Page Text
________________
३८
सिरिमुनिसुध्वयजिणिदचरियं
तिनिदिणे पाहुणओ होऊणं तस्स चेव तम्मि पुरे। निग्गच्छइ अह कुमरो परबलसीहेण सह तत्तो॥११८५।। वच्चइ खसनरवइणो देसाभिमुहो समग्गसेनजुओ। तो खसरन्ना कुमरो परबलसीहस्स पासाओ ।।११८६।। विनाविओ जहा मे उवरि पसायं गुरुं करेऊण। देसो न ल्हूसियव्वो मज्झ अहं सेवओ तुम्ह ॥११८७।। आगंतुं मम नयरे खसउरनामम्मि होह पाहुणया । जेण अहंपि समग्गं तुम्ह समप्पेमि नियकोसं ॥११८८।। परबलसीहेण तओ विन्नत्तं सव्वमेव कुमरस्स । एयं तहं त्ति तेण वि कुबेरदत्तेण पडिवन्नं ।।११८९।। संकलबंधाओ तओ सपरियगो खसनरेसरो मुक्को। तेण वि आगंतूणं विणएणं पणमिओ कुमरो।।११९०।। कुमरेण वि नियहत्थो ठविओ हिट्ठण तस्स पट्टीए । दिन्नासणो निसन्नो अह सो कुमरस्स आसन्नो ।।११९१।। विनवइ जोडियकरो अवराहो एस मज्झ गरु वि । तुम्हे हिं एक्कवारं सुपसन्नमणेहि खमियव्वो ॥११९२।। अवराहविरहियाण वि तुम्ह मए जेण एरिसं विहियं । सोहं सरीरनिग्गहजोग्गो एमेव परिमुक्को ।।११९३।। तुम्हेहि गरुययाए निययाए तह वि अज्जपभिज्ञतो। आएसकरो तुम्हें संदेहो इह न कायव्वो ॥११९४॥ कुमरेण तओ भणियं कम्मवसेणं कथावि गरुयावि । मुझंति पकुव्वता कज्जाइं निउणमइणो वि ।।११९५।। अवराहज्जियाणं खमिज्जए जं न कि पितं चोज्जं । कयदोसस्स समत्थो जं खमइ गुणो स विन्नेओ ।।११९६॥ इय भणिऊणं तत्तो कुबेरदत्तेण निवकुमारण। आइट्ठा नियपुरिसा कारविओ मज्जणं तेहिं ।।११९७।। खसराया वत्थाई परिहावेऊण कुमरपासम्मि । आणिओ तेण समं सो भुत्तो गोरवेण तओ ॥११९८।। लद्धविलेवणतंबोलकुसुमसम्माणजणियमणहरिसो। सिलियावसरम्मि खणं ठाऊणं समुचियकहाए ॥२२९९।। कुमरेण अणुनाओ तेणं चिय दावियम्मि आवासे । गंतूण सो पसुत्ता खणंतरे पुण वि उट्ठ उं ।।१२००।। पासे कुबेरदत्तस्स एइ तं पुच्छिऊण निथपुरिसे। दोन्नि उ सिखविऊणं खसउरनयरम्मि पेसेइ १२०१।। गंतूण तेहि कहियं खसनरवइणो अमच्चमाईणं । जं खसराया मुक्को कुमरेण महापसाएण ॥१२०२।। तो तुम्हेहि न संका कायव्वा का वि इयरलोओ वि। सब्बो पलायमाणो निवारियव्वो पयत्तेण ।।१२०३।। कायव्वं सव्वं चिय पवणं कुमरस्स जेण पाहुन्नं । तत्थागयस्स कीरइ तेहिं तओ निसुणिउं एवं ॥१२०४।। तह चेव कयं सव्वं पुणो वि ते पेसिया दुवे पुरिसा। खसरायस्स समीवे अद्धपहे भेट्टिया तस्स ।।१२०५।। कुमरो कुबेरदत्तो थेवेहि दिहि खसउरे नयरे। संपत्तो पविसंते तम्मि को नयरलोएण ।।१२०६।। खसरन्नो आएसा महसवो सयलनयरमज्झम्मि । सचिवाइसव्वलोओ समागओ सम्मुहो तस्स ।।१२०७।। मंगलतूररवेहि कुबेरदत्तो पवेसिओ नयरे । तेहिं तओ सो दलै पुरिसोहं पडिनियत्तेउं ।।१२०८।। गिन्हइ नयरस्स बहिं आवासं वित्थडे पएसम्मि । भोयणजायं पेसइ तस्स खसो सपरिवारस्स ।।१२०९।। भुत्तम्मि तओ कुमरे करितुरयाई जमस्थि उवरियं । तं आणेउं सव्वं कुमरस्स खसो समप्पेइ ।।१२१०॥ भंडारं पि असेसं कुबेरदत्तस्स ढोयए पुरओ। देसं च सपुरगामं उग्गणए तस्स खसराया ॥१२११॥ कुमरो वि तं समग्गं गहिऊणं केत्तिएण दविणेण । तं करि-तुरगाईहि य सम्माणे पसाएण ।।१२१२।। तं चेव देइ देसं भिच्चत्तं तस्स संपवनस्स । सिरनिहियपाणिजुयलो महापसाओ त्ति भणिऊण ।१२१३।। पणमइ खसो नरिंदो पुणो वि पाएसु निवकुमारस्स । ठाऊण कइ वि दियहे तत्थेव तओ नियत्तेइ ।।१२१४।। कुमरो कुबेरदत्तो परबलसीहेण खसनिवेणं च । संजुत्तो नियदेसाभिमहो तुरियप्पयाणेहिं ।।१२१५।। पच्चासन्नो वच्चइ जेसि केसि पि सो नरिंदाण । ते पेसिति समग्गा वि पाहुडं तस्स कुमरस्स ।।१२१६।। एवं अच्चिज्जतो सयलनरिंदेहिं सो कमेण तओ। वित्थिन्नसेन्नजुत्तो सदेससीमाए संपत्तो ।।१२१७।।
Jain Education International
For Private & Personal Use Only
www.jainelibrary.org
| SR No. | 001564 |
| Book Title | Munisuvratasvamicarita |
| Original Sutra Author | Chandrasuri |
| Author | Rupendrakumar Pagariya, Yajneshwar S Shastri, R S Betai |
| Publisher | L D Indology Ahmedabad |
| Publication Year | 1989 |
| Total Pages | 376 |
| Language | Sanskrit |
| Classification | Book_Devnagari, Literature, & Story |
| File Size | 9 MB |