Page Text
________________
सिरिमुनिसुव्वयजिणिदचरियं तो अवसरं विसज्जइ निवासठाणम्मि वच्चइ नियम्मि । कयभोयणे विसज्जिय सिलियावसरे य तम्मि निवे॥ आगंतूणं कीरो काउं गोटि खणं समं तेण । वच्चइ उववण मज्झे राया वि खणंतरस्संते ॥२१९७।। गंतुं पिउणो पासे ठाऊण खणंतओ नियत्तेउं । पुण अत्थाणं दाउं विसज्जिउं जाइ वासगिहे ।।२१९८।। इय निच्चंपि कुणंतस्स तस्स ताओ दिणम्मि सत्तमए । पत्तो निहणं सक्कारिओ य रायाइलोएण ।।२१९९।। जेटूकुमरो वि सेवं पिउणो काऊण तेत्तिय दिणाणि । निवविरहियवेलाए ताय परोक्खे ठिओ स गिहे ।।२२००। देसंतरगमणाई रायंतरकड्ढणाइचितेउं । सव्वमणत्थं पच्छा नियत्तचित्तो समीहोउं ।।२२०१॥ नियमभितरपुरिसं सिक्खविउं पेसए निवसमीवे । गंतूण सो निवेयइ निवइ पुरो जह अहं तुज्झ ।।२२०२।। जेद्रेण भाउणा पेसिओम्हि सो एरिसं कहावेइ। जह जीवंतो ताओ इमं मए आसि विन्नत्तो ॥२२०३।। सग्गं गयाण तुम्हं काएण समं अहं पि कर्मोसु । आरुहिउं तुम्हं चिय पासम्मि समागमिस्सामि ।२२०४॥ ताएण तओ भणियं जणाण आहाणओं इहं अत्थि । जं गोट्ठी मथाणं संग्गगमो जायए नेय ।।२२०५।। तो तुह भाया राया जं भणइ तए तमेव कायव्वं । एसो तायाएसो मए पवन्नो कयंजलिणा ॥२२०६।। इय सोउं सो राया मुइयमणो पत्तलं लिहावेउ। अइ विउलसारदेसस्स तस्स हत्थे समप्पेइ ॥२२०७।। वत्थाभरणं पउरं च अप्पिउं तं भणावए एवं । जह तुब्भे गंतूणं जहासुहं वसह नियदेसे ।।२२०८।। अह सो पुरिसो गंतुं जेट्टकुमारस्स पत्तलाईयं । सव्वं समप्पिऊणं निववयणं साहए सयलं ॥२२०९।। सो वि तहेव अणुटुइ जेट्टकुमारो निवस्स आएसं । अह अन्नया नरिंदो तं कीरं जंपए एवं ॥२२१०।। तुझुवयाराण मए अणुरूवं नत्थि कि पि निम्मवियं । तो तुह महग्घलहुरयणमालियं बंधेमो कंठे ।।२२११।। कीरेण तओ भणियं नरवर! चुक्कोसि मज्झ तं नूणं । बुद्धीए मारेउं जं वंसि मं तुम इण्हि ।।२२१२।। रना भणियं कह तो कोरो जंपेइ रयणलोहेण। बाणेण कोइ हणिउं मं निहणं नेइ नियमेण ।।२२१३।। भणइ निवो जह मज्झ उववणे कोवि जीवजाईणं। घायं खिविउं न लहइ मा वच्चसु तो तुम बाहिं ।।२२१४।। मोत्तूण उववणं तस्स चेव मज्झे रमाहि सेच्छाए । कीरो भणइ नरेसर मं सकए को वि तुह आणं ।।२२१५।। न य लंघेइ सयन्नो अद्वेण वि तं जओ कवड्डाण । लब्भइ अइप्पभूयं चउहट्टयमज्झ वित्थरियं ।।२२१६।। मइमारियम्मि वि पुणो मज्झ सरीरम्मि होइ. जावइयं । पिसियं तावइयं नूण लब्भए अट्ठचाएण ।२२१७।। ता तस्स निमित्तं मं न को वि हणिही नरिद ! नियमेण । किंतु अइदुलहसुमहग्घरयणलोहेण निहणेही ॥२२१८।। लद्धण कं पि समयं तहाविहं जत्थ पेक्खइ न अन्नो। कडिवट्टयपक्खित्तं पच्छानेउ निय गिहम्मि ।।२२१९।। तह कह वि सो करेही वहगो न तुम पि जह वियाणासि । कम्मि वि काले कस्स वि पासाओ मज्झ वुत्ततं ।।२२२०। तत्तो चितिहिसि तुमं नरेसर! नियम्मि चित्तम्मि । जह सो कीरो पगओ पलाइउं पुव्व नियठाणे ।।२२२१॥ तिरियाण वणयराणं पासम्मि न अस्थि सव्व सोयाई । ता मज्झ दुगं जुगवं पि जायए निव ! अणि?यरं।।२२२२॥ एक्कं पाणविणासो दुइयं पुण पुव्वकहिय अववाओ । तो नरनाह! अहं कह महासमुइं तरेऊण ।।२२२३।। बुड्डामि संपयं गोपम्मि जो रक्खिओ मए अप्पा । गरुयअवाएहितो तं कह इण्हि विणासेमि ।।२२२४॥ रना भणियं जइ तुह पडिहासइ नेय संगयं एयं । देसस्स सामियं तं करेमि तो कस्सइ गुरुस्स ॥२२२४।। जम्हा सुव्वइ लोए कत्थइ राया भुयंगमो अस्थि । आयन्निज्जइ अन्नत्थ मंकडो मणुयनमणिज्जो ।।२२२६।। एए जहा तिरिक्खा वि दोवि पालेंति मंडलवइत्तं । मज्झ पसाएण तुमं पि कीर तह होसु देस पहू ॥२२२७।।
Jain Education International
For Private & Personal Use Only
www.jainelibrary.org
| SR No. | 001564 |
| Book Title | Munisuvratasvamicarita |
| Original Sutra Author | Chandrasuri |
| Author | Rupendrakumar Pagariya, Yajneshwar S Shastri, R S Betai |
| Publisher | L D Indology Ahmedabad |
| Publication Year | 1989 |
| Total Pages | 376 |
| Language | Sanskrit |
| Classification | Book_Devnagari, Literature, & Story |
| File Size | 9 MB |