Page Text
________________
सिरिमुनिसुव्वयजिणिंदचरियं भोत्तूण तक्खणे च्चिय पभूयचउरंगसेन्नसंजुत्तो। कोसलनयराभिमुहो पयाइ अखलियपयाणेहिं ।।६०४।। वच्चंतस्स य मग्गे समागया तस्स सम्मुहा पुरिसा । ते कोसलनयराओ ओयरिऊणं हएहितो ॥६०५।। नमिऊण विजयधम्म कहति वियणम्मि तस्स वुत्तंतं । रन्नो मरणं रज्जे ठवणं तह भुवणपालस्स ।।६०६।। तं नियपुरिसेहितो वयणं सोऊण विजयधम्मो वि । सोयाऊरियहियओ ओयरिऊणं तुरंगाओ ॥६०७।। गंतूण रुक्खमूले महया सद्देण कुणइ अक्कंदं । तो परियणेण दिन्नो आवासो तस्स तत्थेव ।।६०८।। सो वि गणे गिन्हंतो जेट्रस्स सहोयरस्स नरवइणो। अक्कंदिऊण सुइरं नियपरिवारेण पडिसिद्धो ॥६०९।। तुन्हिक्को होऊणं महियलविणिहित्तसत्थरनिवन्नो । ठाऊण खणं परियणविन्नत्तो उट्ठिउं तत्तो ॥६१०।। गंतूण जलढाणे काऊणं मज्जणाइमयकिच्चं । आगंतुं आवासे चत्ताहारो सपरिवारो॥६११॥ तमहोरत्तं गमिउं बंधुसिणेहाणुसरणजायदुहो । परिवार-पत्थणाए बीयदिणे किं पि काऊण ।।६१२।। देहस्स उवट्ठभं दाऊण पयाणयं सपरिवारो। विणियत्तिऊण तत्तो संपत्तो विजयखेडम्मि ।।६१३॥ तत्थ वि जं करणिज्ज नायरजणदंसणाइयं किं पि । तं काऊण समग्गं तत्तो होऊण एगते ॥६१४॥ चिंतेइ कि इयाणि करणिज्जं मे पराभवगयस्स ? । अहवा मज्झ परिभवो न एस अन्नेण केणावि ॥६१५।। परिविहिओ किं तुमए सयमेव य अप्पणो कओऽभिभवो । जाणतेण वि निच्चं उवेक्खमाणेण सुयदोसे ।।६१६।। ता एत्थ रूसियव्वं नेय मए होइ कस्स विजयम्मि । अह कह वि रूसियव्वं तो नूणं अप्पणो चेव ।।६१७।। अहवा न अप्पणो वि हु रुसियव्वं किं पि जुज्जए एत्थ । भवियव्वयाणुरूवा सव्वस्स वि जायए बुद्धी ।।६१८।। ता एत्थ समाहाणं एमेवयमाणसम्मि कीरंतं । सुंदरयरमुवजायइ कएहि किं वहु वियप्पेहि ? ॥६१९।। अहवा निउणमईए चिंतिज्जतं इमंपि परिणामे । सुंदरयरं न होहि त्ति मज्झ पडिहासए चित्ते ॥६२०।। जह सच्चधम्मरन्नो मज्झ वि तह चेव आसि अइभत्तो। जो भुवणपालकुमरो सयावि नीसेसगुणनिलओ।।६२१॥ तेण जयधम्मदोसे मइसागरपरिहवाईए चित्ते । धरिउ नियपिउणो वि हु आणाभंग करेऊण ॥६२२।। मज्झ वि दक्खिन्नं उज्झिऊण जह रज्जमप्पणा गहियं । तह सो संभाविज्जइ जयधम्मस्स वि महाअसुहं ।६२३। इन्हि किं पि कुणंतो नूणं संपत्तगरुयसामत्थो । तम्मि समयम्मि काउं किं जुत्तं मज्झ हवई त्ति ? ।।६२४।। जइ समरसमारंभं करेमि सह भुवणपालनरवइणा। तह वि न जुत्तं अहवा जइ जयधम्मो हणिज्जंतो।।६२५।। कहमवि य उवेहिज्जइ तो होइ विसेसओ अजुत्तययरं । ता कीरंतं उभयं पि निव्वुइं न जणइ मणम्मि ।।६२६। तम्हा इमम्मि समए वयगहणं केवलं वि मोत्तूण । अन्नं न कि पि जुत्तं पडिहासइ मज्झ बुद्धीए ।।६२७।। इह लोगस्स वि दोसा परिचत्ता होंति दिक्खगहणेण । परलोयस्स वि कज्ज पसाहियं होइ एवं ति ।। ६२८।। इय निच्छिऊण हियए हक्कारेण कुमरजयधम्मं । तस्स कहेउं सव्वं कोसलपुरजायवुत्तंतं ॥६२९।। नियहिययाभिप्पायं साहइ जह सच्चधम्मविरहम्मि। तस्साणाचुक्कस्स य वय-गहणं चेव मह जुत्तं ।।६३०।। तो तुज्झ हियट्ठाए सिक्खवणं कपि संपयं देमि । अवहारिऊण सम्म अणुट्ठियव्वा इमा तुमए ॥६३१।। एत्तिय दियहाइं तुमं जह तहव ठिओऽऽसि कुमरभावेण । इन्हि अम्ह परोक्खे तए विणीएण होयव्वं ।।६३२।। नियपरिवारं नयरं देसं च जहा सुनीइमग्गेण । परिवालसि कायव्वं तहा तए सव्वकालंपि ।।६३३।। गंतूण कोसलपुरे पुवकए खामिऊण नियदोसे । सेवेयव्वो सययं महानरिंदो भुवणपालो ।।६३४।। इयदिन्नसयलसिक्खं जयधम्म ठाविऊण नियठाणे । लोइयदिक्खागहणं पकरेइ सयं विजयधम्मो ॥६३५।।
Jain Education International
For Private & Personal Use Only
www.jainelibrary.org
| SR No. | 001564 |
| Book Title | Munisuvratasvamicarita |
| Original Sutra Author | Chandrasuri |
| Author | Rupendrakumar Pagariya, Yajneshwar S Shastri, R S Betai |
| Publisher | L D Indology Ahmedabad |
| Publication Year | 1989 |
| Total Pages | 376 |
| Language | Sanskrit |
| Classification | Book_Devnagari, Literature, & Story |
| File Size | 9 MB |