Page Text
________________
कुंतसीहायकहाणयं तहविय सो तुह जाणइ सामत्थं उज्जमं च केवलयं । जा पुण मह सुद्धीए अपरिन्नाणम्मि तुह अधीई ॥२५५५।। सो थेवोच्चिय दोसो इयरह पुण जायए अइमहंतो । इय पुरिसा पेसणकारणम्मि संतेवि गरुयम्मि ।।२५५६।। तुम्ह समीवे पुरिसो संपइ पेसि ओभए एसो। तं कारणेण इमिणा एयाओ च्चिय समीवाओ ।।२५५७।। मा तुम्हाणं मच्चू संपज्जउ ता इमं सुणेऊण । परवाहराए कमवि धावेयव्वं न तुम्हेहिं ॥२५५८॥ एत्तोच्चिय सिक्खविउं एवं तीए अहंपि पट्टविओ। जणणी-जणए मोत्तुं मह तइयं माणुसं किंपि ॥२५५९।। जह अन्नं न वियाणइ मज्झ समीवाओ तं गयं तत्थ । तह कहवि तेहिं सद्धि जपेयव्वं तए गूढं ॥२५६०।। एत्थागओ तओहं अकहियकज्जो न जाव पार्वमि । तुम्हाण दंसणं तो संजाओ लिगिरूवधरो ॥२५६१।। एयंतु अहिन्नाणं तुम्हं धूयाए साहियं मज्झ । जं हरिसउरपुराओ अहं नियत्ता पहे तुम्ह ॥२५६२।। परओवच्चंताणं तुरयारूढाण तइय दिणपहरे । सगडारूढा मिलिया तह पहमज्झम्मि संझाए ॥२५६३।। कम्मयरीए खित्तो मह लहु उवलो पलायणनिमित्तं । तो भणइ सूरपालो सव्वंचिय एयमहिनाणं ॥२५६४॥ अणुपमदेवीपेसियपुरिसो सूरपालमुल्लवइ । जइ सव्यमहिनाणं पडिवयणं देहि तो मज्झ ।।२५६५।। तं भणइ सूरपालो कयंवसरपट्टणस्स पडिबद्धा । पंचसया गामाणं तेसिं सब्वेसि पट्टइला ।।२५६६।। अम्हेहि समं पट्टं ति सव्वकालं पि गरुयपीईए। रायउले जं कज्जं तं मं पुच्छिय पकुवंति ।।२५६७।। किं बहुणा ते कज्जम्मि मज्झ रनो विहोंति निरवेक्खो। देसं पि समग्गं उज्झिऊण वच्चंति अन्नत्थ ।।२५६८।। तो एएसि कज्जे अहंपि तोलेमि अत्तणो सत्ति । मंडलनिओगिणो इव एए मह उवयरंति सया ।।२५६९।। पट्टइलजोगपालो मन्निज्जतो न तेत्तियमिमेहिं । जेत्तिय दूरे मन्नंति मं इमे सव्व पट्टइला ॥२५७०।। जे मज्झ हत्थमझे ते नेथा पुहइसीहरनो वि। वसवत्तिणो च्चिय सया कम्मि वि कज्जे समुप्पन्ने ।।२५७१।। अग्नेसि पि निवाणं देसा चिट्ठति तुम्ह अइबहुया । ल्हूसेयव्वा सेसा देसो एयस्स वि निवस्स ॥२५७२।। चिट्ठइ बहुओ तुम्हं ल्हूसणजोग्गो इमं वि मोत्तूण । एगं कयंबसरपट्टणस्स पडिबद्धयं विसयं ।।२५७३।। इय पडिवयणं दाउं भोयणमाई करे वि सम्माणं । तुरियं विसज्जिओ तो सो पुरिसो सूरपालेण ॥२५७४।। गंतूण कहइ अणुपमदेवीए सा वि पुहइसीहस्स । सो वि पडिवज्जिऊणं तह त्ति तं पेसइ पुणो वि ॥२५७५।। राउत्तसूरपालस्स सन्निहाणम्मि सो वि गंतूण । तं पुहइसीहवयणं नीसेसं तस्स साहेइ ॥२५७६।। सम्माणिऊण तेण वि सो पुरिसो पेसिओ पुणो नयरे । सीहउरे गंतूणं साहइ नियसामिसालाणं ॥२५७७।। राया वि पुहइसीहो हक्कारेऊण सव्वपरिवारं। वारइ कयंवसरपट्टणस्स विसयम्मि वच्चंतं ।।२५७८।। संपुन्नेसुं दिणेसुं सुहे मुहुत्तम्मि साणुपमदेवी । पसवइ पवरं पुत्तं सुलक्खणं तीए अह दासी ।।२५७९।। गंतूण पुहइसीहं वद्धावइ सो वि अंगसंलग्गं । तीसे वत्थाहरणं परितुट्ठो देइ सव्वं पि ।।२५८०।। कारइ बद्धावणयं सीहउरे पुहइसीहनरनाहो । सीहगिरिपायवत्तिसु गामाण वि पंचसु सएसु ।।२५८१॥ दिन्नं बारसमदिणे नामं पुत्तस्स कुंतसीहो त्ति । सुमिणस्स डोहलस्स य अणुरूवं पुहइसीहेण ॥२५८२॥ हरिसउरे पुण नयरे पंचत्तं उवगओ हरिसपालो। रज्जपए सिरिहरिसो अहिसित्तो रायलोएण ॥२५८३।। अवरोहे कयदोसो हरिसउराओ सुहंकरो नाम । सीहउरे संपत्तो पलाइऊणं कलायरिओ ॥२५८४।। अह कुंतसीहकुमरो अट्ठमसंवच्छरं समइकंतो। तस्स कलागहणत्थं समप्पिओ पुहइसीहेण ।।२५८५।। सव्वकला पारगओ सो जाओ थेव दियह मज्झम्मि । जहियहप्पभिई सो उप्पन्नो पुहइसीहगिहे ।।२५८६ ।। आरम्भतद्दिणाओ वड्ढइ सव्वंपि मंदिरे तस्स । धण-धन्न-दुपय-चउपय-रुप्प-सुवन्नाइयं निच्चं ॥२५८७।।
Jain Education International
For Private & Personal Use Only
www.jainelibrary.org
| SR No. | 001564 |
| Book Title | Munisuvratasvamicarita |
| Original Sutra Author | Chandrasuri |
| Author | Rupendrakumar Pagariya, Yajneshwar S Shastri, R S Betai |
| Publisher | L D Indology Ahmedabad |
| Publication Year | 1989 |
| Total Pages | 376 |
| Language | Sanskrit |
| Classification | Book_Devnagari, Literature, & Story |
| File Size | 9 MB |