________________
७१६
सिरिअणंतजिणचरियं
गुरुरायरसियहियएण दूरपरिहरियधम्मकज्जेण । न निरंतरं विहेओ कामे तिव्वाहिलासो वि ॥ ९२०२ ।। तह कामसत्थभणिओवगरणकरणेहिं नेव कायव्वा । सद्देहअणंगकीला थीधणकारकारुवयणेसु ॥ ९२०३ ॥ वज्जेयव्वं सुस्सावएहिं संसारवेल्लिवुड्ढिकरं । परजणविवाहकरणं कन्नाहललोहलुद्धेहिं ॥ ९२०४ ॥ एए पंच अइयारा एय वयपालणुज्जयमणेहिं । सम्मं वियाणियव्वा नाऊण परिच्चएयव्वं ॥ ९२०५ ॥ परदारवज्जिएहिं जाणिय इहलोयपरभवभएहिं । अच्चब्भुयरूवधरा निरिक्खियव्वा न पररमणी ॥ ९२०६ ॥ नियजणणीए वि समं नेगते मंतणं विहेयव्वं । दूरे पररमणीए जम्हा एयारिसं भणियं ॥ ९२०७ ॥ मात्रा स्वना दुहित्रा वा न विविक्तासनो भवेत् । बलवानिन्द्रियग्रामः पण्डितोऽप्यत्र मुह्यति ॥ ९२०८ ॥ परदारवज्जयनरो होइ पवित्तो जणे जसं लहइ । निव्वत्तइ असुहकम्मं समुवज्जइ सिद्धिसोक्खं च ॥ ९२०९ ॥ कहियं इमं चउत्थं अणुव्वयं तुज्झमप्पभेयं पि । इण्हि तु पंचम-व्वय-विसए किं पि हु पयंपेमि ॥ ९२१० ॥ खित्ताइहिं रन्नाई-धणाइदुपयाइ-कुप्परूवं च । पंचप्पयारमेयं परिग्गहं मुणसु नरनाह ! ॥ ९२११ ॥ एयम्मि मुच्छिया जं भमति संसारगुविलकंतारे । कज्जं तेण परिग्गहपरिमाणं भव्वसत्तेहिं ॥ ९२१२ ॥ खेत्तं तिविहं सेउं केउं उभयं च आइसद्दाओ । वत्थु पि तिहा खायं ऊसियमुभयं च विन्नेउं ॥ ९११३ ॥ एगाइणा विहेयं परिमाणमिमाण सावएण सया । जेण रसायलदारणमच्चंतं पावसंजणयं ॥ ९२१४ ॥
Jain Education International
For Private & Personal Use Only
www.jainelibrary.org
