Munisuvratasvamicarita

SR No.: 001564
Original Sutra Author: Chandrasuri
Author: Rupendrakumar Pagariya, Yajneshwar S Shastri, R S Betai
Publisher: L D Indology Ahmedabad
Publication Year: 1989
Total Pages: 376
Language: Sanskrit
Classification: Book_Devnagari, Literature, & Story
File Size: 9 MB

Page 45

१२
सिरिमुणिसुव्वयजिणिदचरियं नेमित्तियं भणावइ वारुयपासाउ जह तुममिहेव । चिट्ठज्जह खणमेगं जावय हक्कारयं एइ ।।३४५॥ नेमित्तिओ वि तं वारुयस्स वयणं तह त्ति मन्नेइ । अह वारुओ वि वच्चइ मंति-सुयस्साणुमग्गेण ।।३४६।। मइसागरो वि गंतु कुमरं आसणगयं पणमिऊण। दिन्नासणे निसीयइ अह कहइ इमं कुमारस्स ।।३४७।। भट्टो देसंतरिओ तुरियकई अज्ज तुम्ह पासम्मि । इन्हि समागमिस्सइ तो कुमरो भणइ कह एवं ।।३४८।। मंति-सुय ! तुमं जाणसि सो भणइ कहिस्समयमगंते। तो मइसागर-वज्ज कुमरो सेसं विसज्जेइ ॥३४९।। नियपासाओ तत्तो कहेइ मइसागरो पुरो तस्स । कुमरस्स जहा निसुयं केवलिय-समीवओ तेण ।।३५०।। कुमरो वि देइ सदं पुरओ मइसागरस्स तत्थ? । भणइ जहा सिर-पीडा कस्सवि कहिया मए नेय ।।३५१।। तह भुवणसिरीए विहु मह भज्जाए न मं वि मोत्तूण । अन्नस्स पुरो कहियं पिय-दासीए वि निय-सूलं ।।३५२।। एयं पि अइरहस्सं विन्नायं तेण जं असंदिद्धं । ता अन्नपि अन्नायं तस्सऽत्थि न कि वि इय भणिउं? ॥३५३।। तन्नाण-विम्हिय-मणो तो कुमरो धुणइ अत्तणो सीसं। पभणइ य मंति-पुत्तं तं केवलियं इहाणेहि ।।३५४॥ मइसागरेण भणियं तव्वयणं मिलउ ताव तइयं पि। भट्ट-समागम-विसयं पच्छा सो आणियव्बो त्ति ।।३५५।। एवं जपंताण वि मइसागर-भुवणपाल-कुमराणं । सो भट्ट-चंडपालो समागओ दार-देसम्मि ।।३५६॥ तो आगंतु कहिओ निव-तणयस्स दारवालेण । निवयमंतिसुएहिमिहो मुहं पेक्खियं तत्तो ।।३५७।। कुमरेण दारवालो तो भणिओ झत्ति मुयसु तं भट्ट । मुक्को समागओ सो कुमरं नमिउं निविट्ठो य ॥३५८ ।। कुमरस्स पुरो पढियाइं तेण पुव्वं कयाइं कव्वाइं। तो कुमरो निद्दिट्ठ अत्थे कारइ नवं कव्वं ॥३५९।। तेणेगम्मि वि अत्थे कयाइं नाणाविहाई कव्वाइं । तो तुट्ठो रायसुओ देइ पसायं बहुं तस्स ।।३६० ।। तो तं विसज्जिऊणं केवलियं देवगुत्तमाणेउं । मइसागरं निरूवइ कुमरो मइसागरो य पुणो ॥३६१।। तस्साणयण-निमित्तं निरूवए वारुयं नियं पुरिसं । सो तं गहिऊण खणेण एइ पासे कुमारस्स ॥३६२।। कय-समुचिय-पडिवत्ती तत्थ तओ देवगुत्त-केवलिओ। उवविट्ठो परिपुट्ठो कुमरेणं भुवणपालेण ॥३६३।। जह सच्चधम्म-रन्नो सुहासुहं कहसु सत्त-दिण-मज्झे। तेण कहियं पभाए तइए जामम्मि दिवसस्स ।।३६४॥ कमलसिरी नामेणं राय-कलत्तं विसूइया-वसओ। परलोगम्मि गमिस्सइ परम्भि दिवसे पुणो आसो॥३६५।। वारुयतुरयवलत्थो विच्छट्टो करिवरेण मत्तेण । दंत-मुसलेहि विद्धो पाविस्सइ जीवियविणासं ।।३६६॥ एत्तो चउत्थ-दियहे मत्ताणं करिवराण दोन्हं पि। होही जुझं तत्थ वि एगो दंताण घाएण ।।३६७।। पीडिज्जिस्सइ बहुयं घायदिणाओ य अट्ठमे दिवसे। सो वि गमिस्सइ निहणं इय भणिउं उवरए तम्मि ॥३६८॥ सो कुमरेणं भणिओ इह केण वि नज्जसे तुम नाणी । तेण भणियं न को वि हु अन्नो पुरिसत्तियं मोत्तु ॥३६९।। तो कुमरेणं भणियं तिन्नि नरा के तुमं वियाणंति? । सो भणइ तुम एक्को मंति-सुओ वारुओ तइओ ॥३७०॥ कुमरेण तओ भणियं पयासियव्वो तए न कस्सवि य । अन्नस्स पुरो अप्पा जहा महं कि पि जाणामि ।।३७१।। तो तेण देवगुत्तेण चिंतिय-नियमणम्मि एरिसयं । जह अन्नेण न कज्ज किं चि वि जाणाविएणं मे ॥३७२।। एत्तो चिय जं लाभो संपज्जस्सइ जहिच्छिओ मज्झ । तो भणियं कुमरपुरो तुम्हाएसो पमाणं मे ।।३७३।। मइसागरेण भणियं वारुयमवि वारइस्समन्नस्स । एयं कहेंतमह्र सयं पिन कहिस्समवरस्स ।।३७४।। किं तु पसिऊण अम्हं कुमार! पुच्छसु इमस्स पासम्मि । रन्नो आउपमाणं तो पुट्ठो सो कुमारेण ।।३७५।। साहेइ दोन्नि वरिसे आउक्खं अत्थि सच्चधम्मस्स। मइसागरेण पुठं राया होही इमो कुमरो ? ॥३७६।।