Page Text
________________
सिवकेऊचरियं
जइ एयं जाणेउं तुम्ह समीहा मणम्मि विप्फुरइ । तो सूरसाहुपासे मए समं एह लहु तुब्भे ।।८३१।। जह नाणदिणयरो सो संसतिमिरं हरेइ तुह सव्वं । तो भणइ विस्सभूई सुयं जहा लंघिओ सि तुमं ।।८३२।। ता कि पि भोयणं कुण इन्हि तु मए समं जह मुणिस्स । पासम्मि तस्स जामो तो पियरं भणइ सिवकेऊ ।।३३। पढम पि मए विहिया ताय पइन्ना इमा पुरा तुम्ह। जह किर वयगहणत्थं तुम्हेहि अहं अणणुनाओ॥८३४।। पाणीयं मोत्तूणं गिन्हिस्सं नेय सेसमाहारं । तो विस्सभूइविप्पो सुएण सह जाइ मुणि पासे ।।८३५।। सूर मुणी वि अणुन्नं गुरुणो गहिउं असोयसाहिस्स । तस्सेव अहे चिट्ठइ सिलानिविट्ठो तह च्चेव ।।८३६।। तो सिवकेउं दर्छ सूरमुणी भणइ भुवणतुंगपहुं । पढमं चिय गंतुणं वंदह तो सेस साह य ॥८३७।। सिवकेऊणा तह च्चिय तं वयणं सूरसाहुणो विहियं । थंभियकाओ व्व ठिओ थद्धो उण विस्सभूइदिओ ।८३८ । पच्छा आगंतूणं सूरमणि वंदिऊण सिवकेऊ । उवविठ्ठो तस्स पुरो हत्थुस्सेहं करेऊण ॥८३९।। उवविसइ विस्सभूई वि तत्थ तो जोडिऊण करजुयलं । सिवकेऊ भणइ मुणि पुरोहिओ एस मह जणओ।८४०। जीवाईण सरूवं तुम्ह समीवम्मि वंछए नाउं । तो गंभीरसरेणं सूरमुणी कहिउमाढत्तो ॥८४१।। अइवित्थरेण महया जीवाइसरूवमग्गओ तस्स । जीवाइणो पयत्था इहकहिया नव जिणिदेहि ।।८४२।। जीवा-जीवा पुन्नं पावा-सव-संवरा य निज्जरणा । बंधो मोक्खो य इमे विनायव्वा नव पयत्था ॥८४३।। इग-दु-ति-चउ-पंचिदिय-भेयाजीवा उ तत्थ पंचविहा । पढममिह बेमि इंदियनामा गिइमाणविसयाई ॥८४४॥ फासं रसणं घाणं चक्ख-सोयं च होति नामाइं। दविदिय-भाविदीयभेया दुविहं तमेक्कक्कं ॥८४५।। निम्वित्ती उवगरणं उभयं दविदियं मुणेयव्वं । बहिअंतो भएणं निव्वीत्ती वि हु दुहा नेया ।।८४६।। बहि निवित्ती सोइंदियस्स जह कन्न-सक्कुली पमुहा । तह चक्खुप्पभिईण वि निवित्ती नियनिया नेया ।८४७। अंतो निवित्ती पुण केवलि दिट्ठा अइंदिया नेया । सोइंदियस्स एसा कयं व कुसुमागिई होइ ।।८४८।। चक्खुस्स मसूरसमा घाणस्स अइमुत्तकुसुमसारिच्छा । रसणिदियस्स अंतो निवित्ती पुण खुरुप्पसमा ।।८४९।। नाणागारं फासिदियं तु वाहल्लओ य सव्वाइं। अंगुलअसंखभागं एमेव पुहत्तओ नवरं ।।८५०॥ अंगुलपुहत्तरसणं फरिसं तु सरीरवित्थडं भणियं । उवगरणं पुण नियनिय विसयग्गहणम्मि सामत्थं ।।८५१॥ जह छेयसत्ति असिणो जलणस्स व डहणसत्ति तह एयं । लद्धी तह उवओगो उभयं भाविदियं नेयं ।।८५२।। कम्मखओवसमो लद्धी तग्गयचित्तत्तणं तु उवओगो । जोयणबारसगाओ सदं सोइंदियं सुणइ ।।८५३।। रूवं पासइ चक्खू जोयणलक्खाओ साइरेगाओ । गंधं रसं च फासं जोयणनवगाओ सेसाई ।।८५४।। गिन्हति जहन्नेणं सविसयमंगुलअसंखभागाओ। चउइंदियाइं चक्खू पुण अंगुलसंखभागाओ ।।८५५।। एगिदिम्मि फासं बिइंदिए तं दुइज्जयं रसणं । तेइंदियम्मि तइयं नायव्वं होइ घाणं तु ।।८५६ ।। चउरिदिए चउत्थं चक्खू पंचिदियम्मि पंचमयं । नायव्वं सो सोइंदियमिन्हि इंदियपहू बोच्छं ।।८५७।। पुढवी-जल-जलणा-निल-तरुणो एगिदिया मुणेयव्वा। किमि-संख-जलूगा-लस-माइवहाई य बेइंदी॥८५८।। कुंथ-पिविलीय-पिसुया-जूया-उद्देहिया य तेइंदी । मच्छय-मसग-पयंगा-विच्चुय-भमराइ चउरिंदी।।८५९।। पंचिदिया य नारय-तिरिय-मणुस्सा-मरेहिं चउभेया । रयणप्पभाइ भेया सत्तविहा तत्थ नेरइया ।।८६०॥ रयणप्पह-सक्करपह-वालुयपह-पंक-धूमपहनामा । छट्ठी तमप्पहा तमतमप्पहा सत्तमी पुढवी ॥८६१।। थलयर-जलयर-नहयरभेया तिविहा हवंति तेरिच्छा । तत्थ गिलोइय-मूसग-गो-महिसाई य थलचारी ।८६२। कच्छव-मच्छा मयरा इच्चाई जलयरा बहुपयारा । हंस-वलाया-सारस-सुय-सारियपमुहनहचारी ।।८६३।।
Jain Education International
For Private & Personal Use Only
www.jainelibrary.org
| SR No. | 001564 |
| Book Title | Munisuvratasvamicarita |
| Original Sutra Author | Chandrasuri |
| Author | Rupendrakumar Pagariya, Yajneshwar S Shastri, R S Betai |
| Publisher | L D Indology Ahmedabad |
| Publication Year | 1989 |
| Total Pages | 376 |
| Language | Sanskrit |
| Classification | Book_Devnagari, Literature, & Story |
| File Size | 9 MB |