Page Text
________________
सिरिमुनिसुव्वयजिणिदचरियं
१२९ इय भणिऊणं मुक्काइं तीए अंसूणि झत्ति नयणेसु । नायं तओ मए जह सज्झं पिउणो न मे कज्जं ।।४१४८।। तेणेसा मह जणणी मिलाणमुहपंकया पयंपंती । मुयइ नयणंसुवायं अइरित्तदुहं मुयंति व्व ।।४१४९।। तो जइ अहं विसन्नं अप्पाणं कहइ दंसइस्सामि । पईए तो होही अइदुहिया मह दुहेणेसा ॥४१५०॥ संवरिऊणागारं तो जंपेमि तहा जहा एसा । संतं पि मज्झ विसए झडत्ति दुक्खं परिच्चयइ ।।४१५१।। इय चितेऊण मए भणिया जणणी पसन्नवयणाए। मा अम्मो ! मज्झ कए मणं पि खेयं मणे वहसु ॥४१५२।। अंबाए तायस्स य न होइ दोन्हं पि जं कुणताण । तेण विणा वि सरिस्सइ अट्टेण मणोहरेणा वि ॥४१५३।। सोऊण मज्झ वयणं एयं जाया खणेण मह जणणी। निव्वुयहियया तत्तो पयडइ मह ताय सब्भावं ।।४१५४।। जंपइय तहा एवं वच्छे ! लट्ठ तए कयं एयं । जं नियचित्तं तत्तो ठाणाउ नियत्तियं झत्ति ।।४१५५।। जम्हा पभावईए विसयविरत्ताए दुल्लहो लंभो। तयभावे तुज्झ समीयिं पि मन्ने असज्झं ति ।।४१५६।। दोन्हं पि तुम्ह भइणी भाऊणं संतियं ममासि दुहं । तत्थ तुह विसयमिन्हि मज्ज्ञ मणाओ गयं दुक्खं ।।४१५७।। संपइ भणेमि तायं तुज्झ जहा सो गवेसए अन्नं । अणुरूवं कं पि वरं जो तं सिग्धं पि परिणेइ ॥४१५८।। भणिया मए सजणणी तओ जहा मज्झ परिणयचितं । मा कं पि कुणह तुब्भे मह भाया हवउ नीरोगो।।४१५९।। ताव तओ नीसेसं भविस्सए सुंदरं मम न खूणं । इय मह वयणं सोउं गया सठाणं तओ जणणी ।।४१६०।। तयणंतरं तु मणिचूडसंगमोवाचितणसयन्हा । जाया दुहजलहिनिमग्गमाणसा सब्वहा वि अहं ॥४१६१।। किं तु निगढायारं न को वि जाणे इमं बहिं अन्नो। बंधुदुहदुक्खिया वि हु गया न तव्वत्तपुच्छत्थं ॥४१६२।। मोत्तुं तुम न अन्ना सहियणमज्झम्मि तारिसी अत्थि । जा कणयकेउपासे पेसिज्जइ पुच्छिउं वत्तं ॥४१६३।। आमि तुमं पुण पगया सुरही गामम्मि भाइणेज्जीए । सीयाए संबोहणहेउं नियपइपरट्ठाए ॥४१६४।। तत्थेव तओ लग्गाइं तुज्झ दियहाई कइवयाई पि । अहम वि ठिया पियंकरि पडिवालेंती तुहागमणं ।।४१६५।। जं वेलं विन्नाया तुमं मए एत्थ आगया अम्मो। तक्कालेच्चिय हक्कारिऊण पट्टावियासि लहुं ॥४१६६।। पासम्मि कणयकेउस्स भाउणो पढममेव तो पच्छा। इन्हि नियं सरूवं मए पुरो तुज्झ अक्खायं ॥४१६७।। ता कणयकेउकज्जम्मि पट्ठिया संपयं तुमं अम्मो । मज्झ वि साहिज्जसु निच्छएण कज्ज गया तत्थ ।।४१६८।। अह सा जंपइ एयं अज्ज तए साहियं जओ मज्झ । अहमवि तओ तुह पुरो कहेमि सव्वं ससब्भावं ।।४१६९।। तुह जणणीए सुरहीगामे संपेसिऊण नियपुरिसं । हक्कारिऊण मं एत्थ अक्खियं अज्ज रयणीए ।।४१७०।। मह पुरओ नीसेसं तुज्झ सरुवं तओ पभायम्मि । तुह वयणेण गयाहं समीवओ कणयकेउस्स ॥४१७१।। सोऊण तस्स वयणं तक्कज्जं साहिउं कयमणाए । तुज्झ वि कज्जं काउंमए मणे धरियमिणमासि ॥४१७२।। इन्हि तु विसेसेणं तुह कज्जे उज्जमं करिस्सामि । जं नियमुहेण तुमए एत्तियमब्भत्थिया हं तो ॥४१७३॥ मुत्ताहारं कंतं एवं गुणसंगयं निए कंठे । कुण एरिसाण सुपुरिसजए वि उचिओ तुमं चेव ॥४१७४।। एयाए गाहाए जुत्तं हारं समप्पिउं तीसे । पासे पियंकरीए कणगवई तं विसज्जेइ ॥४१७५।। भणइय तह तेण तया अहं पि दिट्ठा सिणिद्धदिट्ठीए । तो पडिवज्जिस्सइ सो तुह विन्नत्ति न संदेहो ।।४१७६।। इय कणगवई सिक्खं गहिउं हारं च सा पियंकरिया । जा संचलिया पासे तूरंती कणयकेउस्स ।।४१७७॥ मग्गम्मि ताव दिट्ठो एंतो सो सच्चओ तओ तीए । एगते नेऊणं भणिओ जं मे कहह सव्वं ॥४१७८।। आसि तया तं पासे खयरकुमारस्स कणयकेउस्स । सिद्धाययणम्मि जया पभावई तेण सा दिट्ठा ।।४१७९।। तीसे भावो नाओ को वि तए कणयकेउणो उवरि । तेण भणियं तया हं पासठिओ चेव चिट्ठतो ।।४१८०।।
Jain Education International
For Private & Personal Use Only
www.jainelibrary.org
| SR No. | 001564 |
| Book Title | Munisuvratasvamicarita |
| Original Sutra Author | Chandrasuri |
| Author | Rupendrakumar Pagariya, Yajneshwar S Shastri, R S Betai |
| Publisher | L D Indology Ahmedabad |
| Publication Year | 1989 |
| Total Pages | 376 |
| Language | Sanskrit |
| Classification | Book_Devnagari, Literature, & Story |
| File Size | 9 MB |