Page Text
________________
१४२
सिरिचंदकित्तिचरियं
माणसदुक्खोवहया विदंति रइं न कत्थ वि कया वि । अरईए घणकम्मं बंधंति तओ भमंति भवं ।।४५७२। रज्जे वि होइ लोभो केसि पि हु माणमारुहंताण । तमपाबंता तो ते हवंति कोहानलुज्जलिया ।।४५७३।। अपहुप्पंता पच्छा मायाए पविसिऊण मज्झम्मि । वीसासेऊण तओ हणंति पियरं पि भायं पि ।।४५७४।। विहवज्जणे वि इच्छा गरुई पाएण माणवंताण । संजायइ पुरिसाणं चितंताणं मणे एवं ।।४५७५।। अन्नेहितो अम्हे विउलसिरीया कहं पि जइ होमो। तो गरुयविहविणो वि हु अम्हं चिय एंति पासम्मि ।।४५७६।। सम्माणपयं होमो अम्हे च्चिय रायपमुहलोयाणं । पत्तसिरीया पच्छा इच्छंति पराण हीणतं ।।४५७७।। पेच्छंति उच्छलतं अन्नं जइ निययपुन्नजोएण । इच्छंति तस्स विग्घं काउं वि विहप्पयारेहिं ।।४५७८।। पूयाए विहवस्स य तं काउं कह वि जइ न पारेति । तो देहस्स वि चुक्कंति तस्स केणइ उवाएण ।।४५७९।। तो रन्ना विनाया खणेण पाविति बंधणं तत्तो। सव्वस्सस्स विहरणं लहंति जीवियविणासं पि ।।४५८०।। जइ को वि कह वि किंचि वि कया वि कहियं करेइ न खणण । ता तम्मि कूणइ कोवं माणीमण्ओ मणे को वि गरुए वि हु निय कज्जे जायम्मि न जाइ तस्स पासम्मि । गरुयस्स वि बहुजणमाणणिज्जवयणस्स वि जयम्मि अवलेवकलुसियमणो तस्स य गिन्हेइ दूसणसयाइं । जस्स वि तस्स वि पुरओ अविज्जमाणाई विसया वि।।४५८३।। जइ सो गरुओ जाणइ गरुयमवायं करेइ तो तस्स । असमाणविग्गहं पि हु कुणंति इय माणिणो मणुया ।।४५८४।। इह लोगम्मि वि लहिउ दुक्खाण परंपराउ परलोए । नरगाईणं दुक्खाण भायणं होंति सययं पि ।।४५८५।। एत्यंतरम्मि चिंतइ नियचित्ते कणयचूडखयरिंदो। अम्ह वि अणुगयमेयं संजायं कि पि वक्खाणं ।।४५८६।। अम्ह सुयस्स न दिन्ना पभावई पत्थिया वि अम्हेहिं । जं रयणचूडरना तेण हिमाणेण न मए वि ॥४५८७।। दिन्ना इच्छंती वि हु कणगवई रयणचूड-पुत्तस्स । तीसे हरणम्मि तहा न चिंतियं अप्पसामत्थं ।।४५८८।। अहिमाणगहग्धत्थेण तेण सह संगरोसमारद्धो । तस्सऽहिमाणस्स फलं इहेव ता अम्ह निव्वडियं ।। ४५८९।। पुण भणइ गुरूअहिमाणसोक्खकखाण दुक्खमियकहियं । विसयमुहत्थीण दुहं वन्निज्जइ कि पि इन्हितु ।।४५९०।। विसय-सुह-लंपडाणं दुल्लह-इत्थी-जणे वि अहिलासो । संजायइ अलहंता तं ते झिज्जंति हिययम्मि ॥४५९१ ।। अह कहमवि मोहवसा तत्थ पयट्टति हलविहाणेण । पावंति तो अणत्थं पाणाण वि केइ चुक्कंति ।।४५९२।। परलोयदुहं पुवुत्तमेव पावंति नियमओ ते वि। एवं सोक्खमईए जीवा दुक्खे पयर्टेति ।।४५९३।। एयम्मि अंतरे कणयकेउकुमरो वि चितए एवं । अम्हं पि समचिया कि चि देसणा एस संजाया ॥४५९४।। जमणिच्छंतीए वि हु पभावईए मए उवरिरागो । बद्धो अलहंतोहं तओ इमं हरिउमारद्धो ।।४५९५।। तो पत्तपरिभवो वि हु अहिमाणाओं तहाणुरायाओ । न ठिओ तुन्हिक्कोहं काउमवायं पुण पयट्टो ।।४५९६।। कणगवई हरणे पुण जणएण वि मणे चितियं किं पि । अहिमाणग्गहिएणं फलंतओ तस्स उवलद्धं ।।४५९७।। भणइ गुरू ता अहिमाण-विसय-सोक्खाउ नियमणं झत्ति । विणियत्तेउं देयं परमत्थसुहम्मि विवहेहि।।४५९८।। तं पुण परमत्थसुहं मोक्खम्मि गयाण गम्मए मोक्खे। कम्मक्खएण सोउण कम्मखओ होइ दिक्खाए ।।४५९९।। दिक्खं पि कुणताणं विसय-विरत्ताण माण-मुक्काण । मोक्ख-समाणं सोक्खं संभवई इहेव जीवाण ।।४६००॥ तो कणयचूडराया स कणयकेऊ वि उट्ठिउं गुरुणो । बंदेइ भणइ य इमं कीरउ दिक्खा पसाओ मे ।।४६०१।। पुव्वं पि ताव चित्तं विसय-विरत्तं ममासि गिहवासे । तुम्होवएस-सवणा जाओ पुण संपइ विसेसो ॥४६०२।।
Jain Education International
For Private & Personal Use Only
www.jainelibrary.org
| SR No. | 001564 |
| Book Title | Munisuvratasvamicarita |
| Original Sutra Author | Chandrasuri |
| Author | Rupendrakumar Pagariya, Yajneshwar S Shastri, R S Betai |
| Publisher | L D Indology Ahmedabad |
| Publication Year | 1989 |
| Total Pages | 376 |
| Language | Sanskrit |
| Classification | Book_Devnagari, Literature, & Story |
| File Size | 9 MB |