________________
४४
सिरिअणंतजिणचरियं जा चंदउरपुरनहं लंघेमि अहं अहोनिहियदिट्ठी । तावायन्नेमि बहुं तन्नरनारीणमक्कंदं ॥ ५३० ॥ तं सोउं कन्नजुयं फुडइ व दलइ व्व मह मणं सहसा । तो ओयरिय मएक्का रुयणत्थं पुच्छिया रमणी ॥ ५३१ ॥ तीयुत्तमज्ज ! मत्तेण हत्थिणा चंदसेणनिवपुत्तो । उल्लालिऊण खित्तो गयणे उड्ढं चिय गओ सो ॥ ५३२ ॥ केणइ अद्दिस्सेणं सुरेण असुरेण खेयरेणऽहवा । नीओ जोइणिचक्केण वा, जओ न वलिओ कह वि ॥ ५३३ ॥ रज्जं पि निराहारं जेणेक्को चेव सो सुओ रण्णो । तेणऽक्कंदइ लोओ सबालवुड्ढो वि निवपमुहो ॥ ५३४ ॥ तो हं सविसायमणो चलिओ तुज्झे वि इह मए दिट्ठा । एयत्थं चिय भणियं सिद्धं कज्जं ति नरनाह ! || ५३५ ॥ तयमग्गागयनहयरवयणेणं वज्जपहरसरिसेण । आगय मुच्छो व्व खणं देवाहमचेयणो व्व ठिओ ॥ ५३६ ॥ तो तं गंतूण मए कहियं मणिमउडखयररायस्स । तं सोउं सो वि ठिओ खणमेत्तं चत्तपाणो व्व ॥ ५३७ ॥ होउं दढचित्तो सो सरेइ आभोइणिं महाविज्ज । विज्जुभरपिंजरपहा तो सा पत्ता नरिंदपुरो ॥ ५३८ ॥ दिन्नासणे निविट्ठा पुट्ठा कुमरावहारवुत्तंतं । नाणेण जाणिउं सा कहिउं लग्गा खयरपहुणो || ५३९ ॥ उत्तरसेणीपहुनयणवेगदूओऽवमाणिओ (संतो) । पत्तो नियपहुपासे, विन्नत्तं तेण तत्थ इमं ॥ ५४० ॥ दाहिणसेणीरन्ना दिन्ना कन्ना न देव ! तुह तेण । विणयप्पणइपुरस्सरमइबहुमब्भत्थिएणावि ॥ ५४१ ॥ विन्नाय भूमिगोयरनरिंदचंदावयंसयसुयस्स । असमीहतस्स वि चंदसेणकुमरस्स आयरओ ॥ ५४२ ॥
Jain Education International
For Private & Personal Use Only
www.jainelibrary.org
