Page Text
________________
सिरिमुनिसुव्वयजिणिदचरियं
१२५
तुह पायाणं सरणं पत्ताहं संपयं तओ भणसि । जं कि पि तुम तमहं करेमि इह संसओ नत्थि ।।४०१७।। नीया पवत्तिणीए सुमंगलाए इमा तओ झत्ति । पासम्मि नियगुरूणं कल्लाणनिहाणनामाणं ।।४०१८।। तेहिं वि दिन्ना दिक्खा नाऊणं समणधम्मजोगत्तं । तीसे कयं च नामं सुनामियज्ज त्ति तो नमिउं ।।४० १९।। कल्लाणनिहाणगुरुं पवत्तिणीए समं गया वसहिं । गहिऊण तओ सिक्खं दुविहं पि करेइ पवरवयं ।।४०२०।। अह सा सुनामियज्जा सुमरंती गिहनिवासदुक्खाइं। निरवज्ज कुणइ वयं सव्वज्जाणं पि बहुविणयं ।।४०२१।। कइवयदिणपज्जते कल्लाणनिहाण मुणिवरिंदस्स। लोयालोयपयासं उप्पन्नं केवलं नाणं ।।४०२२॥ मिलिया बहवे देवा केवलिमहिमं करेंति तो तस्स । तेहिं कयकणयकमले उवविट्ठो कहइ सो धम्मं ।।४०२३।। बंधंति जहा कम्म मिच्छत्ताईहिं कारणेहि जिया । तव्वसगया य जह ते सहति नरगाइसु दुहाई ॥४०२४।। जह सुहगुरु संजोयं लद्धणं पत्तनिम्मलविवेया । खविऊण कम्मजालं लहंति ते मोक्ख-सोक्खं च ।।४०२५।। सा वि हु सुनामियज्जा सुमंगलाए पवत्तिणीए समं । तस्स अभिवंदणत्थं तत्थ गया देसणं सुणइ ।।४०२६।। लद्धावसरा पुच्छइ सुनामियज्जा पवत्तिणि मुहेण । कम्मेण जेण जायं बहु दुक्खं मे गिहत्थाए ।।४०२७।। तो केवलिणा भणियं पए पए दुक्खकारणं कम्मं । बंधतो च्चिय चिट्ठइ रागद्दोसाणुगो जीवो ।।४०२८॥ पुव्वभवे पुण तुमए गहियाए अइमहंतईसाए । उत्तारियाई पइपरियणस्स चित्ताई मायाए ।।४०२९।। ससवक्कीए मोहिणिनामाए उवरिसा तओ तेसिं । जायारो सट्ठाणं तुमं पहिट्ठाय तं दटुं ।।४०३०।। सब्बो वि एस अत्थो सवित्थरो तेण अग्गओ तीसे । परिकहिओ केवलिणा सा तं सोऊण नीसेसं ।।४०३१।। संजायजाइसरणा गुरुसंवेगं गया नियमणम्मि । पुण केवलिणा भणिया जइ पव्वज्ज न गिन्हंती ।।४०३२।। इह जम्मे तं भट्टे! तो अज्ज वि कम्ममेयमइबहुयं । जम्मंतरेसु देंतं तुह दुक्खं दारुणविवागं ।।४०३३।। हासेण वि जं जीवो कम्मं बंधेइ तं पि दसगुणियं । देइ फलं जं च पुणो बज्झइ घणरागदोसेहिं ।।४०३४।। तस्स विवागो जम्मतराण बहुयासु कोडकोडीसु । समइक्कंतासु विनेयपावए कहमविसमत्ति ।।४०३५।। तं सोऊणं भीया सुनामियज्जा मणे वि चितेइ । दुल्लहसामग्गि पाविऊण एयं इह भवम्मि ॥४०३६।। एएणं चिय देहेण पुवकम्माइं सव्व सत्तीए । काऊण तवं घोरं खोडेमि पुणो वि को मुणइ ॥४०३७।। जम्मंतरम्मि एसा सामग्गी जायए न वा अम्ह । ता संपयमप्पाणं छोडेमि इमाउ कम्माओ ॥४०३८।। इय चितिऊण तीए विन्नत्तो केवली जहा भयवं! । देहि ममभिग्गहमिमं जं जाजीवं मए कज्जो ॥४०३९।। छट्ठाइतवविसेसो कायव्वं अंबिलेण परणयं । नाऊण निव्वहंतं तीसे तं केवली देइ ॥४०४०।। छट्ठ-ट्ठम-दसम-दुवालसाइ अह सा करेइ घोर-तवं । पारणयमंबिलेणं सहेइ सीयायवाईयं ॥४०४१।। पणवीसं वाससयं काउं सा एरिसं तवं घोरं । परिसूसियरुहिरमंसा जाया चम्मट्रिसेसतण ॥४०४२।। काऊणमणसणं वासराइं तीसं समाहिसंपन्ना । मरिऊण समुप्पन्ना देवी सोहम्मकप्पम्मि ।।४०४३।। सक्कस्स अग्गमहिसी सत्तयपलिओवमाइं सा आउं । तत्थ परिवालिऊणं आउखएणं तओ चविउं ।।४०४४।। उप्पन्ना तुम्ह घरे धयत्ताए पभावई एसा । तस्स तवस्सणभावा खयरेसर! एरिसी जाया ॥४०४५।। एयं पभावईए कहणावसरम्मि तत्थ पत्ताए। सव्वं पि सयं निसुयं सरिया पुव्वा य नियजाई ।।४०४६।। तो पणमिऊण सूरि सिरम्मि आरोविऊण करजुयलं । विन्नवइ सामि सच्चं सव्वंपि इमं तए कहियं ।।४०४७।। नायं मए वि एवं जाईसरणेण संपयमसेसं । तुम्ह कहताणं इह एगग्गमणं सुणंतीए ॥४०४८।।
Jain Education International
For Private & Personal Use Only
www.jainelibrary.org
| SR No. | 001564 |
| Book Title | Munisuvratasvamicarita |
| Original Sutra Author | Chandrasuri |
| Author | Rupendrakumar Pagariya, Yajneshwar S Shastri, R S Betai |
| Publisher | L D Indology Ahmedabad |
| Publication Year | 1989 |
| Total Pages | 376 |
| Language | Sanskrit |
| Classification | Book_Devnagari, Literature, & Story |
| File Size | 9 MB |