________________
६७
गिहिधम्मे चंदसेणकहा पसरंति बलायाओ जम्मि समं सुरधणूहिं जलयतले । वियसंति कयंबदुमा सद्धिं पामरकुडुंबेहिं ॥ ८२८ ॥ सोहइ सइंदगोवा सजलकणा नीलतणभरा धरणी । सपउमराय व्व समोत्तिय व्व जत्थिंदनीलमही ॥ ८२९ ॥ जंबुद्दुमावली पक्कफलहभराधरियदलगणा जत्थ । आभाइ जलभरेणं महीए पडिया घणालि व्व ॥ ८३० ॥ एवंविहे समंता वरिसायाले विरायमाणम्मि । आसारनीरधाराधोयपुरीपेच्छणनिमित्तं ॥ ८३१ ॥ पासायसिरे राया आरूढो मंतिमंडलियकलिओ । अवलोइय गयणयलं सामलियं मेहमालाहिं ॥ ८३२ ॥ पेच्छइ बलाहयालिं नवघणमंडलतालपरिचलंति । गिम्हनिवविजयपत्तं पाउसनिवजयपडायं व ॥ ८३३ ॥ आयन्नइ गज्जंतं मेहं भोइयमुइंगविंदं व । . तच्छंदेण नडे विव नच्चंते नियइ बहुसिहिणो || ८३४ ॥ एत्थंतरम्मि दुस्सत्थतडयडारावभीमभयजणया । पडिया झड त्ति विज्जू निवनियडट्ठियभडस्सुवरि ॥ ८३५ ॥ तज्जालोलिपलित्तो सो संपत्तो झडत्ति पंचत्तं । रायाईण वि जाओ सबाहिरब्भतरो तावो || ८३६ ॥ गोसीसचंदणालेवणाइणा सत्थया कया रन्ना । दिन्नो भडस्स अग्गी नेउं पच्छिमदुवारेण ॥ ८३७ ॥ तो चिंतियं निवइणा मरणं तो एस आगओणत्थो । उव्वरिओ हं केणावि कुसलकम्मेण जीवंतो || ८३८ ॥ एसो जहा वराओ मओ तहा हमवि जइ विवज्जंतो । तो रज्जमहापावक्कंतो नरयम्मि निवडतो ॥ ८३९ ॥ एवंरूवअतक्कियअणत्थपत्थारियुत्थदुत्थत्तं ।। नाऊण नूण जाया विवेइणो चित्तसामन्ना ॥ ८४० ॥
Jain Education International
For Private & Personal Use Only
www.jainelibrary.org
