________________
सिरिअणंतजिणचरियं अहमच्चंतविवेई वि नायनिस्सेससमयकारो वि ।। परभवविमुहो जाओ लच्छी लुद्धो नडनरो व्व ॥ ८४१ ॥ रज्ज-पिया-पुत्ताइसिणेहबंधणनिबद्धमुत्तीण ।।
अम्हारिसाण ठाणं कत्तो सग्गापवग्गेसु ॥ ८४२ ॥ एयव्वमणुच्चरियस्स पडणधम्मस्स नियमसरीरस्स । सारं तं चिय कीरइ भवभयहरणं जमप्पहियं ॥ ८४३ ॥ ता जीवियस्स गिण्हामि फलमहं चरियचारुतवचरणं । इय चिंतिय उत्तिन्नो पासायग्गाओ अवणिवई ॥ ८४४ ॥ उवविसिय सहासीहासणम्मि वाहरिय पुत्तमिय भणइ । वच्छ ! पवज्जसु रज्जं पव्वज्जमहं जओ काहं ॥ ८४५ ॥ इय जंपिऊण पुत्तं अणिच्छमाणंपि ठविय नियरज्जे । निस्सेसजिणिंदाणं काऊणट्ठाहियामहिमं ॥ ८४६ ॥ दाउं दीणाईणं दानं सम्माणिऊण समणसंघं । आरूढो सिबियाए फुरंतघणरयणकिरणाए ॥ ८४७ ॥ पेच्छणए पेच्छंतो वज्जिरतूररवपूरियदियंतो । तित्थं पभावयतो नर-खेयररिद्धिचाएण ॥ ८४८ ।। तत्थ कयवरिसयालाणुवस्सए समयसारसूरीण ।। पत्तो मुत्तुं सिबियं नमिय गुरुं जायए दिक्खं ॥ ८४९ ॥ तो सपिओ कइवयरायसंगओ दिक्खिओ गुरूहि सयं । . संगहियदुविहसिक्खो जाओ सिग्धं पि गीयत्थो ॥ ८५० ॥ निम्मलमइणा तेणं अंगोवंगप्पइन्नयाईयं । पढियमसेसं पि सुयं सुओ य सव्वो वि हु तयत्थो ॥ ८५१ ॥ निस्सेसदेसभासाविसेसनाया नयज्जियजसोहा । सूरिपए संठविओ गुरूहिं जोगो त्ति रायरिसी ॥ ८५२ ॥ तो मुणिमंडलकलिओ विहरइ गयणंगणेण देसेसु । जइधम्म गिहिधम्मं च देइ पडिबोहिउं भव्वे ॥ ८५३ ॥
Jain Education International
For Private & Personal Use Only
www.jainelibrary.org
