जह अन्नो। को वि न सक्कइ काउं तुम्हें पच्चक्खमेयं पि ।।१६१९।। ता वियरिस्सामि अहं अद्धं नियसव्वविहवसारस्स । एयस्स सेसमद्धं भविस्सए दुग्गपालस्स ।।१६२०॥ तह अन्नं पि भणिज्जह तुब्भे ठाणम्मि मज्झ दट्ठव्वो । तुब्भेहिं सूरपालो मए विठविओ नियपम्मि ।।१६३१॥ सो च्चिय एवं भणिए पट्टइलेणं भणंति ते सव्वे । गामपहाणा पुरिसा जह वयणं तुम्ह पुव्वं पि ॥१६२२॥ आसि पमाणं अम्हं समए एयम्मि पुण विसेसेण । जुत्तं चि य ताव इमं भणह जमन्नं पि तं करिमो॥१६२३॥ पच्छा पट्टइलेणं पास निविट्ठो निओ सुओ भणिओ । जह दुग्गहपाल ! तुमए सयकालं सूरपालेण ॥१६२४।। सह पीईए परमाए वट्टियव्वं समग्गकज्जेसु । एसो च्चिय कायव्वो पुरओ जं तुह गुणजेट्ठो ॥१६२५।। तेण वि गुरुविणएणं नियपिइवयणे तह त्ति पडिवन्ने । पच्छा अणिच्छमाणो वि सूरपालो समग्गेण ॥१६२६।। गामेण दुग्गपालाइणा सहाएण जोग्गपालेण । मन्नाविऊण ठविओ पट्टइलपयम्मि निययम्मि ॥१६२७॥ नियविहवस्स वि अद्धं पणामियं तस्स तक्खणे चेव । सिक्खविओ तह एवं असुहं गामस्स मा कुज्जा ।।१६२८।। एक्कक्केणं सम्माणिऊण तह खामिऊण सप्पणयं । सव्वो वि तओ गामो विसज्जिओ जोगपालेण ।।१६२९।। अह सो खणंतरेणं पत्तो परलोयमग्गपहियत्तं । तत्तो य विभूईए विहिओ तदेहसक्कारो॥१६३०॥ कालेण दुग्गपालो गयसोओ तह य सूरपालो य । संजाओ ते दोन्नि वि वटुंति तहा जहा भणिया ।।१६३१।। निय पिउणा तह मायामहेण इय एस तुम्ह परिकहिओ। अम्हेहि सूरपालस्स वइयरो खत्तियवरस्स ।।१६३२।। बीएण रायपुरिसेण जंपियं जइ कुलं अनाऊण । एसा परिहरिया तो कहिज्जए एरिसं रन्नो ॥१६३३॥ तइएण तओ भणियं न घडइ एयं कुलं अनाऊण । पढम पि जमेसनिवो परिणेउमिमं इहाणेइ ॥१६३४॥ अह अन्नायकुलं पि हु इममाणावइसुरूवलोभेण । तो परिहरइ न एवं कारणमवरंतओ एत्थ ।।१६३५।। अह आह चउत्थो पत्थिवस्स पुरिसो इमेण जह कहियं । तह सव्वं पि मए विहु सरूवमायन्नियं अत्थि ।।१६३६॥ तस्सेव समीवाओ निवेइथं जेण निवइणो पुरओ। रूवं अणुपम्बाए कुल-जाइसमन्नियं सव्वं ॥१६३७।। जाणतेण वि निसुयं पुणो वि जं संपयं मए एयं । तं संवायनिमित्तं ता एत्थ न अन्नहा कि पि ॥१६३८॥ जं परिभावह तुब्भे संभाविज्जइ न कारणं तमिह । जं सव्ववन्नकन्नाओ परिणए खत्तियकुमारो॥१६४०।। वणिणो वि विहविणो अन्नजाइयं कन्नयं परिणयंता । निययंगुली पभिईहिं विसुइणो जेण दीसंति ।।१६४१।। सत्थे विजओ भणियं अमेज्झ मज्झाउ गिज्झए कणयं । नीयाउ विवरविज्जा थीरयणं दुक्कुलाओ वि ।१६४१।।
Jain Education International
For Private & Personal Use Only
www.jainelibrary.org
| SR No. | 001564 |
| Book Title | Munisuvratasvamicarita |
| Original Sutra Author | Chandrasuri |
| Author | Rupendrakumar Pagariya, Yajneshwar S Shastri, R S Betai |
| Publisher | L D Indology Ahmedabad |
| Publication Year | 1989 |
| Total Pages | 376 |
| Language | Sanskrit |
| Classification | Book_Devnagari, Literature, & Story |
| File Size | 9 MB |