Page Text
________________
१०२
वज्जकुंडलचरियं तं नत्थि जं अकज्जं न कुणंति विमुक्कसव्वजणलज्जा। अह भणइ वीरसेणो एसो दोसो न तायस्स ।।३२६६।। अम्हं चिय कम्माणं विवरीयत्तं समग्गमेवेयं । अहवा अणुकूलत्तं जं दिट्ठ तुम्ह पयजुयलं ।।३२६७।। तत्तो माहवराओ पुणो वि विन्नवइ चक्किणो तणयं । तासि विन्नत्तीणं चउन्ह मज्झाओ एक्काए ॥३२६८।। विन्नत्तीए रज्जं पत्थइ पुत्तस्स पउमसिरिदेवी । बीयाए वीरसेणस्स कारए वित्तिविच्छेयं ।।३२६९।। तइयाए सव्वस्सं ल्हूसावइ तस्स तह चउत्थीए। देसाउ वीरसेणं निव्वासइ एक्क अंगेण ॥३२७०॥ अह एस वीरसेणो भज्जं पिइपेसियं निएऊण । वाया संकडपडियं नाऊण तओ नियं जणयं ।।३२७१।। पभणइ भुज्जसमप्पगपुरिसस्स पुरोपिउस्स वयणेण । जीयंपि चएमि अहं देसच्चायस्स का वत्ता ॥३२७२।। निय परियणं पि जंपइ भत्तो जो को वि सेवओ मज्झ । केणा वि तेण न मए वच्चंतेणं समं इन्हि ।।३२७३।। एत्तो आगंतव्वं जाव न देसं चयामि तायस्स । अम्ह कलत्तेहि पि हु कायव्वो एस आएसो ।।३२७४।। इय भणिऊणं चलिओ खग्गसहाओ नियाउ गेहाओ । लंघेऊणं पिउणो देसं कमसो गओ पुरओ ।।३२७५।। जे पाणीयं पाउं बहि गया आसि केत्तिया विया । ते पुरिसे पसेउं सव्वे वि मए कया गुत्ता ॥३२७६।। परिवारो वि समग्गो मेलेऊणं मए इमं भणिओ। सिरिसिधुवीररन्नो देसाओ अन्नदेसम्मि ।।३२७७।। पत्तस्स' वीरसेणस्स राय उत्तस्स सन्निहाणम्मि । गंतूणं मिलियव्वं सब्वेण वि तेण जस्सस्थि ॥३२७८।। कस्स वि भत्ती तुम्हं मझे कुमरम्म वीरसेणम्मि। पडिवन्नं तेण तओ परिवारेणं तह कयं च ॥३२७९।। दीणाराण सहस्सं सोलस तुरए अहं पि घेत्तूण । मिलिओ आगंतूणं इहावयंतस्स एयस्स ।।३२८०॥
अन्ने आसा करहा गोणा य पहम्मि अन्न लोएण । पाहुन्नयम्मि दिन्ना गेहागयवीरसेणस्स ॥३२८१।। तो वज्जकुंडलेणं भणिओ कह एतिओ वि परिवारो । दीणारसहस्सेणं एत्तिय दियहाइं निव्वहइ ॥३२८२॥ माहवराओ साहइ जो देसो आसि वीरसेणस्स । दिन्नो जणएण तहिं कुसुमपुरं अस्थिवरनयरं ॥३२८३।। तत्थ निवसेइ सेट्ठी पियमित्तो नाम सावगो इब्भो । जिणभवणकए भूमी दिन्ना से वीरसेणेण ॥३२८४।। निष्फन्ने जिणभवणे आयाणं कारियं अइपभूयं । अन्नेसु वि कज्जेसुं पेक्खिज्जइ गोरवेणेसो ॥३२८५।। जाओ य सिंधुसेणो सामी नयरस्स तस्स जम्मि दिणे । तप्पभिई सो पियमित्तसेट्टिकारियजिणहरस्स ।।३२८६।। कुणइ उवद्दवमसई मच्छरओ वीरसेणकुमरस्स । पियमित्तसेट्ठिणा तो ववहारो तत्थ संवरिओ ॥३२७।। जिणहरपडिबंधेणं सो चिट्ठइ केवलेण अंगेण । पारद्धो ववहारो वित्थरओ वणियउत्तेहि ॥३२८८।। तेण इह गंधमायणपुरे तओ वीरसेणमिहनाउं । आगयमेसो लेहेण भाणए निययवणिउत्ते ॥३२८९॥ सोलुत्तरमेक्कसयं दीणाराणं दिणेदिणे देज्जा । कुमरस्स वीरसेणस्स चिट्ठए जा इमो तत्थ ।।३२९०।। तो देति वाणिउत्ता ते अम्हं पुव्वभणियदीणारे । पइदियह चिय जायइ तेण तओ भोयणाईयं ॥३२९१।। तो वज्जकुंडलेणं भणियं अम्हं पि पासओ तुब्भे । एवइए दीणारे गिन्हह पइवासरं चेव ॥३२९२।। माहवराएण तओ विन्नत्तं वज्जकुंडलस्सेवं । तुम्ह पसाएण न अम्ह वट्टए कि पि इह खूणं ॥३२९३।। तुम्हेहिं पसन्नेहि गरुयफलं एत्थ कि पि ईहेमो । तो आह चक्कितणओ तुम्ह अहं तं पि पूरिस्सं ।।३२९४।। जइ तुम्हं पडिहासइ कहेह तो संपयं पि तं मज्झ । माहवराओ जंपइ कहेमि इन्हि पि तं तुम्ह ॥३२९५।। जप्पभिइ वीरसेणो विणिग्गओ सिंधुवीरपासाओ । तप्पभिइ तस्स जाया अरई गरुई नियमणम्मि ॥३२९६।। तह वि जणाणं लज्जाए अवसरं सो करेइ निच्चपि । रज्जपि चितए अबहुमाणयं सिधुवीरनिवो ।।३२९७।। तेणं चिय खेएणं देहे तस्सुटिओ गुरुवाही । वेज्जाणं पडियारा सव्वे पिहु विहलया होति ।।३२९८।।
Jain Education International
For Private & Personal Use Only
www.jainelibrary.org
| SR No. | 001564 |
| Book Title | Munisuvratasvamicarita |
| Original Sutra Author | Chandrasuri |
| Author | Rupendrakumar Pagariya, Yajneshwar S Shastri, R S Betai |
| Publisher | L D Indology Ahmedabad |
| Publication Year | 1989 |
| Total Pages | 376 |
| Language | Sanskrit |
| Classification | Book_Devnagari, Literature, & Story |
| File Size | 9 MB |