Page Text
________________
११४
चंदकित्तिनिवकहा
विज्जुसिहो नामेणं एक्को जपेइ जोडियकरग्गो । अच्छलियं मम तुम्हं कि पि अहं विन्नविस्सामि ॥३६६१।। देव ! न जुत्तं एयं जं किर गरुयाण जंपमाणाणं । अणणुन्नाओ अन्नो पभासए अंतरे भासं ॥३६६२।। नियमामिकज्जकरणम्मि ऊसुओ परमहं न सक्कमि । कालविलंब सहिउं तेण न मे एस अवराहो ॥३६६३।। गरुयपसायं काउं देवो आरुहउ इह विमाणम्मि। सव्वं पि वइयरमिमं मंतिस्स अहं कहिस्सामि ।।३६६४।। तो चितेइ नरिंदो जुत्तमिणं खेयरेण विन्नत्तं । तं चिय एयं जायं जं वुच्चइ इयरलोएण ॥३६६५।। एक्केणं कज्जेणं कज्जाइं हवंति दोन्नि वि कयाइं । चूया वि सिंचिया होति तप्पिया तहय पियरो वि ।।३६६६।। गरुयाण लज्जणिज्जं नियपोरिसपयडणं सयं काउं। जम्हा तत्तो छुट्टामि ताव एक्कं इमं कज्जं ॥३६६७। बीयं पुण नियपडिवन्नपालणं साहियं हवइ सिग्घं । सप्पुरिसाणं तं चिय जं करणिज्ज पयत्तेण ॥३६६८।। इय चितिऊण भणिओ सुहुममई निवइणा महामंती। एसो वि कहउ जं अत्थि उसुयं अम्ह कज्जमिणं।।३६६९।। सयमकहणावराहो अम्ह न तुम्हेहिं को वि गहियन्वो । जम्हा कत्थ वि कज्जे एगंतो नत्थि विबुहाण ।।३६७०।। अन्नं च तुम्ह अइसुहुमबुद्धिवावाररज्जुसंजमिए । सव्वत्थ वि कयसुत्थे रज्जे चिंता न मे अत्थि ।।३६७१।। सामित्तमेत्तमेव य केवलमहमणुहवंतओ एत्थ । कोलामि जहिच्छाए वेयड्ढनगे वि गंतूण ।।३६७२।। तं चिय करिस्समिन्हि अउव्वठाणम्मि खेयरिदस्स । अब्भत्थणाए तत्तो पुण सिग्घमिहागमिस्सामि ॥३६७३।। कज्जवसा ठायव्वं जइ तत्थ भविस्सए बहुदिणाणि । तो खेयरजुयलाओ तुम्हं जाणावइस्सामि ।।३६७४।। एगागिणो वि देसंतरम्मि वच्चंतयस्स अवसेरी । मज्झ न तुम्हेहि मणम्मि का वि थेवा वि कायब्बा ।।३६७५।। सेणासहस्स समहियसामत्थो तुम्ह बुद्धि उवएसो । जं सुंदरो सहाओ सया वि मह अत्थि सन्निहिओ ॥३६७६ ।। अन्नं पि अत्थि भणियव्वमेत्थ तं सुणउ सावहाणमणो । अत्थाणजणो सव्वो जो अम्ह समीहए सेवं ।।३६७७।। मइवेयड्ढनगम्मि वि गयम्मि केणा वि मंतिणो वयणं । तेण न हु खंडियव्वं अम्हाण वि माणणिज्जस्स।।३६७८।। इय भणिऊण नरिंदो खग्गग्गाहिस्स पासओ खग्गं । गहिऊण य कोयंडं कोयंडधरस्स पासाओ ।।३६७९॥ पासम्मि सभप्पइ खेयरस्स तो विज्जुमालिनामस्स । तेणेव दिन्नबाहुं दाहिणहत्थेण गहिऊण ।।३६८०।। सीहासणाउ सहसा समुट्ठिओ सहसहागयजणेण । विज्जुसिहेणं भणिओ तडितेओ खेयरो तइआ ॥३६८१॥ कुणह विमाणं आसन्नमत्थ आरुहइ पत्थिवो जेण । तो रन्ना पडिसिद्धो स परक्कमपयडणनिमित्तं ॥३६८२।। निय परियणस्स पुरओ जह सो सब्वो वि निव्वुओ होइ । मह असहायत्तणओ मणं पि न मणे कुणइ अधिई ।३६८३। एय भावेणं भणियं तेणेत्थ टियम्मि इह विमाणम्मि । आरोहणं करिस्सं अह उप्पइउं गयणमग्गे ।।३६८४।। पेक्खंतस्स सविम्यमत्थाणजणस्स पत्थिवो तत्थ । आरूढो सहसच्चिय सिहो व्व करिदकुंभयडे ।।३६८५।। खयरो वि विज्जुमाली नरवइणो अणुपयं तहारूढो । रायावि विमाणगओ अत्थाणजणं खणं नियइ ॥३६८६ ।। जयसद्दो समकालमेव सव्वेण तेण उग्घुट्ठो । भणियं पुणो पुणो तह पुणो वि देवो भवउ अम्ह ॥३६८७।। आणंदभरनिरंतरनयणाणं दंसणिज्जमुहकमलो । नमणिज्जपायपउमो सिरचुंबियमेइणितलाण ।।३६८८।। अह तम्मि विमाणवरे पुव्वाभिमुहं रएण वच्चंते । जुगवं पि समग्गसभा जणेण दिट्ठी परिढविया ॥३६८९।। ता जाव तं विमाणं नयणाणमगोयरम्मि संपत्तं । तत्तो नियत्तिऊणं दिलुि वाणे पुण निविट्ठो ॥३६९०।। सव्वो अत्थाणजणो विम्हयरसपरवसो मिहो वयइ । किं किं एयस्स नरेसरस्स -एक्कं पसंसेमो ।।३६९१ ।। सव्वं पि जओ चरियं जणियच्छरियं जणस्स सव्वस्स । दक्खिन्नमणन्नसमं पढमं चिय जेण एयरस ।।३६९२।। तत्तो साहसमउलं परोवयारित्तणं तओ अहियं । तत्तो परक्कमो पुण जयस्स सम्बस्स अब्भहिओ ।।३६९३।।
Jain Education International
For Private & Personal Use Only
www.jainelibrary.org
| SR No. | 001564 |
| Book Title | Munisuvratasvamicarita |
| Original Sutra Author | Chandrasuri |
| Author | Rupendrakumar Pagariya, Yajneshwar S Shastri, R S Betai |
| Publisher | L D Indology Ahmedabad |
| Publication Year | 1989 |
| Total Pages | 376 |
| Language | Sanskrit |
| Classification | Book_Devnagari, Literature, & Story |
| File Size | 9 MB |