________________
गिहिधम्मे चंदसेणकहा माणिक्कमए तम्मि अवरावररामणीयगं कुमरो । अवलोयंतो चडिओ कट्टेण सुदुग्गसिंगग्गे ॥ ५६९ ॥ तम्मि घणसार-चंदण-एलागुरु-नाग-जाइसरलाण । कंक्कोल-लवंग-तया-तमाल-किम्मीरि-तगराण ॥ ५७० ॥ अंबय-जंबुय-जंबीर-कयली-नारंगि-नालिएरीण । विज्जउरी-खज्जूरी-दाडिम-अक्खोड-दक्खाण ॥ ५७१ ॥ बहुपत्तपुप्फफलभरअवणमिरसमग्गगरुयसाहाहिं ।। सुरकिन्नर-विज्जाहर-मिहुणाऽऽसीयसीयछाएहिं ॥ ५७२ ॥ सुय-रायहंस-सारस-चओर-सिहि-सारियाइपक्खीहिं । रमणीएहिं बहुविहआरामेहिं विलसमाणे ॥ ५७३ ॥ वियसंतकमल-कुवलय-कल्हारुल्लसियसुरहिगंधसरो । हरिसिज्जंतो गच्छइ कुमरो विच्छिन्नभूमीए ॥ ५७४ ॥ (कुलयं) मचकुंद-कुंद-सयवत्त-जाइ-बउलाइमलयमज्झम्मि । अवलोयइ सच्छफलिहमणिसिलामयजिणाययणं ॥ ५७५ ॥ जं उदयरायधरतरणिकिरणपसरेण पिंजरिज्जंतं । रेहइ परिविलसिरपुस्सरायरयणोहरइयं व ॥ ५७६ ॥ जं संज्झागयपभावजायचउपाससोणसब्भावं । सहइ समंतामसिणियघुसिणरसासारसित्तं व ॥ ५७७ ॥ जं पुन्निमरयणीयरजोण्हाभरमिस्सियं समग्गं पि । मुत्तासेल-मणिसिला-सहस्सनिम्मियमिवाभाइ ॥ ५७८ ॥ जं चउदिसि परिसंठियमाणिक्कमयाहिं देवउलियाहिं । अनिलचलद्धयरणरणिरकिंकिणीयाहिं परियरियं ॥ ५७९ ॥ दारपएसपरिट्ठियमणितोरणसेणिजणियसोहाए । पुक्खरिणीए चउजलपवेसदाराए रेहं व ॥ ५८० ।। तं दटुं हरिसुक्करिसभरपरायत्तमाणसो कुमरो । वावीजलपक्खालियगत्तो पविसइ जिणाययणे ॥ ५८१ ॥
Jain Education International
For Private & Personal Use Only
www.jainelibrary.org
