Munisuvratasvamicarita

SR No.: 001564
Original Sutra Author: Chandrasuri
Author: Rupendrakumar Pagariya, Yajneshwar S Shastri, R S Betai
Publisher: L D Indology Ahmedabad
Publication Year: 1989
Total Pages: 376
Language: Sanskrit
Classification: Book_Devnagari, Literature, & Story
File Size: 9 MB

Page 54

२१
सिवकेऊ चरियं तो जयधम्मभएणं निवासिणो विजयखेड-नयरम्मि । वणिया निहुयं निहुयं नीहरिऊणं गया सव्वे ।।६३६।। कोसलपुरम्मि तत्तो विन्नत्तो तेहि भुवणपालनिवो। नियदुत्थं तेण तओ ते भणिया कोमलगिराहिं ।।६३७॥ जह सच्चधम्मरन्ना सो देसो निययभाउणो दिन्नो । तस्स करेमि न तत्ति किरऽम्ह देसोवि होइ न सो।।६३८।। पुण विनत्तो वणिएहि तेहिं सो भुवणपाल-नरनाहो । जह अम्हे एत्थेव य नयरे इन्हि वसिस्सामो ॥६३९।। रना भणियं अम्हे न भणामो वसह नेयमावसह । जं कि पि तुम्ह रुइयं तं तुब्भे कुणह सयमेव ।।६४०।। जयधम्मो सोऊणं इयभणियं भुवणपालरायस्स । चितेइ निययचित्ते जह सो बीहेइ मह नूणं ॥६४१।। जं ल्हूसियम्मि गामे बलाहिए मारियम्मि वि न भणियं । किं वि मह सम्मुहं तेण नेय वणियाण रावाए ।६४२। गिन्हामि तस्स देसं तो हणिऊणं कमेण नीसेसं । इय निय कुविगप्पेहि पारद्धो घाइउं देसं ।।६४३।। नाऊण भुवणपालो राया वारेइ दूय-वयणेण । तं जयधम्मकुमारं सो जंपइ उज्जुयं नेय ।।६४४।। एयं पि तेण पुव्वं कस्स वि पासाओ अत्थि विनायं । जं सच्चधम्म-रन्ना नियरज्जं विजयधम्मस्स ॥६४५।। दिन्नं मरंतएणं हढेण गहियं तु भुवणपालेण। इय चिंतिऊण हियए सगव्वमिय जंपियं तेण ।।६४६।। मह पिउणो अहिगारो हढवित्तीए तए सयं गहिओ। तो तुह पासाओ अहं पि संपयं तं गहिस्सामि ।।६४७।। जयधम्मभणियमेयं गंतुं दूएण भुवणपालस्स । कहियं सव्वं तेणावि पेसियं सेन्नमइबहुयं ।।६४८।। तस्सुवरि तओ एसो दुविणयाओ ससेन्नपरिचत्तो। जयधम्मो बंधेउं सुहेण गहिओ निव-बलेण ॥६४९।। खित्तो गुत्तीए अहिलाहिआजाणुपूरिउ मुक्को । कइवयदिणाण अंते आणाए भुवणपालस्स ॥६५०।। मइसागरेण गंतु गुत्तीए कदिडऊण सो मुक्को। भणिओ य जाहि गहिऊण जीवियं नियमिओ दूरे ।।६५१।। अन्नह जइ तं नज्जसि मज्झम्मि ठिओ इमस्स देसस्स । ता नूण भुवणपालेण मारियव्बोसि दुक्खजुओ ॥६५२।। तो नट्ठो जयधम्मो पाणे गहिऊण दूरदेसम्मि । तेण वि गहिया दिक्खा पासंडीणं समीवम्मि ॥६५३।। उग्गं तवोविसेसं करेइ पंचन्ह-छन्ह-दिवसाणं । पज्जते पारेइ य जलखालिय-लुक्ख-भत्तेण ॥६५४।। जुवराय-पए ठविओ नियभाया भुवणपालराएण । नामेण विजयपालो तस्स य दिन्नो पसायएण ॥६५५।। देसो सो चेव य विजयखेडनयरस्स संतिओ सव्वो । जा पुव्वठिइ-निययासा दिन्ना विजयरायस्स ।।६५६।। सेसाण वि भाऊणं गामा दिन्ना विसेसओ बहुया। रायाणमणुन्नविउं गओ सदेसे विजयपालो ।।६५७।। नीओ य विजयसीहो सूरो वि य तेण अत्तणा सद्धि । अणुजाणावेऊणं महानरिदं भुवणपालं ।।६५८।। दिन्ना य उचियगामा तेसि दोन्हं पि तेण भाऊणं। मोत्तूण विजयसीहं रक्खत्थं विजयखेडम्मि ॥६५९।। सुरेण समं चलिओ साहेउं दुट्ठसीमसामंते । पच्छिमदिसाए पत्तो कुंडलसेले महाविसमे ॥६६०।। तक्कडयसंठिओ तेण साहिओ सबरकेउ सामंतो । गहिऊणं सव्वस्सं पुणो वि तत्थेव सो ठविओ।।६६१।। सूरेण भमतेणं कुंडलगिरि-परिसरम्मि रम्मम्मि । वेगवईनइ-तीरे नियडे घणवंसजालीए ।।६६२।। दिट्ठो लक्खणवंतो एक्को पुरिसो महीयले पडिओ। लोहमएहिं कीलेहि कोलिओ सव्वगत्तेसु ॥६६३।। नीणंतसोणिओ वण-मुहेसु करुणं कणंतओ सणियं । पुट्ठो सो सूरेणं उवसप्पेऊण करुणाए ॥६६४।। को भद्द! तुमं किं एत्थ आगओ केण तुह कयं एवं? । तेण भणियं महायस! जाली मज्झम्मि चिट्ठति ॥६६५।। दो ओसहिवलयाई खित्ताइ मए गवेसिउं ताई। आणेह तुमं सिग्धं तो पुटु तुह कहिस्सामि ।।६६६।। तो कुणइ तहा सूरो तो भणिओ तेण कीलियनरेण । सल्लुद्धरणीवलयं एयं संरोहणीवलयं ।।६६७।।