________________
६६८
सिरिअणंतजिणचरियं जंपति दोवि नियजोग्गयाणुमाणेण तुम्हमाएसं । काहामो भयवं ! जं सुकएणम्हेहिं तं पत्तो ॥ ८५८१ ॥ इय जंपिय भत्तीए मं नमिउं दब्भभारए गहिउं । दोन्नि वि गयाई गेहे भद्दगभावेण वटंति ॥ ८५८२ ॥ नयरप्पहाणजिणदत्तसेट्ठिणो मंदिरम्मि कम्माइं । कुव्वंताणं ताणं दोन्ह वि दीवूसवो पत्तो ॥ ८५८३ ॥ दाऊण सेट्ठिणा सालि-सूअ-घय-पमुहमेवसुत्ताई । सगिहे भुंजह जह जाइ तुम्ह वरिसो वि सोक्खेण ॥ ८५८४ ॥ ते बिंति अम्ह दंससु जिणेसरं सेठिं जेण तस्स पुरो । काऊणं घएणं दीवयं वयं सुकयमज्जेमो ॥ ८५८५ ॥ दठूण धम्मबुद्धिं जाओ तेसिं कयायरो सेट्ठी । "गरुयाई परम्मि वि पक्खवाइणो किं न धम्मपरं ॥ ८५८६ ॥ इण्हि पि चलह इय भणिय तेहिं सह जिणहरम्मि संचलिओ । "अवरं पि पत्थियं कुणइ सज्जणो किं न पुण धम्मपरे ॥ ८५८७ ॥ तिन्नि वि पत्ताई नियंति रुंदं जिणमंदिरं गयणयलं । भूयतरुपत्तपंतित्तियतोरणसियदुवारग्गं ॥ ८५८८ ॥ अनिलचलिरद्धयावलिकिंकिणिगणथणरणज्झणारावो । घग्घरयं खलहलस्सरमिस्सो मुहरइ नहं जत्थ ॥ ८५८९ ॥ मणिजणियदेवउलिया मंडलविप्फुरियकिरणनियरूंबो । रोहणगिरि व्व रेहइ जणपुन्नागरसिओ व्व जहिं ॥ ८५९० ॥ केवलणाणालोओ व्व जत्थ लंबंतमोत्तिउज्जोओ । फलिहमऊहसमूहो भव्वविवेओ विव विहाइ ॥ ८५९१ ॥ डज्झिरकप्पूरागरुपरिमलमांसलियसुमणसामोओ । वित्थरइ जत्थ दूरं धम्मियजणपुन्नपसरो व्व ॥ ८५९२ ॥ सेट्ठी तेहिं समेओ पविसंतो तम्मि नियइ अजियजिणं । जय जय जय त्ति भणइ य सीमंतयसंगिकरकोसो ॥ ८५९३ ॥
Jain Education International
For Private & Personal Use Only
www.jainelibrary.org
