________________
७०
सिरिअणंतजिणचरियं देव ! दुवारे दूओ नहेण पत्तो कुमारकडयाओ । तुम्ह पयदंसणत्थी ता आणं देह तव्विसए ॥ ८६७ ॥ रायाह तं विमुंचसु झड त्ति जह कहइ मह सुयपउत्तिं । तो पडिहारविमुक्को दूओ रायंतियं पत्तो ॥ ८६८ ॥ महिमिलियमउलिमंडलमभिनमिय पहुक्कमे समुवविट्ठो । कुसली कुमरो त्ति निवेण जंपिए नमिय विन्नवइ ॥ ८६९ ॥ देव ! तुह पायपंकयपरायपभवप्पसायफुरिएण ।। कुसलं तस्स सया वि हु चउविहसेणासमेयस्स ॥ ८७० ॥ रायाह कहसु ता एय ठाणाओ निग्गमाइवुत्तंतं । निययागमणं तं तो सो पुहुणो साहिउं लग्गो ॥ ८७१ ॥ पत्तो देवाएसा कमलपुरमहम्मि पत्थिओ कुमरो । निवकमलकेसरसुयाकमलावलिपरिणयणकज्जो ॥ ८७२ ॥ अणवरयपयाणेहिं कासीदेसावयंससंकासे । अप्पमिव सिरिविजयावहम्मि नयरम्मि संपत्तो ॥ ८७३ ॥ तन्नयरविजयसेहरनरिंदगोरव्वं विइन्नआवासो ।। आवासिओ कुमारो गुड्डरपडमंडवविचित्तो ॥ ८७४ ॥ संज्झाए सहासीणे कुमरे पडिहारसूइओ पत्तो । कमलपुराओ दूओ नमिउं विन्नवइ कुमरमिमं ॥ ८७५ ॥ देवाहं कमलपुराओ पेसिओ कमलकेसरनिवेण । तुम्ह सयासे कज्जेण जेण आयन्नह तमिहि ॥ ८७६ ॥ तुम्हाणं जा विइन्ना कन्ना कमलावली विवाहत्थं । सा दिवसपंचगोवरि पकीलिउं भवणमारूढा ॥ ८७७ ॥ सद्धिं सहीयणेणं जा चिट्ठइ बहुविणोयवक्खित्ता । ता नहयलाओ पडिया एगा नवजुव्वणा रमणी ॥ ८७८ ॥ निठुरमणिकुट्टिमघायजायमुच्छा विमीलियच्छिजुया । लक्खिज्जइ दूरनहागमणस्समजायनिंद व्व ॥ ८७९ ॥
Jain Education International
For Private & Personal Use Only
www.jainelibrary.org
