Page Text
________________
सिरिमुनिसुव्वयजिणिदचरियं
जम्हा धूमसिहा इह समुल्लसंती न दीसए का वि । न य जाला वि जलती अवलोइज्जइ कविलकंती ।। ३७५९ ।। कुंकुम - कुसुंभ- केसरसरिसच्छाओ अवट्टिओ एसो । विलसइ तेयविसेसो ता कि पि इमं न जाणामि ||३७६०।। अह किंबहुणा परिकप्पिएण तत्थेव झत्ति गंतूण । अवणिज्जउ हिययाओ एस असेसो वि संदेहो || ३७६१।। इय चितिऊण राया आसन्नो जाव तस्स तेयस्स । गच्छइ ता सो तेओ अग्गेयदिसाए संकंतो ।। ३७६२।। तो चिंतइ पुहइवई विज्जुप्पुंजो किमेस संचलिओ । नियठाणाओ अहवा विसंवयइ दूरमेयं पि ।।३७६३।। जम्हा खणे खणे सो अदंसणी होइ दीसए तह य । दंसणपहमचयंतो एसो पुण चलइ ठाणाओ || ३७६४।। ता किं सो च्चिय एसो तेओ जो देवमंदिरे दिट्ठो । इन्हि मए अदिट्ठो होऊण इह ट्ठिओ पडो || ३७६५।। पेच्छणएण सयं सो दिट्ठो पुव्वि मए परं तत्थ । तेणेव सह पणट्ठी एसो पुण केवलो तेओ ।।३७६६।। निउणं पि निरूविज्जंतमेयमम्हाण निच्छयपहम्मि । उयरइ नेय कहमवि अत्थि पुणो निच्छओ एसो ।। ३७६७ ।। पुरिसविसेसेण सचेयणेण केणइ अहिट्ठिओ एस । तेयविसेसो चिट्ठइ कहन्नहा संकमइ एवं ।। ३७६८।। ता जत्थ तत्थ वच्चर एसो एयस्स जाव परमत्थो । तेयस्स न विन्नाओ मए नियत्तामि नो ताव ।। ३७६९ ।। इचितिऊण तुरियं जाव गओ अग्गओ पुणो राया । ताव पहापुंजो सो संकमिओ दाहिणदिसाए || ३७७०।। तस्साणुमग्गलग्गो पहाविओ पत्थिवो पुणो जाव । नेरइयाए दिसाए गयंतओ तं पहाजालं ।।३७७१ ।। तत्थ वि जाव पवत्तो बद्धपइन्नो नरेसरो गंतुं । ताव तओ तेयाओ परिष्फुडा निग्गया वाया || ३७७२ ।। तीए सो पडिसिद्धो जह भो भो ! भूमिगोयरा इन्हि । मा एहि सम्मुहो मे अवराहा तिन्नि ते खमिया ।। ३३७३।। गरुया वि मए पढमं करुणं काऊण नियय गरिमाए । जइ एसि संपयं पुण तो मा भणिहिसि न मे कहियं । । ३७७४।। जइ दीहजीवियव्वं अभिवंछसि अत्तणो तुम कह वि । ता जाहि नियं गेहं पियसु जलं सीयलं सुइरं ॥ ३७७५।। अह सव्वस्स वि भणियस्स तस्स अक्खुहियमाणसो भणियं । पच्चुत्तरं नरिंदो करे पच्छाणुपुत्र्वीए ।।३७७६।। जं कि पि जंपियणिं अहो महापुरिस ! जंपियं तुमए । तं सव्वमसंबद्धं तस्स फलं किं चि वि न अत्थि ।। ३७७७।। जं ताव तए भणियं पियसु जलं सीयलं ति किर वयणं । तत्थ हिमकालरयणीए पच्छिमाए तिसा कस्स ।। ३७७८। ती विणा वि तोयं न तुच्छ कालं पि को वि आवियइ । सुइरं पि तस्स पाणं महाविरुद्धं कह न होइ ।। ३७७९।। जं च पयंपियमेयं तुम नियमंदिरं वयाहि त्ति । तत्थ हिं मे पुहई तत्थेव ठिओम्हि सयकालं ।।३७८०।। जं च तए भणियमिणं दीहं जइ जीवियं समहिलससि । तत्थ वि कि संदेहो भणिज्जए सिद्धवत्थुम्मि || ३७८१ ।। जे जीवा संसारे सुरेसराई वि कीडपज्जता । ते जीयमत्तणो दीहमेव सव्वेवि इच्छंति ।।३७८२।। तु खमिया महावराहा मए पुरा तिन्नि । तं सव्वहा वि विवरीयमेव जं तुज्झ अवराहा ।। ३७८३ ।। सव्वे वि मए खमिया मह नयरे जं समागओ तं सि । मज्झ अपुच्छाए जहिच्छमेत्थवियरेसि रयणीए || ३७८४ ।। तह मज्झवि अप्पाणं गोवेसि न होसि पयडरूवेण । पट्ठीए एंतस्स वि परओ परओ पलाएसि ।। ३७८५ ।। एवं कावराहो जेण मए तंसि ने य निग्गहिओ । तेण खमियं पिन मए तुज्झ तुमं मज्झ खमसि ।। ३७८६।। एएण पगारेणं अहो महापुरिससव्वमेवेयं । तुमए पयंपियं जं तं जायं पलवियप्पायं ।। ३७८७ ।। इय दूसेउं कमसो जुत्ति जुयं परपयंपियं सव्वं । तुन्हिक्को संजाओ जाव मही मंडलाहिवई ।। ३७८८।। ताव पुणो वि पहामंडलाउ तत्तो विणिग्गया वाणी । सव्वमहो तं वुच्चइ जं पुहई अप्पचंग त्ति || ३७८९।। एक्केक्कसो समग्गं पि अम्ह दूसेसि जंपियं तुट्ठो । अप्पाणं तु न जाणसि देतो अणुचियमुवालंभे ॥ जेहुं तीह रयणियरा कस्स वि ते देति दंसणं न नियं । पत्थंतस्स वि पासम्मि संठियस्सा वि मणुयस्स ।। ३७९१।।
Jain Education International
For Private & Personal Use Only
११७
www.jainelibrary.org
| SR No. | 001564 |
| Book Title | Munisuvratasvamicarita |
| Original Sutra Author | Chandrasuri |
| Author | Rupendrakumar Pagariya, Yajneshwar S Shastri, R S Betai |
| Publisher | L D Indology Ahmedabad |
| Publication Year | 1989 |
| Total Pages | 376 |
| Language | Sanskrit |
| Classification | Book_Devnagari, Literature, & Story |
| File Size | 9 MB |