Page Text
________________
१९८
सिरिवम्मकुमारचरियं उत्तर सयम्मि इहो कयसंकेएहि तेहिं पुव्बंपि । ज्झत्ति पउत्तं अम्हे कालवलीगामवत्थव्वा ।।६३५७।। कोडुबिया नमसणहेउं वज्जाउहाए देवीए। आसि गया तत्थ तओ दिट्ठो सिरिवम्मवरकुमरो॥६३५८।। पेच्छणयं कारेतो ठिया तओ तत्थ चेव सयलदिणं । रयणि च एत्तियं इक्खमाणया कोउयवसैण ॥६३५९।। संपइ पुण उग्घडियं पेच्छणयं निग्गओ जणो सब्बो। देवीपुराउ तत्तो सिरिवम्मो रायकुमरो य ।।६३६०।। निययावासे पत्तो चलिया अम्हे वि नियगिहाभिमुहा। मुंचह कुणह पसायं जह वच्चामो नियग्गामे ।।६३६१।। मुहरक्खएहि भणियं कह मुंचामो महंतरयणीए । को जाणइ के वि तुमे चोरा जारा व बंदी वा ॥६३६२।। गामेल्लएहि भणियं तुम्हाणं पच्छिमेहि पुरिसेहिं । ठाणंत रट्ठिएहि मुक्का अम्हे कहियवत्ता ॥६३६३।। तुम्हे कह नो मुंचह एगस्स वि ठक्कुरस्स पडिबद्धा । सेवगपुरिसा होउं नरसीहनरेहि तो भणियं ।।६३६४।। को सो एगो च्चिय अम्ह ठक्कुरो तो भणंति गामेल्ला । सिरिवम्मो वरकुमरो तुम्ह न कि ठक्कुरो एसो।।६३६५।। नरसीहनरेहि तओ पडिवन्नं धुत्तिमाए तव्वयणं । सोच्चिय अम्ह वि सामी किं तु विभिन्नम्मि ठाणम्मि ।।६३६६।। तेण वि मुक्का अम्हे चिट्ठामो तो न जाव विनायं । सम्मं अम्हेहि सयं ताव कहं उवरिमे पुरिसे ।।६३६७।। पत्ते गुरुरयणीए एमेव विसज्जिमो तओ तुम्हे । चिट्ठह मुहत्तमेगं तो साहेउं वि मुँचामो ॥६३६८।। इय भणिऊणं एगो पुरिसो नरसीहदंडवइपासे । गंतूण तव्वइयरं साहइ सो बेइ जह तेसि ॥६३६९।। पच्छाहुत्तं गंतुं दायव्वं नेय न विय नियपासे । धारेयव्वा सुइरं एए अन्नह कुणेमाणा ॥६३७०।। वड्डेणं सद्देणं कोलाहलमियरभूरिलोयस्स । जाणाविस्सति तओ न कज्जसिद्धी हवइ अम्ह ।।६३७१॥ पुरओ वोलावेउं पेसह सिग्धं पि जा न जाणंति । अम्ह सरूवं किंचि वि एए गामेल्लया पुरिसा ॥६३७२।। अह नरसीहाणाएसो पुरिसो सिग्घमेव आगंतु । ते गामेल्ले सव्वे तह चेव विसज्जए निहुए ॥६३७३॥ एत्तो जे नरसीहेण दंडनाहेण आसि वि णिउत्ता । पुव्वं पुरिसा सिरिवम्मसुद्धिपरियाणणनिमित्तं ॥६३७४।। तेसि खणं पडिक्खणकए निवन्नाण वियणट्ठाणम्मि । निद्दा समागया जग्गियं तओ तेहिं सविलंबं ।।६३७५।। अह ते सिग्धं पि गया वज्जाउहदेवि पुरबहि जाव । ताव न पेच्छणयझुणि सुणंति न जणोहनिग्योसं ।। ६३७६।। तो ते पओलिदारे कवाडपिहियम्मि नियडया होउं । पुच्छंति दारवालं दारभंतरठियं एवं ।।६३७७।। जह सिरिवम्मकुमारो मज्झाओ निग्गओ तओ तेण। कहियं सो नीहरिउं इओ गओ एत्तियखणेण ।।६३७८।। नियठाणम्मि वि पत्तो संभाविज्जइ तहा पसुत्तो य । इय सोउं ज्झत्ति नियत्तिऊण ते पच्छओ गंतुं ।।६३७९।। नरसीहदंडवइणो तम्मग्गनिहालणं कुणंतस्स । साहति जहादिळं निसुयं च पओलिपुरिसाउ ।।६३८०।। तं सोउं नरसीहो चलिओ सिरिवम्मसंमुहो ज्झत्ति । गामेल्लया वि पुरिसा मुक्का नरसीहपुरिसेहि ।।६३८१।। सिग्धं चिय गंतूणं सन्नद्धबलस्स जोगरायस्स । पुरओ साहेति जहा सिरिवम्मकुमारसिक्खाए ।।६३८२।। एवं एव अम्हे समागया एत्थ तुम्ह पासम्मि । इह तेण तुहाइटें जह सेन्नं खेमरायस्स ।।६३८३।। आगंतूण मए सयमहिट्ठियं चिट्ठए करिबलेण। जम्मि खणे तं पाससि अम्ह बले दीविउज्जोयं ।।६३८४।। सुणसि रणतूरसदं गरुयं बंदियणपढणनिग्धोसं। तम्मि खणे जाणेज्जा जह जुझं चिट्ठए होतं ।।६३८५।। तो सुंदरेण कहियं अम्हा एवं तुमं करेज्जासि । एवं कहिऊण ठिया चिळंति इमे खणं जाव ।।६३८६।। ता तक्खणे पुरा जोगरायपट्ठवियहेरियनरेहिं । आगंतुणं कहियं नरसीहबलं पुरो चलियं ।।६३८७।। तो तयणुमग्गलग्गो नियसेन्नसमनिओ सउच्छाहो। संचलइ जोगराओ पत्तो नरसीहसेन्नम्मि ।।६३८८।।
Jain Education International
For Private & Personal Use Only
www.jainelibrary.org
| SR No. | 001564 |
| Book Title | Munisuvratasvamicarita |
| Original Sutra Author | Chandrasuri |
| Author | Rupendrakumar Pagariya, Yajneshwar S Shastri, R S Betai |
| Publisher | L D Indology Ahmedabad |
| Publication Year | 1989 |
| Total Pages | 376 |
| Language | Sanskrit |
| Classification | Book_Devnagari, Literature, & Story |
| File Size | 9 MB |