Page Text
________________
सिरिमुनिसुव्वयजिणिदचरियं
११९
अज्ज वि बाहइ अंग किं पि तओ सो पुरोगयं दटुं। रायाणं झत्ति समुट्ठिऊण जुज्झुज्जुओ जाओ ।।३८२३।। अपहुप्पंतो सो तस्स देहसामत्थओ नरिंदस्स । विज्जाबलेण लग्गो समच्छरो जुज्झिउं तत्तो ॥३८२४।। उप्पाडिऊण रुक्खं मुयइ नरिंदस्स सम्मुहं गरुयं । सो पुरिसो तमपत्तं नरेसरो अंतरे चेव ।।३८२५।। एतं खंडाखंडि अणेगहा कुणइ खग्गडंडेण । अह सो पुरिसो गयणे उप्पायइ पव्वयं गरुयं ॥३८२६।। सो मत्थयप्पएसे निवस्स निवडेइ अज्ज वि न जाव । ताव तओ ठाणाओ ओसरिऊणं निवो झत्ति ।।३८२७।। छेयत्तणेण गयणे उप्पइऊणं गिरिस्स तस्से व। सिहरम्मि समारूढो गिरीनिविट्टो महीए ।।३८२८।। विज्जासामत्थेणं पुणो वि सो पव्वओ सह निवेण । तेण समुक्खित्तो अंबरम्मि दूरयरमइरेण ।।३८२९।। राया वि गंडसेलं पव्वयसिहराउ ढालिङ एक्कं । सयमुप्पइऊण गओ महीयले झिलइ तं उवलं ॥३८३०।। तेण तहा तं सेलं अच्छोडइ महियलम्मि निवडतं । सयसिक्करो दिसासु जह वच्चइ तक्खणे चेव ।।३८३१।। अह तस्स विक्कमगुणं निवस्स तं तारिसं निएऊण । चित्तचमक्कारविहाणपच्चलं सयललोयस्स ।।३८३२।। मोत्तूण समरसंरंभमवणओ पायपंकयजुयम्मि । सो पुरिसो झत्ति करेइ खामणं पयंपतो ।।३८३३।। जं कि पि कन्नकडुयं पजंपियं संपयं मए तुम्ह । कायस्स तह किलेसो जो विहु उप्पाइओ को वि ॥३८३४।। एत्तिय कालं काऊणमसमसंगामवइयरं एयं । होऊण पसन्नमणो सव्वं तं खमह मह इन्हि ।।३८३५।। अह तं गहिउं हत्थेण पत्थिवो झत्ति उट्ठवेऊण । एगपएसे नेउं उववेसेउं भणइ एवं ॥३८३६।। जइ अबराहो विहिओ भद्द ! तए होइ कोइ अम्ह मणं । तो तत्थ खामणमिणं कायव्वं होइ तुह जुत्तं ।।३८३७।। काऊण वि उवयारं जं खामसि तं पुणो अइ विरुद्धं । अह विम्हइओ दूरं सो पुरिसो जंपए एवं ।।३८३८।। अच्छरियं जणइ इमं तुह वयणं मह मणम्मि नरनाह ! । जं अवयारं पि कयं जंपसि उवयारभावेण ॥३८३९।। अह राया तं पुरिसं आह जहा भद्द ! निसुण इह जुत्ति । जह अत्थि तए विहिओ उवयारो संपयं मज्झ ।।३८४०।। जं ताव कन्नकडुयं किं पि तए मज्झ सम्मुहं भणियं । तेण मए विनायं जं एरिसनिठुरगिराहिं ॥३८४१।। सब्बो वि जणो एवं दूमिज्जइ माणसेण दुक्खेण । ता सव्वहा वि न मए भणियब्वं एरिसं कडुयं ।।३८४२।। कस्स वि जणस्स समुहं रंकस्स वि सेवियावराहस्स । तत्तो तुह वयणाओ एस विवेओ समुप्पन्नो ॥३८४३।। अज्झावयाउ बालत्तणम्मि जगई जणाउ रज्जम्मि। जो न गुणो मम जाओ सो अज्ज तुमाउ संपन्नो ।।३८४४।। समरसमारंभेण वि कायकिलेसो तहाविहो को वि । मज्झ न जाओ कि पुण वाया मम पयम्मि सो पडियो ।। वायामो पुण निच्चं उवेच्च पुरिसेण होइ करणिज्जो। तत्तो जायइ देहस्स लाघवाई गुणो जेण ॥३८४६।। तस्स पमायवसेणं कयस्स पक्खो वि समहिओ जाओ।तत्थज्ज उज्जममहं कारविओ केत्तियं पितए ।।३८४७।। एयाए जुत्तीए दो उवयारा तए कया मज्झ । तत्थ तुह तेण खेओ थेवो वि न होइ कायव्वो ।।३८४८॥ तं सच्चवियं तुमए जं वुच्चइ सज्जणो सुरुट्ठो वि । कुणइ परस्सुवयारं अवियारो न उण अवयारं ।।३८४९॥ आयन्निऊण इयराय जंपियं जुत्तिसंजुयं सव्वं । नियमाणसम्मि चिंतइ सो विम्हयपरवसो पुरिसो ।।३८५०।। एयस्स अहो गरिमा अहो विवेओ अहो खमा असमा। सुयणत्तमहो उचियण्णुया अहो वयणविन्नासो ।।३८५१।। ता सव्वहा वि मह चितियस्स कज्जस्स साहगो एसो । संभाविज्जइ नियमा कहेमि ता हियमयस्स ॥३८५२।। इय चितिऊण भणिओ पुरिसेण नरेसरो तओ तेण । जह दकित्तिनामो तुमं नरिंदो जयपसिद्धो ।।३८५३।। निय कित्तिभरियभुवणंतरो य सव्वत्थ नज्जसे पयडो । जइ तुम्हे अणुजाणह कहेमि तो तुम्हमप्पाणं ॥३८५४।।
Jain Education International
For Private & Personal Use Only
www.jainelibrary.org
| SR No. | 001564 |
| Book Title | Munisuvratasvamicarita |
| Original Sutra Author | Chandrasuri |
| Author | Rupendrakumar Pagariya, Yajneshwar S Shastri, R S Betai |
| Publisher | L D Indology Ahmedabad |
| Publication Year | 1989 |
| Total Pages | 376 |
| Language | Sanskrit |
| Classification | Book_Devnagari, Literature, & Story |
| File Size | 9 MB |