Page Text
________________
सिरिमुनिसुव्वयजिणिंदचरियं परिणाविज्जइ रन्ना विविहविलासे य कुणइ ताहि समं । तं रज्जभरसमत्थं नाऊण कुबेरदत्तनिवो ॥३१०९।। चितइ जइ इह समए भयवं सिरिविस्सकंतमुणिनाहो । विस्सउरे देइ पए तो हं साहेमि नियम ॥३११०।। अन्नम्मि दिणे उज्जणपालपुरिसेण सो समागंतुं । वद्धाविओ कहेउं पिउणो सूरिस्स आगमणं ॥३१११।। तव्वयणसवणसमकालमेवसित्तो व्व अमयवुट्ठीए । जाओ कुबेरदत्तो राया तव्वंदनिमित्तं ॥३११२।। संवहिउं जाइ तओ उज्जाणे वंदए मुणिदस्स । पायारविदजुयलं पुहईयलमिलियपंचंगो ।।३११३॥ सोऊण तस्स देसणममयरसासारसरिससुहजणयं । संविग्गमणो मलियकरकमलो विन्नवइ सूरि ।।३११४॥ जह पह तुब्भेहिं अहं पुहई रज्जे निवेसिओ पुव्वं । संजमरज्जम्मि तहा ठवेह में संपयं झत्ति ॥३११५।। तुह पयकमलेहि समं विरहो एत्ति य दिणे मए सहिओ। पसिऊण सपायासन्न-सेवयं कुणह मं इन्हि ।।३११६।। अह भणइ निवं सूरी संपइ तुह संगयं वयग्गहणं । रज्जभरुव्वहणखमे जाए पुत्ते अमरदत्ते ॥३११७॥ नियसीसनिहियहत्थो महापसाओ त्ति जंपिउं राया । सूरि नमिऊण तओ गंतूणं निययपासाए ॥३११८।। महया विच्छड्डेणं रज्जे अहिसिंचए अमरदत्तं । अह तं अणजाणावइ दिक्खागहणम्मि अप्पाणं ॥३११९।। तो अमरदत्तराया कुबेरदत्तस्स कारए रन्नो । निक्खमणमहामहिम निम्मावइ उत्तमं सिवियं ।।३१२०।। कारेइ जिणहरेसुं पूयाओ पवरवत्थकुसुमेहिं । पडिलाभइ मुणिवग्गं आहाराईहि सुद्धेहिं ॥३१२१।। सम्माणइ साहम्मियजणं समग्गं पि परमपीईए । दीणाणाहाईणं जहिच्छियं दावए दाणं ।।३१२२।। पिउणो निक्खमणमहाहिसेयमद्रवइ रयणकलसेहिं । अह तं कारेऊणं सिंगारं मणहरागारं ॥३१३।। आरोहइ सिवियाए उवरिरिज्जतधवलछत्तेणं । चमरेहि ढलतेहि मयंककरजालविमलेहिं ।।३१२४।। पुरओ पेच्छणएणं जणमणहरणेण कीरमाणेण । सवणसुहदायगेणं गिज्जतेणं च गएण ।।३१२५।। वयालियकयकोलाहलेण वज्जंततूरनिवहेण । हय-गय-रहजोहेहि चउर्दािस विहियवेढेण ॥३१२६।। सिविया पच्छिमभाए गच्छंतेणं च अमरदत्तेण । भूवेण लच्छिवद्धणगइंदखंधाहिरूढेण ।।३१२७।। पुरिसाण सहस्सेणं उक्खित्तं सिवियमहसमारूढो । राया कुबेरदत्तो वच्चइ अइगुरुविभूईए ॥३१२८।। नयरबहि उज्जाणे तीसे अवरोहिऊण सिवियाए । तिपयाहिणी करेउं वंदइ मुणिपुंगवं तत्तो ॥३१२९।। एगदिसाए होउं मोत्तूणं सव्वमेवलंकारं । पंर्चाह मुट्ठीहि तओ लोयं काऊण सयमेव ।।३१३०।। आगंतुं विस्सकंतस्स सूरिणो चरणकमलपासम्मि। विन्नवइ जहा भयवं! दिक्खं मे देह सयमेव ।।३१३१।। पंचनमोक्कारसमुच्चारणपुव्वं गुरू वि सामइयं । आरोवइ तस्स सयं जईण किरियं च सिक्खवइ ।।३१३२।। अह सो कुबेरदत्तो संजाओ परमसंजओ एवं । अन्ने वि तेण सद्धि पंचसया बुद्धिधणपमुहा ॥३१३३।। पव्वज्जं पडिवन्ना तत्तो सिरिविस्सकंतमुणिनाहो । पव्वज्जा माहप्पं वनइ नीसेसदुहदलणं ।।३१३४।। तह तीसे दुलहत्तं तं सोउं अमरदत्तनिवपमुहा। जइ धम्मम्मि असत्ता धम्म पुच्छंति गिहिजोग्गं ।।३१३५।। सूरी वि कहइ तेसि अगारिधम्म सवित्थरं ते वि गिहिधम्म पडिवन्ना निम्मलसम्मत्तसंजुत्तं ॥३१३६।। अह वंदिऊण सूरि सपरियणं अमरदत्तनरनाहो । नियमंदिरम्मि वच्चइ समग्गनियसेन्नपरियरियरिओ।।३१३७।। वंदिज्जतो निवअमरदत्तपमुहेण नयरलोएण । सूरि वि कइवयादिणे ठाऊणं तम्मि नयरम्मि ।।३१३८।। मंगल उरम्मि वच्चइ निज्जामइ तत्थ विमलजससूरि । सो वि कयउत्तमट्ठो पज्जते जाइ नेव्वाणं ।।३१३९।। साहू कुबेरदत्तो विहरंतो नियगुरूहि सहभुवणे । अंगाइं समग्गाइं वि करेइ कंठोट्ठमुक्काइं ॥३१४०।। अह सो कुबेरसाहू समग्गसुयसागरस्स पारगओ। सूरिपए ठविऊणं सह दिक्खियसाहुपंचसए ॥३१४१।।
Jain Education International
For Private & Personal Use Only
www.jainelibrary.org
| SR No. | 001564 |
| Book Title | Munisuvratasvamicarita |
| Original Sutra Author | Chandrasuri |
| Author | Rupendrakumar Pagariya, Yajneshwar S Shastri, R S Betai |
| Publisher | L D Indology Ahmedabad |
| Publication Year | 1989 |
| Total Pages | 376 |
| Language | Sanskrit |
| Classification | Book_Devnagari, Literature, & Story |
| File Size | 9 MB |