________________
भुवनपईवनिवकहा उवसंतकंतरूवं तेसिं तं दंसणं अजियदेवं । बहिरंगअंतरंगारिवग्गनिग्गहणपत्तजसं ॥ ८५९४ ॥ एसो समग्गसग्गापवग्गसुहसंगदायगो दूरं । ता एवं पूएउं अप्पहियं कुणह ईय भणइ ॥ ८५९५ ॥ तं सोउं ताई मणप्फुरंतगुरुभत्तिभरधरंगाई । पसरियपरिओसवसुल्लसंतरोमंचनिचियाइं ॥ ८५९६ ॥ उल्लसिय अमंदाणंदजायथोरंसुपूरियच्छीणि ।। परिकलयंताई सजम्मजीवियव्वाण सहलत्तं ॥ ८५९७ ॥ सुरहिघएणं काऊण दीवए ताई दोन्नि वि मुयंति । जिणपुरओ पणमंति य पहुं महिमिलियभालाई ॥ ८५९८ ॥ (कुलयं) तयणंतरं पयाहिणपुरस्सरं नमिय रईयकरकोसो । सेट्ठी अजियजिणिंदं भत्तिभरो थोउमारद्धो ॥ ८५९९ ॥ जस्सा नमंति सिरसोणमणिपहापयडभत्तिराय व्व । अमरेसरा थुणिस्सामि तं पहुं अजियनाहमहं ॥ ८६०० ॥ मणवयणनयणहत्था ते धन्नाणं सुहा अजिय ! तुज्झ । सुमरणथवणालोयणपूयणकज्जेसु जे सज्जा ॥ ८६०१ ॥ वइसाहसेयतेरसितिहिए तं चत्तविजयवासो वि । पहु विजयोयरवास अलंकरंतो कुणसि चोज्जं ॥ ८६०२ ॥ जायं तिजयुज्जोयं तं माहसियट्ठमी निसीहम्मि ।। दठूण ससंको लज्जिओ व्व तव्वेलमत्थमिओ || ८६०३ ॥ चईय तए चललच्छि वयं कयं माहसेयनवमीए । इयरो वि अस्थिराए न रज्जए किं पुण तिनाणी ॥ ८६०४ ॥ पोसे सियाए एक्कारसीए जेउं चलहुं पहुं चंदं । लोयालोयपयासं संजायमणंतनाणं ते ॥ ८६०५ ॥ चेत्तसियपंचमीए तं सिद्धिवहू य संगमल्लीणो । इयरं पि मोहिउममलं रमणी किं केवलविरायं ॥ ८६०६ ॥
Jain Education International
For Private & Personal Use Only
www.jainelibrary.org
