________________
सिरिअणंतजिणचरियं तो सव्वे वि हु खेयर-नरेसरा नमियरायपयपउमा । कयसम्माणा रयणासणेसु जहजोग्गमुवविट्ठा ॥ ५०५ ॥ (कुमारपत्ती विज्जाहररायकुमारी) इत्थंतरम्मि सिंगारियंगखयरंगणागणाणुगया । नवरंगयनीरंगी ईसीसिद्दिस्समुहकमला ॥ ५०६ ॥ नियदेहाओ सोणाभरणमणिप्पहभरं परिकिरती । बाहिं परिक्खिवंती पेच्छइ लोयाणुरायं व ॥ ५०७ ॥ .. कणयाभरणपरिप्फुरियकतिपब्भारपूरियदियंता । दिसि दिसि झंपसमुट्ठियनिरब्भविज्जु व विरयंती ॥ ५०८ ॥ मुत्ताहारावलिदित्तिसंतइफुरणधवलियदियंता । निस्सेसजणहियकरं विवेयमुल्लासयंति व्व ॥ ५०९ ॥ मंद मंदं कलहंसमंथरक्कमगईए संपत्ता । खयराहिरायतणया पणमइ नरनाहपयपउमं ॥ ५१० ॥ (कुलयं) कहियं नियडेहिं जहा देवेसा कुमरभारिया नमइ ।। तो से रन्ना दिन्ना भव पुत्तवईत्ति आसीसा || ५११ ॥ ससुरासीसं तुट्ठा नमिऊणं सासुयं सयासेसे । वामंगे उवविट्ठा नियचेडीचक्कपरियरिया ॥ ५१२ ॥ भणिओ कुमरो रन्ना, वच्छ ! गयुल्लालिए तए अम्हं । सव्वस्स वि लोयस्स य जायं मरणंतमइदुक्खं ॥ ५१३ ॥ ता वच्छ ! जेण हरिउं णीओ जत्थ ट्ठिओ सिरीए वा । तं सव्वं चिय साहसु सकोउगो जेणिमो लोगो ॥ ५१४ ॥ तो कुमराएसेणं कुमरकहं वज्जसारखयरवई । साहइ निवस्स नमिउं आभोइणिविज्जाय विन्नायं ॥ ५१५ ॥ पहु ! वेयड्ढे उत्तरसेणीवरगयणवल्लहपुरम्मि । अमुणियदिणरयणिम्मि मणिभवणपहासयालोया ॥ ५१६ ॥
Jain Education International
For Private & Personal Use Only
www.jainelibrary.org
