Page Text
________________
सिरिमुनिसुब्वयजिणिदचरियं
कुमरेण वीरसेणो अह भणिओ मुंचमुच लहु तुरयं । उरुग्गहाउ एयं विवज्जिही अन्नहा एसो ।।३२३३।। तो कुमरवयणसमणंतरं पि सिढिलीकओ तुरंगो सो । सिग्छपि वीरसेणेण सत्थदेहो तओ जाओ ।।३२३४।। तो जाव विम्हियमणो सो चिट्ठइ वज्जकुंडलकुमारो। ताव धणुबाणहत्था केइ वि तत्था गया जोहा ।।३२३५।। देसंतराउ दूराओ रायसेवाविहाण कज्जेण । कुमरेण पेक्खिऊणं ते आलत्ता पयत्तेण ।।३२३६।। तो भणइ वीरसेणो समकालमिमे मुयंतु बाणगणं । भामंतो कुंतमहंतं सव्वं टालइस्सामि ।।३२३७।। तो कुमाराएसेणं जोहा मुंचंति वीरसेणम्मि। सरनियरं तं टालइ तहेव सो तो नियमणम्मि ।।३२३८।। तविक्कमेण तूसइ तणओ चक्किस्स अह नियावासे । गंतूण सो असेसं सेवयलोयं विसज्जेइ ।।३२३९।। सेवाए वीरसेणो बीयम्मि दिणे समागओ संतो। एगंते होऊ णं पुट्ठो कुमरेण सो एवं ।।३२४०।। जह भद्द ! तए पुव्वं इय भणियं आसि निययवुत्तत्तं । एगते तुम्ह पुरो कयावि सव्वं कहिस्सामि ।।३२४१।। तोतं कहेहि संपइ भणिओ कुमरेण एरिसं अह सो । सहइ माहवरायं कहावए तस्स पासाओ ।। ३२४२।। सो कहइ एत्थ देसो अत्थि सुसेणो त्ति तत्थ पुहइवई । नामेण सिंधुवीरो तस्स सुओ वीरसेणोत्ति ।।३२४३।। जुवरायपयं पालइ अह जाओ तस्स चुल्लमाऊए । पउमसिरीए पुत्तो नामेणं सिंधुसेणो त्ति ।।३२४४।। तम्मि कलागहणखमे संजाए सिंधुसेणनरनाहं । भणिउं पउमसिरीए जुवरायत्ते निओ पुत्तो ॥३२४५।। संठाविओ इमो पुण तीए फेडाविओ सदेसम्मि । अन्नं पि गाममाई दिज्जतं वारियंतस्स ।।३२४६।। एवंपि एस पियरं सेवइ निच्चं पि परमभत्तीए । तह वि य सो सेविज्जइ सव्वेण विरायलोएण ।।३२४७।। तं दटुं पउमसिरी गया पओसं भणेइ पुहइवइं। सव्वस्सं हरिऊणं जेट्ठसुयं अंगमेत्तेणं ॥३२४८।। नोहारेहि सदेसाउ तस्स रन्ना तओ समग्गं पि। विहवं अवहरिऊणं नियपुरिसो एवमाइट्ठो ।।३२४९।। जह मज्झाए सेणं गंतूण वीरसेणवरकुमरं । भणह तुमं जेणेसो एक्कंगेणेव ममदेसं ।।३२५० ।। नीसेसं चइऊणं कत्थ वि अन्नत्थ वच्चए देसे । सो पुरिसो भणइ तओ देव ! न सक्के मि इय वोत्तुं ।।३२५१।। कुमरस्स सम्मुहमहं ता अन्नं के पि आइसह एत्थ । रन्ना अन्नो भणिओ तेण वि तह चेव पडिसिद्ध ।।३२५२।। एवं चउरो पंचय भणिया अन्ने वि तेहि वि निसिद्धं । टुं तओ विलक्खं रायाणं जंपए अन्नो ॥३२५३।। लिहिऊण सहत्थेणं भुज्जे अत्थं इमं समप्पेह । तुब्भे मज्झ समीवे तो हं कुमरस्स अप्पेमि ॥३२५४।। तह चेव तओ रन्ना लिहिऊण गलंतलोयणजलेण। पुत्तस्स सिणेहेणं थरहरमाणेण हत्थेण ।।३२५५।। तस्स समीवाओ तं भुज्ज अप्पावियं कुमारस्स । एत्थंतरम्मि तो वज्जकुंडलो जंपए एवं ॥३२५६।। जइ सिंधुवीररन्नो एत्तियमेत्तो वि वीरसेणम्मि । अत्थि सिणेहो तो किं इय एयं सो पवासेइ ।।३२५७।। माहवराएण तओ विन्नत्तो वज्जकुंडलकुमारो। पउमसिरीपरिणीया पहुणा अम्हं जया पढमं ।।३२५८।। पत्थेऊण पथत्तेण गाढअणुरायगहियहियएण । पउमसिरीए विहिओ वयणनिबंधो तया एसो ।।३२५९।। विन्नत्तीओ चउरो जइ मज्झ करेहि समय भणियाओ । तो परिणावेमि अहं अप्पाणं तुह समीवाओ ॥३२६०।। पडिवन्नम्मि नरिदेण तम्मि अट्टम्मि पत्थियं तत्तो। पत्तं पउमसिरीए सहत्थलिहियं नरिंदाओ ।।३२६१।। तेण वि तं लिहिऊणं तिव्वणुरत्तेण अप्पियं तीसे। तत्थ नियधम्महत्थो तव्वयणेणं पुणो लिहिओ ।।३२६२।। भुज्जम्मि वि लिहिऊणं एसट्ठो तेण वीरसेणस्स । पटुविओ जह जाणइ इमो सपिउणो परवसत्तं ।।३२६३।। एएण कारणेणं एयम्मि निवो निबद्धनेहो वि। एयस्स' सव्वमेवं करेइ भज्जोवरोहेण ।।३२६४।। आयन्निऊण एयं धुणइ सिरं वज्जकुंडलकुमारो । जंपइ य अहो ! इत्थी वसंगया गरुयपुरसा वि ।।३२६५।
Jain Education International
For Private & Personal Use Only
www.jainelibrary.org
| SR No. | 001564 |
| Book Title | Munisuvratasvamicarita |
| Original Sutra Author | Chandrasuri |
| Author | Rupendrakumar Pagariya, Yajneshwar S Shastri, R S Betai |
| Publisher | L D Indology Ahmedabad |
| Publication Year | 1989 |
| Total Pages | 376 |
| Language | Sanskrit |
| Classification | Book_Devnagari, Literature, & Story |
| File Size | 9 MB |