________________
६८२
सिरिअणंतजिणचरियं
एत्थंतरे निसन्नो उस्सग्गं पारिऊण साहू वि । भणियं च देवयाए पुणरुत्तं पणमिणमिमं ॥ ८७६१ ॥ पहु ! अहमिमाए अडईए सामिणी इह समागएण तए । नूण कया पवित्ता असमप्पसमेक्करसिएण ॥ ८७६२ ।। एसो हु पच्चणीओ पावप्पा कोइ तुम्ह हणणत्थं ।। इंतो एवं विहिओ मए अदिस्साए खलिऊण ॥ ८७६३ ॥ भणइ मुणीकयकरुणा देवि ! इमं मुयसु जाव नो मरइ । उवसग्गसहणकज्जे आगच्छामो वयं जमिहं ॥ ८७६४ ॥ साहुण अलंकारो खंति च्चिय देवि ! नो पुणो कोवो । उवसग्गपरे नूणं तीए विसओ जओ भणियं ॥ ८७६५ । जं खमसि दोसवंते सो तुह खंतीए होइ अवयासो । अह न खमसि को तुह अविसयाए खंतीए वावारो ? || ८७६६ ॥ मुत्तुं मुणिमज्जायं कोवं थोवं पि जइ जई कुणइ । ता सुतवाइसव्वं निरत्थय तस्स जेणुत्तं ॥ ८७६७ ॥ पढउ सुयं धरउ वयं कुणउ तवं चरउ बंभचेराई । तह वि तयं सव्वं पि हु निरत्थयं कोववसयस्स ।। ८७६८ ॥ अम्हाण देवि ! एयं वयसव्वस्सं रिउम्मि कुविए वि । अक्कोसाइं कुणंते लाहो त्ति विभावणं जेण ॥ ८७६९ ॥ अक्कोसहणणमारण-धम्मभंसाण बालसुलभाण । लाभं मन्नइ धीरो जहोत्तराणं अभावम्मि ॥ ८७७० ॥ अम्हाण मोक्खपुरत्थियाणमेएण काउमारद्धं । साहेज्ज मओ एसो उवयारी मुंच ता एयं ॥ ८७७१ ॥ सोऊण साहुदेसणमसमप्पसमामयपवहसरिसं । रंजियहियया देवी पयंपिउं एवमारद्धा ॥ ८७७२ ।। धन्नो सि तुम मुणिरयणतिव्वतवतेयलद्धिजुत्तो वि । काउं खम्ममियमवयारयं पि मित्तं व मोइंतो ॥ ८७७३ ॥
Jain Education International
For Private & Personal Use Only
www.jainelibrary.org
