Page Text
________________
९४
कुबेरदत्तचरियं रूवं गरिमाय' इमं चिट्ठइ उभयं पि वन्नियं पुब्वं । बल-सत्त-सरूवं संपयं तु साहिज्जए कमसो ॥३०१०।। तत्थ बलस्स परिक्खा नज्जइ विहिणा इमेण हत्थीणं । कणयस्स व रुप्पस्स व तंबस्स व पलसहस्साई ॥३०११।। अट्ठारस-पट्ठीए आरूढाइं वहेइ जो हत्थी । लीलाए च्चिय' दसजोयणाई सो उत्तमबलड्ढो ।।३०१२।। चोद्दस सहस्स भारं गहिउं जो जाइजोयणे सत्त । मग्गम्मि एस हत्थी मज्झिमबलसंजुओ नेओ ॥३०१३।। जो दससहस्सभारं गहिऊणं जाइजोयणे पंच । मग्गाम्म एस हत्थी जहन्नबलसंजुओ नेओ ॥३०१४।। अहवा खाइरखंभं सीसयखंभं व निव्वणं सरलं । बारसरणिपमाणं सतिहाए दोन्नि हत्थे उ ॥३०१५।। परिणाहेणं कलियं चउरो हत्थे महीयलनिहित्तं । जो भिदइ उक्खणिउं पाडइ वा सो बलप्पवरो ॥३०१६।। तं चिय सड्ढतिहत्थं भूमिगयं उवरिदुगुणदीहत्तं । दो हत्थदोन्निअंगुलपरिणद्धं जो करीखंभं ॥३०१७।। भिदइ उक्खणिऊणं खिवइ व सिग्घं पि मज्झिमबलो सो।तं पिति हत्थनिहित्तं भूमीए उवरि दुगुणं तु।३०१८।। पढमुत्तपमाणाओ थूल अद्धेण जो तहा कुणइ । सो कुंजरो बुहेहिं जहन्नबलसंजुओ नेओ ।।३०१९।। इन्हि कहेमि सत्तं तं हिययअदीणया सरूवं तु। एयं परिक्खियव्वं करिणो इमिणा विहाणेण ।।३०२०।। उवलेहिं इट्टयाहि व विणिम्मियं फलयलोहघणबद्धं । कारेऊणं थडयं दढं ति हत्थूसियं लठ्ठ ॥३०२१।। वित्थारेण छ हत्थं चोद्दसहत्थाययं विहियपरिहं । सरवायदुगं सोहियभूमियलं सव्व पासेसु ॥३०२२॥ तस्स थडयस्स उभओ पासेसु निवेसिऊण करिजुयलं। कारियवरसिंगारं समत्थआरोहयसणाहं ॥३०२३।। ढोइज्जइ अन्नोन्नं जुज्झ कए तत्थ दंतखयदेहो । वेयणमसरिसमुप्पज्जमाणमवगन्निऊणं पि ॥३०२४।। करदंतनिवाएहि थडयं जो भंजिउं समीहंतो। पडिकुंजरं निहंतुं सरइ पुरो नो अवक्कमइ ।।३०२५।। घाएसु पडतेसु वि पडिघायं चेव कुणइ पुण रुत्तं । गलगज्जिरवाऊरियदियंतभाओ पयत्तेण ॥३०२६।। महथा विणियत्तिज्जइ तओ पएसाओ कुंजरो किर जो । एसो उत्तमसत्तो नेओ करिलक्खणन्नूहि ।।३०२७।। चउरंगबलसमूहं दुद्धरवरकरिघडा महाभीमं । सम्मुहमुवसप्पंतं जवेण कयकलयलारावं ।३०२८।। दळूण अभिमुहो धाविऊण वेगेण रोसरत्तच्छो । पडिकुंजरकयदिट्ठी जो भिदइ सो वि गुरुसत्तो ॥३०२९।। सद्द लसीहपमुहं सत्तं संतासवज्जिओ जो उ । हत्थी गयं च कयगं भिंदइ तस्सुत्तमं सत्तं ॥३०३०।। पजलं जलगजाला जालसमुळंतसद्दअत्तत्थो । वियरइ वणम्मि जो सो वि उत्तमो होइ सत्तेण ॥३०३१।। परिसंकतो आरोहएण जो निज्जए पुण हढेण । संकुयमाणो दीणो जायंतो मंदमंदयरो ॥३०३२।। अवलोयइ पासाई चिक्काररवं पुणो पुणो कुणइ । दीहि लोयणेहिं पासइ पडिकुंजराभिमुहं ॥३०३३।। हयजोहरहसमूहं पडिवज्जइ पावगं व पजलंतं । एसो अहमो हत्थी न होइ संगामजोगो त्ति ।।३०३४।। एसो पुण वणहत्थी उत्तमबलवेगसत्तसंजुत्तो । अइवेगधावियस्स वि मज्झ वणे एस करी ॥३०३५।। पट्ठीए आगंतुं लहुमिलिओ तेण नज्जए वेगो। जं पुण इमस्स समुहो होऊण अहं खणे तम्मि ।।३०३६।। गयणे उप्पइऊणं पडिओ एयस्स पट्ठिभायम्मि । तत्तो वि उप्पएउं भूमी एगओ सिलाउरि ॥३०३७।। मह पयभारकंता अणेग खंडाइं सा सिला जाया । पयघायमगणिउं में पूण वलिउं धाविओ एसो ॥३०३८।। हत्थीवेगेणं चिय पट्ठीए मज्झ तेण नज्जति । बलसत्ताइं दोन्नि वि तत्थ बलं नज्जए एवं ॥३०३९।। जं दूरनहलाओ निवडियदढपायघायपीडाए । भूमीए न निवन्नो थेवं नमिउं तहेव ठिओ ॥३०४०।। सत्तं एयरस पुणो नज्जइ एवं पयाभिघाएण । बिहुरी कओ वि जमिमो पहाविओ मज्झ पट्ठीए ।।३०४१।। अन्नयरपयारेहि व बलसत्ताई इमस्स नज्जति । जं पुच्छे धरिऊणं पच्छा हुत्तो मए एसो ॥३०४२।।
Jain Education International
For Private & Personal Use Only
www.jainelibrary.org
| SR No. | 001564 |
| Book Title | Munisuvratasvamicarita |
| Original Sutra Author | Chandrasuri |
| Author | Rupendrakumar Pagariya, Yajneshwar S Shastri, R S Betai |
| Publisher | L D Indology Ahmedabad |
| Publication Year | 1989 |
| Total Pages | 376 |
| Language | Sanskrit |
| Classification | Book_Devnagari, Literature, & Story |
| File Size | 9 MB |