Page Text
________________
४२
सिरिमुनिसुव्वयजिणिंदचरियं
छायासन्नं तं पासिऊण पियपणइणि व्व ईसाए । आगम्म झत्ति तद्दिट्ठिगोयरे निवडिया निद्दा ॥१३१७॥ तह निम्भरमालिंगइ तं मउलिज्जतलोयणो जह सो। ऊसासमेत्तलक्खिज्जमाणचेयन्नओ होइ ॥१३१८॥ अह निदाए मुक्को नियइच्छं पूरिउ खणं कुमरो । सिद्धम्मि निए कज्जे सबो वि अणायरो होइ ।।१३१९।। परिच्चत्तो निदाए विसिट्ठयरवेयणाए सो गहिओ । सोहग्गनिही पुरिसो रुज्झइ अन्नन्ननारीहिं ।।१३२०॥ तत्तो निग्गंतूणं उज्जाणसिरि पलोयए कुमरो। कज्जवससिढिलियं पि हु साहेति बुहा पुणभिरुइयं ॥१३२१॥ आसन्नमागओ वि हु सूरो नाऊण नियपथावस्स । अपवेसं तम्मि वणे खेएण व दूरमोसरइ ॥१३२२॥ निहुयं निहालयंतो भमइ तरु एक्कमेक्कमह कुमरो। एक्कम्मि विवद्धरसा न होंति छेयाण दिट्ठीओ ॥१३२३॥ जत्तो जत्तो चक्खु निक्खिवइ निएइ तत्थ तत्थेसो। साहादलपल्लवकुसुमफलभराऊरिया तरुणो ।।१३२४।। रम्माओ रम्मयरं पलोयमाणो पुरो पुरो वयइ । कुमरो बुहयणबुद्धी विसेसगहणुज्जया होइ ।।१३२५॥ पेक्खेइ तओ एक्कं सरोवरं गरुयपालिपरिखित्तं । चिरविप्पउत्तमिलियं सिणिद्धमित्तं व कयहरिसं ।।१३२६ तस्साभिमुहं गंतुं पालीए मत्थयम्मि आरुहइ । जा कुमरो ता पेक्खइ जलभरियं तं समदं व ॥१३२७॥ विमलसिलाबद्धतडं अणेगसोवाणपंतिपरिकलियं । नलिणनयणेहि विप्फारिएहि कुमरं नियंतं व ॥१३२८।। पवणसमाहयकंपंतकमलिणीपत्तपाणिनिवहेहि । आहवणं व कुणंतं पुणो पुणो तस्स कुमरस्त ॥१३२९।। सलिलस्स वहुत्तणओ तम्मि पएसे अमायमाणं व । उच्छलिथगुरुतरंगेहिं ऊससंतं व उड्ढदिसि ।।१३३०॥ लहरीहि ताडयंतं तडभित्तिमभिक्खणं व पेल्लंतं । दूरोसारणबुद्धीए लद्धमवयासमइविउलं ॥१३३१।। मज्जतमत्तकुंजरगंडयलुड्डीणछप्पयकुलेहि । जलहिभमगहियसलिलुप्पयंतनवमेहमालं व ॥१३३२।। आसन्नविययवरपुंडरीयछाया विरायमाणेहिं । सेविज्जतं व नरिंदमंदिरं रायसहि ॥१३३३।। गयणमयमवणयंतं अविरयवियरंतरायहंसेहिं । जुन्हासियपउरपयावभासमाणं महाभोयं ॥१३३४॥ सुन्नारन्नं व समीरचलिखणवित्थराभिरमणिज्जं । कमलेहिं पुंडरीएहिं सव्वओ सोहमाणं च ।।१३३५।। वणकरितुरंयनरेहिं पासम्मि समंतओ समंतेहिं । माणिज्जइ जम्मि फुडं रायसिरी रायहंसेहिं ॥१३३६।। मज्जगकज्जसमुज्जयवणकुंजरकरविमुक्कसलिलेहिं । दिणयरकरपरितत्तं नहंगणं सिंचमाणं व ॥१३३७।। कुमरो सणियं सणियं सोवाणपहेण ओयरेऊण । तीरतरुपंतिसाहानिसिद्धमज्झन्हरवितावं ॥१३३८॥ तस्स सरस्स तडत्थं पियइ जलं सीयलं च विमलं च । पक्खालइ सव्वंगं जलावगाहं करेऊण ॥१३३९॥ तत्तो नियत्तिऊणं तेणेव पहेण उड्ढमारुहइ । पालीसिहरगयाए वणराईए तरूण तओ ॥१३४०॥ कालोचियाइं गिन्हइ महुररसाइं फलाइं पककाइं । तेहिं नियपाणवित्ति काऊणं पालिउवरिम्मि ॥१३४१॥ भमिऊणियरदिसाए ओरुहइ कुबेरदत्तवरकुमरो। पुण पेक्खिउं पयट्टो वणलच्छि तीए विदिसा ॥१३४२।। तत्थेक्कम्मि पएसे दिट्ठो उस्सग्गसंठिओ साहू । तेण सहस त्ति परमक्खरम्मि लीणो परिहबाहू ॥१३४३।। सोमो व्व सोमलेसो दिणयरबिंब व दित्ततवतेओ। मेरु व्व निप्पकंपो गंभीरो सागरवरो व्व ॥१३४४।। करचरणनिम्मलारुणनहमणिकिरणेहिं नीहरंतेहिं नियदेहाओ रायं नीहारंतो व्व वाहिम्मि ।।१३४५।। सरयसलिलं व सत्यो तह मेइणिमंडलं व सबसहो । पवणो व्व अपडिबद्धो अणिस्सिओ अंतरिक्खं व ॥१३४६॥ दसणमत्तेणं चिय' पणासयंतो व्व पावपब्भारं । भवियजणाण जणेतो अउव्व सुहकम्मसंघायं ॥१३४७।। चिरविप्पउत्तसहस त्ति दिट्ठपियबंधवाओ अब्भहियं । तइंसणजणियपमोयमुन्वहंतण कुमरेण ।।१३४८।।
॥छहिं गाहाकुलय ॥
Jain Education International
For Private & Personal Use Only
www.jainelibrary.org
| SR No. | 001564 |
| Book Title | Munisuvratasvamicarita |
| Original Sutra Author | Chandrasuri |
| Author | Rupendrakumar Pagariya, Yajneshwar S Shastri, R S Betai |
| Publisher | L D Indology Ahmedabad |
| Publication Year | 1989 |
| Total Pages | 376 |
| Language | Sanskrit |
| Classification | Book_Devnagari, Literature, & Story |
| File Size | 9 MB |