Page Text
________________
सिरिमुनिसुव्वयजिणिंदचरियं
सेसो सव्वो वि जणो नियनियअहिगारमायरउ एगो । कीरउ पमाणपुरिसो जस्सायत्तं वहइ ।।७३३।। रायालंकारो पुण कायव्वो तीए चेव पडिमाए। सहि वि पडिवन्नं तं वयणं तह कयं च तओ ॥७३४।। सूरो वि कंचणपुरे पेसेउं खेयरे कहावेइ । कोसलपुरवुत्तंतं सयं पडिक्खेइ तत्थेव ।।७३५।। छम्मासाणं अंते जयधम्मसुरो वि देइ उवओगं । रज्जम्मि तम्मि पुणरवि तो पेच्छइ तत्थ निय पडिमं ।।७३६॥ कारिज्जति रज्जं उवसंतमणो उवेइ तो तत्थ । पच्चक्खो होऊणं सराइजणं इम भणइ॥७३७॥ कोवो मए वि मुक्को संपइ जो कोवि तुम्ह पडिहाइ । सो कुणउ एत्थ रज्ज मह पडिमं ठवह अन्नत्थ ।।७३८।। सा पइदिणं पि रन्ना पूएयव्वा य पणमियव्वा य । तस्स कुणंतस्स इमं उवद्दवं नो करिस्ससामि ।।७३९।। सव्वेहि वि पडिवन्नं जयधम्मसुरस्स तं तहावयणं । आरोविऊण हत्थे सिरम्मि तह सो पणमिओ य ।।७४०।। सट्ठाणम्मि गओ सो जयधम्मसुरो अदंसणी होउं । मइसागरपमुहेहिं रज्जकए पत्थिओ सूरो ।।७४१।। तेण निसिद्ध एयं भणियं च अहं वयं करिस्सामि । तो भुवणपालपुत्तं जेट्ठ रज्जे ठवह तुब्भे ।।७४२।। तस्साएसेण तओ तेहि सुओ भुवणपालरायस्स । रज्जम्मि भुवणसीहो अहिसित्तो गुरुविभूईए ।।७४३।। विहियं वद्धावणयं सव्वेसु वि गाभ-नगर-देसेसु । सूरो तमणुन्नविउं वेयड्ढनगे सयं पत्तो ।।७४४।। कणयद्धयस्स वत्तं कहिउं कंचणउरम्मि नयरम्मि। विक्कमसीहं नामेण विनयसुर्य ठवइ रज्जम्मि ।।७४५॥ एत्थंतरम्मि पत्तो तत्थेव य भुवणतुंगमणिनाहो । पासम्मि तस्स गहिया सूरनरिदेण तो दिक्खा ॥७४६।। सिक्खियजइ किरिओ सो बारसअंगाइं पाढिओ गुरुणा। पुव्वाणं गुणणत्थं सोऽहं एत्थागओ इन्हि ।।७४७।। एत्तो पुरओ सुरभद्दचेइए चिट्ठए समोसरिओ । सूरी वि भुवणतु गो मम धम्मगुरू सपरिवारो॥७४८।। अह हरिसवसुन्भिज्जतबहलपुलओ मुणिं पणमिऊण। सिवकेऊ जंपइ सीसनिहियकरसंपुडो एवं ।।७४९।। भयवं! महापसाओ एस कओ अज्ज मज्झ तुम्हेंहिं । जं नियचरियं कन्नंतरम्मि पक्खित्तममयं व ।।७५० ।। संपइ पुणो पसायं काऊण पयच्छ पुवडिवन्नं । पव्वज्जं पहु मह सव्वदुक्खसंदोहनिद्दलणं ।।७५१।। अह भणई सूरसाहू गुरुम्मि संते समीवदेसम्मि । दाउं परस्स दिक्खा न कप्पए अम्ह सयमेव ।।७५२।। पुण भणइ माहणसुओ सूरमुणि तेसु तस्स वि समीवे । नियगुरुणो मं दिक्खेइ जह इमो कुणसु तह सिग्धं ।।७५३।। तो भणइ सूरसाहू जइ तं नियमाइ-पिउसमीवाओ। मं भाणसि जह एयं तुब्भे दिक्खेह मह पुत्तं ।।७५४।। तो सिवकेऊ पभणइ माइ-पिईणं अहं असुहगारी । गहियम्मि वयम्मि मए भविस्सए ताण मणतुट्ठी ।।७५५।। ता मा करेह संकं मह माइ-पिईण संतियं तुब्भे । दावेह वयं सिग्धं करेह मा एत्थ विक्खेवं ।।७५६।। तो सूरमुणी पभणइ पियराणं जइ तुमंसि असुहकरो । दाहिति झत्ति सदं तुह वयगहणम्मि तो ताई ।।७५७।। तो सिवकेऊ जंपइ भयवं जं कि पि आयसह तुब्भे । तं चिय मज्झ पमाणं इय भणिऊणं मुणि नमिउं ॥७५८।। नियमंदिरम्मि वच्चइ सूरो वि मुणी समुट्ठिउं तत्तो। गंतु गुरुणो साहइ तं वुत्तंतं दियसुयस्स ।।७५९।। तयणुनाओ पच्छा नियकरणिज्जेसु वावडो होइ । सिवके वि सगेहे गंतणं गरुयविणएण ।।७६०।। पणिवइऊणं अम्मा-पिऊण चलणेसु मउलियकरग्गो। विन्नवइ जहा तुब्भे अणुजाणह मं वयग्गहणे ।।७६१।। तं पडिभणंति ताई कुविधाइं जहा तुमं न याणासि । अप्पाणं एमेव य वयगहणमणोरहं कुणसि ।।७६२।। अन्ने च्चिय ते पुरिसा जेहि वयं कीरए सुधीरेहिं । ता चिट्ठसु तुन्हिक्को कि अप्पाणं विगोवेसि ? ।।७६३।। सिवकउणा पणियं अज्ज व कल्लो व तम्मि समयम्मि । भोयणमहं करिस्सं जम्मि तुमे मं विसज्जिहिह ।७६४।
Jain Education International
For Private & Personal Use Only
www.jainelibrary.org
| SR No. | 001564 |
| Book Title | Munisuvratasvamicarita |
| Original Sutra Author | Chandrasuri |
| Author | Rupendrakumar Pagariya, Yajneshwar S Shastri, R S Betai |
| Publisher | L D Indology Ahmedabad |
| Publication Year | 1989 |
| Total Pages | 376 |
| Language | Sanskrit |
| Classification | Book_Devnagari, Literature, & Story |
| File Size | 9 MB |