Page Text
________________
३९
कुबेरदत्तचरियं पेसेइ तओ कुमरो विन्नत्ति अप्पिऊण नियपुरिसे । पासम्मि विस्सकंतस्स निवइणो वत्तकहणत्थं ॥१२१८।। गंतूण ते वि तुरियं विस्सउरे विस्सकंतनरवइणो । तं विन्नत्तीलेहं अप्पेंति कुमारपेसवियं ॥१२१९॥ तो अवगयलेहत्थो तुटुमणो विस्सकतनरनाहो । विउलं पसायदाणं तेसिं पुरिसाण देइ दुयं ॥१२२०।। अग्ने पहाणपुरिसे पेसइ कुमरस्स सम्महे राया । तेहिं समं कुमरो वि हु विस्सउरे झत्ति संपत्तो ॥१२२१॥ नाऊण नरिंदो वि हु निग्गच्छइ सम्मुहो कुमारस्स । ठूण निवं एतं कुमरो ओयरइ तुरयाओ॥१२२।। अन्ने वि हु सामंता मंडलिया उत्तरंति तो सव्वे । परबलसीहो खसपत्थिवो य कुमरस्स दिति नियं ॥१२२३।। उभओ पासे बाहुं तत्थ विलग्गो पयाइ पिउसमुहो । कुमरो तस्सासन्नो गंतूणं मुयइ निवबाहू १२२४।। करिवरखंधुत्तिन्नं पियरं पणमइ मही निहियसिरो । पुण उट्ठियं नरिंदो कुमारमालिंगए गाढं ॥१२२५।। आलिंगिऊण मुक्को नरवइणा तो कुबेरदत्तो वि । परवलसीहं खसपत्थिवं च दंसइ नरिंदस्स ।।२२६।। दंसियमेत्ता ते वि हु पणमंति पएसु विस्सकंतस्स । पणमिय-समुट्ठिए तो अवगूहइ विस्सकंतो वि ॥१२२७।। रणधवलदंडनाहो पणमइ तयणंतरं नरिंदस्स । सहरिसहियओतं पि हु आलिंगइ विस्सकंतनिवो ॥१२२८।। अह विस्सकंतरन्ना समणुनाया समग्गसामंता । मंडलिया य जहोचियसवाहणेसुं समारूढा ॥१२२९।। कुमरो कुबेरदत्तो परबलसीहो खसो य नरनाहो । रणधवलो दंडवई आरूढा वरगइंदेसु ॥१२३०।। सिरिविस्सकंतरन्नो गयाहिरूढस्स पासओ सव्वे । जंति कुमारप्पमुहा कमेण सब्वे नयरमज्झे ।।१२३१।। ऊसवियधयवडाए वजंतअणेगतूरसंघाए । गिजंतपवरगेए ठाणे ठाणे य कयनट्टे ॥१२३२।। बहुबंदिविंदवंनिज्जमाणनिवकुमरविक्कमगुणोहे । धवलहरदेवभवणग्गभागमारूढनयरजणे ॥१२३३।। पेच्छते य सविम्हयमन्नोन्नं अंगुलीए दंसंते । परबलसीहं खसपत्थिवं च कुमरेण आणीयं ॥१२३४।। नियपासायसमीवे गओ नरिंदो विसज्जए सव्वं । परिवारं कुमरं पुण सहऽप्पणा नेइ पासाए ॥१२३५।। परवलसीहस्स तहा खसस्स पुहईवइस्स आवासं । दावइ पुढो पुढो मंदिरेसु सिरिविस्सकंतनिवो ॥१२३६।। अह विस्सकंतराया सुहासणत्थो कुबेरदत्तस्स । कुमरस्स सन्निहाणे पुच्छइ कडयस्स वत्ताओ॥१२३७।। कुमरो वि कहइ सव्वं वुत्तंतं मूलओ समारब्भ । लज्जासंकुइयतणू पुरओ निवविस्सकंतस्स ॥१२३८।। राया वि चिंतइ मणे परक्कमंतस्स बुद्धिविहवं च । अच्चब्भुयं कुमारस्स तहय गव्वस्स परिहारं ॥१२३९।। समयम्मि तओ राया परवलसीहं खसं चरणधवलं । कारइ कुबेरदत्तं च भोयणं अप्पणा सद्धिं ॥१२४०।। सिलियावसरम्मि तओ तंबोलविलेवणाइसम्माणं । काऊणं कुणइ निवो तेहि समं उचियमालावं ॥१२४१॥ कन्ने होऊण तओ कुबेरदत्तो निवस्स विनवइ । जइ वि मए सम्माणं कयमेएसि पुरा अत्थि ॥१२४२।। तुम्हेंहिं वि कायव्वं तहावि एत्थागयाण एएसि। किंचि वि सम्माणं खस-परबलसीहाण उचियं ति ॥१२४३॥ पडिवज्जिऊण रन्ना कुमारवयणं तह त्ति निम्मवियं । खस-परवलसीहाणं करि-तुरयाईहिं सम्माणं ॥१२४४।। रन्ना विसज्जिया ते पहिट्ठचित्तागया नियावासं । निच्चं नरिंदपासे उभओकालं पि वच्चंति ॥१२४५।। पियरं विनविऊणं कुबेरदत्तो करावए जत्तं । सव्वेसु जिणहरेसु कमसो घोसावइ अमारि ॥१२४६।। सिरिविस्सकंतरायं परवलसीहं खसं च रायाणं । अन्नं च निवइलोयं निच्चं सो नेइ जिणभवणे ॥१२४७।। दळूण ते वि उक्किट्ठपूयबलिपेच्छणाइयं सव्वं । हिट्ठमणा धुणिऊणं सीसाइं भणंति तो एवं ॥१२४८॥ अज्जं चिय संजायं सहलत्तं अम्ह लोयणजुयस्स । जं एरिसमच्चब्भुयमवलोइयमेत्थअम्हेहिं ॥१२४९।। राया बि विस्सकंतो जंपइ अम्हं वि इहेव नयरम्मि । निवसंताणं कालो वोलीणो बालभावाओ ॥१२५०॥
Jain Education International
For Private & Personal Use Only
www.jainelibrary.org
| SR No. | 001564 |
| Book Title | Munisuvratasvamicarita |
| Original Sutra Author | Chandrasuri |
| Author | Rupendrakumar Pagariya, Yajneshwar S Shastri, R S Betai |
| Publisher | L D Indology Ahmedabad |
| Publication Year | 1989 |
| Total Pages | 376 |
| Language | Sanskrit |
| Classification | Book_Devnagari, Literature, & Story |
| File Size | 9 MB |