Page Text
________________
कुबेरदत्तचरियं अह सो कुबेरदत्तो पणओ सामंतमंतिपमुहेहि। जाओ महानरिंदो जसभरियसमग्गभुवणयलो ॥३०७६।। कारइ समग्गजिणमंदिरेसु पूयाओ देइ दाणाई । मोयावइ गुत्तीओ सम्माणइ माणणिज्जजणं ॥३०७७।। पेसियपुरिसेहि तओ आगंतुं विस्सकंतनरवइणो। कहियं सिरिविमलजसो सूरी एत्थागओ इन्हि ॥३०७८।। अह विस्सकंतरन्ना ते पुरिसा पेसिया समीवम्मि । रन्नो कुबेरदत्तस्स अक्खिउं सूरि आगमणं ॥३०७९।। तेण वि तं सोऊणं तकालं चिय समग्गसामग्गी । पिउणो निक्खमणकए कारविया सव्वसत्तीए ॥३०८०।। सिवियाए आरुहिउं निग्गच्छइ विस्सकंतनरनाहो । रन्ना कुबेरदत्तेणणुमग्गगएण भूईए ॥३०८१।। गंतणं उज्जाणे सिरिविमलजसस्स सूरिणो पासे । गिन्हइ दिक्खं अड्ढाइज्जसएहि सह नराणं ॥३०८२।। तेसि मज्झे मंती सुबुद्धिनामो वि गिन्हए दिक्खं । सूरी वि साहुकिरियं सव्वं सिक्खवइ ते सव्वे । ।३०८३।। राया कुबेरदत्तो सह अहिणवदिक्खिएहि साहूहिं । नमिऊण सपरिवारं सूरि वच्चइ सठाणम्मि ।।३०८४॥ ठाऊण कइवयदिणे कुबेरदत्तेण पुहइनाहेण । वंदिज्जंतो सूरी सपरियणो वच्चइ विहारे ।।३०८५।। साहू वि विस्सकंतो बारसअंगाइं पढइ सयलाई। ठाविज्जइ नियगुरुणा आयरियपयम्मि दाऊण ।३०८६।। सह दिक्खियसाहुगणं परिवारं सो तओ नियगुरुस्स । आणाए विहरंतो विस्सउरे एइ बहुवारं ॥३०८७।। तत्थ य कुबेरदत्तावर्णा पमुहनयरलोयाणं । नियदेसणाए जिणवरधम्मम्मि समुज्जम जणइ ॥३०८८।। राया वि पट्टबंधं कारावइ लच्छिवद्धणकरिस्स । मंगल उरम्मि पुरिसे संपेसइ बुद्धिधणपासे ।।३०८९॥ तस्साहवणकए अह सुत्थं काऊण सयलदेसम्मि । आगच्छइ बुद्धिधणो कुबेरदत्तस्स पासम्मि ॥३०९०।। तं ठावइ मंतिपए कुबेरदत्तो नरेसरो नियए । हक्कारयाई पेसइ सव्वेसि सेवानवाण ।।३०९१।। ते वि समा-गंतुणं हरि-करि-रहमाइएहि मंगलियं । कुव्वंति तस्स रन्नो कुबेरदत्तस्स भत्तीए ।।३०९२।। खसपरबलसोहाण वि हु नरवइणो दो वि नियथदेसाओ। आगंतुं मंगलियं कुणंति अहिणवनरिंदस्स ।।३०९३।। खसपरबलसीहाण वि विजए तस्सा-सि पोरिसं पयडं । जं पुण एक्कंगेण वि आणीओ वणकरी मत्तो॥३०९४।। तं सोऊणं सब्वे अन्ने विहु संकिया महीवइणो। पेसंति पाहुडाइं पसायणत्थं सया तस्स ॥३०९५।। रूयवईओ तह कन्नयाओ पेसंति भूसियंगीओ । जायाइं तस्स एवं तिन्निसयाइं कलत्ताणं ॥३०९६।। तेहि समं विसयसुहं अणुहवमाणो सुरो व्व सुरलोए । पुव्वज्जियसुहकम्मो गमेइ कालं कयाणंदो ।।३०९७।। गामे वा नगरे वा जत्थ न जिणमंदिरं पुरा अस्थि । ठाणेसु तेसु सव्वेसु कारए चेइयहराई ।।३०९८।। रहजत्ताउ पवत्तइ विसिट्ठ अट्ठाहियाउ कारेइ । पूएइ साहुवग्गं सम्माणइ सावयजणं च ॥३०९९।। इय विप्फुरियपयावस्स तस्स रज्जं पसाहमाणस्स । समइक्कंताई तओ अणेगलक्खाई पुवाणं ।।३१००।। अंते उरपहाणादेवी अह मयणसुदरी तस्स । अन्नसमम्मि पेच्छइ अमरं सुमिणेसु वेसधरं ॥३१०१।। तं पासिउं पबुद्धा कहइ पभायम्मि सा नरिंदस्स । सो सुमिणपाढयाणं ते वि हु परिभाविऊणफलं ।।३१०२।। तस्स पकहति पुत्तं भविस्समवणीसरं गुरुपयावं । राया वि पूइऊणं हिट्ठमणो ते विसज्जेइ ।।३१०३।। गंतूण तओ साहइ सुमिणफलं मयणसुंदरी एसो । सोऊण सा वि हियए परितुद्वा वहइ तं गब्भं ॥३१०४।। पडिपुन्नवासरेहि पसवइ पुत्तं सुलक्खणं एसा । रायाणं वद्धावइ आगंतूणं पियंवइया ॥३१०५।। राया वि देइ तीसे अइबहुयं पारिओसियं दाणं । वद्धावणयं कारइ तओ समग्गम्मि देसम्मि ॥३१०६।। बारसमदिणे नामं ठावइ पुत्तस्ज अमरदत्तो त्ति । पंचहिं धाईहिं जुओ सुहेण सो वड्ढए तत्थ ।।३१०७।। परिवड्ढेतो कमसो कलाण सव्वाण पारगो होइ । जोव्वणभरं पवन्नो कन्नाओ महानरिंदाणं ॥३१०८।।
Jain Education International
For Private & Personal Use Only
www.jainelibrary.org
| SR No. | 001564 |
| Book Title | Munisuvratasvamicarita |
| Original Sutra Author | Chandrasuri |
| Author | Rupendrakumar Pagariya, Yajneshwar S Shastri, R S Betai |
| Publisher | L D Indology Ahmedabad |
| Publication Year | 1989 |
| Total Pages | 376 |
| Language | Sanskrit |
| Classification | Book_Devnagari, Literature, & Story |
| File Size | 9 MB |