________________
७४४
सिरिविजयसेणसूरी बीओ ससिसेयकित्तिभरभूरी । एगंतरोववासी तक्कालंकारसमयन्नू ।। ९५६२ ।। उद्दामदेसणज्झणिपडिबोहियसव्वभव्वविसरस्स । तस्स कणिट्ठो सिरिनेमिचंदसूरी वि मंदमई ॥ ९५६३ ॥ ताण तुरीओ जसदेवसूरिनामो मुणीसरो मइमं । लक्खणछंदालंकारतक्कसाहित्तसमयन्नू ॥ ९५६४ ॥ सिरिविजयसेणमुणिवइपयम्मि सिरिनेमिचंदसूरीहिं । ठविओ समंतभद्दाभिहाणसूरी गुणावासो ॥ ९५६५ ॥ पत्तो य जिणहरालंकियम्मि कुडकच्छले पुरे आसि । गुज्जरवंसुप्पन्नो सेट्ठी नामेण संवहरी ॥ ९५६६ ॥ लोओवयारकरणप्पवणो पवणो अनायरयहरणे | पवरमणिपरीहारा हारामलसीलकलिओ जो ।। ९५६७ ॥ उवसंता पर भत्ता जिणदेवी नामिया पिया तस्स । चत्तारि तीए जाया पुत्ता हरिबाहुदंड व्व ॥ ९५६८ ॥ पढमो कुमारनामो कलावियड्ढो सुओ कुमारो व्व । बीओ साओ य सिट्ठी तस्स कणिट्ठो गुणगरिट्ठो ॥ ९५६९ ॥ तइओ य सव्वदेवो जेउय नामो चउत्थओ तेसिं । सीलसमलंकियंगी भइणी वि हु मल्हुया नाम ।। ९५७० ॥ भज्जा गुणसंपन्ना संपुन्ना नामिया कुमारस्स । ठक्कुर-वोसरिसब्भुयनामाणो नंदणा तीए ।। ९५७९ ।। कंता जिणदेवमई देवमई साउयस्स विक्खाया । तीए नय व्व जाया पुत्ता चत्तारि सिरिभवणं ॥ ९५७२ ॥ पढमो नेमिकुमारो समुवज्जियचारुकित्तिपब्भारो । बीओ य वीरनामो गुणरयणाभरणअभिरामो || ९५७३ || तईओ य अप्पमत्तो मत्तो नामेण जिणमयासत्तो । धम्मत्थव्वईयणो चउत्थओ वद्धणो तेसिं ॥ ९५७४ ॥
Jain Education International
सिरिअणंतजिणचरियं
For Private & Personal Use Only
www.jainelibrary.org
