________________
६८४
सिरिअणंतजिणचरियं एयं पवयणसारं काउमसत्तो समग्गमवि भव्यो । एक्कं चिय जिणपूयं कुणमाणो लहइ सिवसोक्खं ॥ ८७८७ ॥ वासक्खय-जल-फल-दीव-धूव-नेवज्ज-कुसुमभेएहिं । अट्ठप्पयारपूर्य कुणंति भव्वा जिणिंदाणं ॥ ८७८८ ॥ सव्वाओ वि असत्तो काउं नेवज्जपूयमेक्कं पि । कुव्वंतो दुक्कम्मं पाणी पडिहणइ सव्वं पि ॥ ८७८९ ॥ भुज्जइ जं वा तं वा रविउदयत्थमणमज्झयारम्मि । दिज्ज्जइ जिणस्स ता भो कयाइ थोवं पि पुन्नकए ॥ ८७९० ॥ पाविज्जइ परलोए अणंतमप्पं पि इह भवे दिन्नं । धन्नं ववियं थोवं पि फलइ तं नूण बहुगुणियं ॥ ८७९१ ॥ नियविहयसमुचिएहिं महुराहारेहिं मोयगाईहिं । जिणमच्चंता सासयतित्तिं पावंति भणियं च ॥ ८७९२ ॥ "खणतित्तिएण लब्भइ नेवज्जेणं जमक्खया तित्ती । तं सासयसिवसुहतित्तिं तित्थनाहस्स माहप्पं ॥ ८७९३ ॥ ता जइ सासयसिवसुहतित्तिं वंछसि अहो महासत्त ! । ता कुणसु देवपूयं दाउं भत्तीए नेवजं ॥ ८७९४ ॥ सो आह अज्ज पत्ता चिंतामणिकामधेणुकप्पडुमा । रन्नम्मि वि जं जायं मह पहु तुह दंसणममोहं ॥ ८७९५ ॥ ता इहपरलोयहियं कहियं तुब्भेहिं जं तयं काहं । को नाम सिरिमुर्विति पहणइ पायप्पहारेण ॥ ८७९६ ॥ इय जंपिय नमिय मुणिं चलिओ संदणपुरम्मि संपत्तो । मोयाविय सालिप्पिय बहुयं गहिउं तयं वलिओ ॥ ८७९७ ॥ गुरुवेयवाहणेहिं थेवदिणेहिं पि नियपुरे पत्तो । पणमित्तु मोयगा सासुयाए बहुयाए उवणीया ॥ ८७९८ ।। तीए वि सयणभवणेसु पेसिया समुचियक्कमेणंते । अहवा उचियायरणं कुलंगणाणं कुलायारो ॥ ८७९९ ॥
Jain Education International
For Private & Personal Use Only
www.jainelibrary.org
