Page Text
________________
१२२
राइमईकहा
पुव्वं पि ताव न कयं मए मणुन्नं इमस्स जंपइणो । चित्तं नाऊण इमा जिणपडिमा पूइया नेय ।।३९२०।। जइ वि मम नत्थि भावो हिययम्मि तहा वि भत्तुणो चित्तं । अणुवत्तेयव्वं चिय जस्स पसाएण विलसामि।।३९२१॥ अज्ज वि न कि पि नट्ठ चिट्ठइ मह एत्तियम्मि वि गयम्मि । जा अज्ज वि पसरमिमा नवरिणीया न पावेइ ।। ताव सयं चिय सव्वं करेमि एयस्स भत्तुणोभिमयं । जह पुत्वठिई एच्चियठिओ सया एस मह वहइ ।।३९२३।। इय चितिऊण एसा संवरिऊण विसायछायं पि । होऊण पसन्नमुही राइमई भणइ निय दइयं ।।३९२४।। नाह ! पसाओ एसो मज्झ महंतो तए कओ अज्ज । जं मह बहिणी एसा मज्झ सहाया समाणीया ।।३९२५।। सोऊण तीए वयणं तो चिंतइ रामदेववरसड्ढो । इय नायं आसि मए जह एसा रूसिही मज्झ ।।३९२६।। जा पेच्छामि इमं ता सविसेसं पहसियाणणा जाया । ता कि पि अउव्वमिमं जायं धम्मप्पभावेणं ।।३९२७।। इय चितिऊण तो रामदेववरसावओ इमं वयइ । दइए जह चेव तए जंपियमेयं तहच्चेव ।।३८२८।। एसोच्चिय अभिप्पाओ मह चित्ते किं पिजं तुम किच्चं । गिह संतियं न सक्कसि काउं तं कारविस्सामि।।३९२९।। एईए पासाओ इय बेंतो रामदेवसड्ढो सो । चितइ नियम्मि चित्ते जिणपडिमा पूयणाईयं ।।३९३०।। राइमईए विहु एवमेव परिचितियं नियमणम्मि । तम्मि खणे दइयगिरं अणंतरुत्तं निसामेउं ॥३९३१।। अह सो पयर्ड जंपइ किं तु परं तुज्झ भीयचित्तेण । न मए तुज्झ वि कहियं पढममिमं आढवतेण ॥३९३२।। ता सु दरमेव इमं जायं जं सम्मयं तुह मणे वि । सा बेइ संमयं चिय मह तं जं तुम्ह अभिरुइयं ।।३९३३॥ इय तव्वयणं सोउं चितइ सो सावओ नियमणम्मि। मन्नामि इमं जइ तुह जिणंदधम्मे वि होइ रुई ॥३९३४।। राइमई पुण चितइ जिणपडिमा पूयणाइयं इन्हि । जइ वि करिस्सामि अहं तह वि इमो मन्निही कवडं ॥३९३५।। जम्हा आइच्चाई पडिमाणं पूयणाभिओगो मे । दइएण मज्झ दिट्ठो चिट्ठइ तम्हा तमभिसंकं ॥३९३६।। एयस्स माणसाओ केण वि फेडेमि नियउवाएण । इय चितिउं विणिच्छिय तदुवाया सायरं तत्तो ।।३९३७।। एसा जपेइ जहा अन्नपि तुहत्थि किं पि कहियव्वं । नाह मए तं पि तुमं एगग्गमणो निसामेहि ।।३९३८॥ एगम्मि अईयदिणे भणियाहं माणुसेण केणा वि । वियणम्मि कुलकमागयदेवयरूवाण जं चाओ ।।३९३९।। अज्ज तुह पिययमेणं विहिओ तं तेण संगयं न कयं । होइ अणिठं गरुयं नियमा एवं कुणंताणं ॥३९४०।। ताई गहिऊण तम्हा गिहेगदेसे ठवेह ताव तुमं । पूइज्जसु पच्छन्नं पच्छा अणुवत्तिउं दइयं ॥३९४१।। तस्स वि पासाओ प्रयमेसि निच्चं पि कारविज्जाहि । तं कयमेत्तियकालं तत्थ पमाणं तुम इन्हि ।।३९४२।। तं भणइ रामदेवो! मुद्धे! केणा वि विप्पलद्धासि । सव्वमपमाणमेयं जं भणियं तेण तुह समुहं ।।३९४३।। सव्वण्णुच्चिय देवो नोसेससुरासुरिंदनयचलणो । आइच्चाइदेवा सव्वे विय सेवया तस्स ॥३९४४।। जह होइ चक्कवट्टी सव्वेसि इयरनरवराईणं । नमणिज्जपायपउमो तह सेससुराण एस जिणो ॥३९४५।। जो चक्कवट्टी सेवं चइऊणं करइ इयर नरसेवं । केरिसयं तस्स फलं हवेज्ज तत्तो तुम कहसु ।।३९४६।। अह चितइ राइमई निय चित्ते नूणमेस मह भत्ता । लुचियसिरेण तेणं मुक्को धत्तुरिऊण दढं ।।३९४७।। तो चिट्ठइ गिन्हंतो इट्टाले एस कणयबुद्धीए । जं पुण जच्चसुवन्नं तं इंगालं व परिहरइ ।।३९४८।। जो पच्चक्खो देवो आइच्चो सयलभुवणवलयस्स । तं चइउमदिट्ठो जो को वि जिणो तं मुणइ देवं ।।३९४९।। कि मज्झ अणेण समं उत्तरपच्चुत्तरेहिं रइएहिं । को वि न अत्थो सिज्झइ होइ अणत्थो परं एक्को ॥३९५०।। ता मन्नामि असेसं एयस्स पयंपियं इमं इन्हि । जो देवो मज्झ मणे तत्तो तं को वि नो हरइ ।।३९५१।। इय चितिऊण भणियं राइमईए जहा तुहाएसो । निच्चं मज्झ पमाणं कएण किं बहुवियारेण ।।३९५२।।
Jain Education International
For Private & Personal Use Only
www.jainelibrary.org
| SR No. | 001564 |
| Book Title | Munisuvratasvamicarita |
| Original Sutra Author | Chandrasuri |
| Author | Rupendrakumar Pagariya, Yajneshwar S Shastri, R S Betai |
| Publisher | L D Indology Ahmedabad |
| Publication Year | 1989 |
| Total Pages | 376 |
| Language | Sanskrit |
| Classification | Book_Devnagari, Literature, & Story |
| File Size | 9 MB |