Page Text
________________
सिरिमुनिसुव्वयजिणिदचरियं
१४१ गिहवासगिद्धचित्ताण रज्जवंछाउ होंति एयाउ । विसयविरत्ताण पुणो रमइ मणो संजमे चेव ।।४५४०।। तं होसि अम्ह ससुरो जणओ व्व तओ पुरा वि नमणिज्जो। संपइ विसेसओ पुण सिरस्स उवरि वयकइच्छो ।। जो अम्ह सालओ कणयके उकुमरो न सो वि हासस्स । ठाणं संपइ कि पुण गोरविओ जेटुबंधु व्व ॥४५४२।। एयं पि तुम्ह ठाणं अप्पणयं चेव जत्थ अप्पणओ । जामाऊ दिक्करिया वसेइ भइणी य भइणिवई ।।४५४३।। ता चिट्ठह वीसत्था एत्थेव य ताव जाव इह एइ । ता य गुरूगुणभद्दो अबहिन्नाणी मुणिप्पवरो ॥४५४४।। तुम्हाण वंछियत्थं पच्छा सव्वं पि पूरइस्सामि । संपड ण्हाणाईयं करेह ता अवसरप्पत्तं ।।४५४५।। तो उट्ठिऊण मणिचुडवयणसवणंतरं पिया-पुत्ता। मज्जणहरं पविट्ठा न्हाया ते दो वि वित्थरओ ।।४५४६।। तह गरुयगोरवेणं कराविया भोयणं विलेवणयं । दिन्नं तंबोलं तह कुसुमाहरणं तु न गिहीयं ॥४५४७।। अइबहुयपत्थणाहि वि विइज्जमाणं निरीहभावेणं । तो अहिययरं जाओ मणिचूडो तेसु अइभत्तो ॥४५४८।। एवं चिट्ठताणं निम्मलभावाण ताण तत्थ तओ । उज्जाणे संपत्तो गुणभद्दो नाम वरसूरी ।।४५४९।। नाऊणं तं समागयमइपहरिसवसविसट्टरोमंचो । मणिचूडखेयरिंदो जाणावइ कणगचूडस्स ॥४५५०॥ आयन्निऊण कन्नामयं व तो सूरिणो समागमणं । सो वि सपुत्तो जाओ आणंदुच्छलियघणपुलओ ॥४५५१।। तो कणगचडरायं सकणगकेउं पि पत्थणा पूव्वं । कारवए सिंगारं पवरं मणिचडखरिदो ।।४५५२।। वीइज्जतो सियचामरेहिं सिरधरियधवलवरछत्तो। आरूढो मत्तमहागयम्मि कयपवरसिंगारो ।।४५५३।। रायं तु कणयचूडं आरोवेउं महागइंदम्मि । अइगरुविभूईए काऊणं अप्पणो पुरओ ॥४५५४॥ अन्नम्मि तहावरबारणम्मि आरोविउं कणयकेउं । काऊण अप्पणो तं दाहिणभाए विभूइजुयं ।।४५५५।। परियरिओ सव्वत्तो तत्तो चउरंगिणीए सेणाए । संपत्तो उज्जाणे ओयरिउं करिवराओ तओ ।।४५५६।। मणिचूडखेयरिदो संजुत्तो कणयचूडनरवइणा । तह कणयकेउणा वि य भत्तीए नमइ तं सूरि ॥४५५७।। सेसं पि साहुवग्गं नमिऊण कमेण सूरिपासम्मि । आगंतुं उवविट्टा पुच्छंति य रयणचूडस्स ॥४५५८।। मुणिणो सरूवमक्खेइ मणिवरो तेसिमग्गओ सव्वं । पढम चिय गहियवओ जाजीवं अणसणं कुणइ ।।४५५९॥ पढिऊण केत्तियं पि हु सामायारि जईण जाणेउं । कुणइ जहोइयकिरियं विणयं तह सव्वसाहूणं ।।४५६०॥ वेयावच्चं च तहा बालाईणं समुज्जओ कुणइ । निच्चुज्जम्मिउ सज्झाए खणे खणे अभिरओ होइ ।।४५६१।। कुणइयकाउस्सग्गं धम्मज्झाणं झियाइ तत्थ टिओ। तस्स कुणंतस्सेवं गयाइं अट्ठारसदिणाई ।।४५६२॥ एगे गूणे वीसइम वासरे रयणचूडसाहुस्स । सोहम्मे संजायं समाहिपत्तस्स देवत्तं ।।४५६३॥ तं सोऊणं मणिचुडखेयरिंदस्स माणसे जाओ। कि पि विसाओ तह पहरिसो य अह सूरिणो पासे ।।४५६४।। सो पुच्छइ जिण-धम्म गंभीरसरेण कहइ सूरी वि । संसारे जे जीवा सुहेसिणो ताव ते सव्वे ॥४५६५।। जाणंति सुहोवायं नेव परं किपि तं पकुव्वंति । ते कम्मं मोहवसा जेणाणुहवंति दुक्खाई ।।४५६६।। जम्हा नट्ठविवेया जं चिय दुक्खं मुणंति तं चैव । सोक्खस्स सरूवेणं परमत्थसुहं अयाणंता ।।४५६७।। कोहो माणो माया लोभो चत्तारि हुँति हु कसाया। तग्गहियाणं जायइ विवज्जओ तेण जीवाणं ।।४५६८।। माणकसाओ अहिओ मणुएसु कहिज्जए जिणिदेहि। तब्बसगया य मणुया हवंति सेल ब्व अइथड्ढा ।।४५६९।। नमणारिहेसु विनयं कुव्वंति न किंतु अत्तणो चेव । कीरंतं पणिवायं सव्वेहिं वि ते समीहंति ।।४५७०।। पच्छा केण वि बलवंतएण तो तेसि भज्जए दप्पो । पडिभग्गदप्पपसरा लहंति बहुमाणसं दुक्खं ।।४५७१।।
Jain Education International
For Private & Personal Use Only
www.jainelibrary.org
| SR No. | 001564 |
| Book Title | Munisuvratasvamicarita |
| Original Sutra Author | Chandrasuri |
| Author | Rupendrakumar Pagariya, Yajneshwar S Shastri, R S Betai |
| Publisher | L D Indology Ahmedabad |
| Publication Year | 1989 |
| Total Pages | 376 |
| Language | Sanskrit |
| Classification | Book_Devnagari, Literature, & Story |
| File Size | 9 MB |