________________
६४०
सिरिअणंतजिणचरियं विण संठिएण दिट्ठी पक्खित्ता तेण गेहमज्झम्मि । दिट्ठा य दीवयुज्जोयपयडिया अंगणा एगा ॥ ८२१८ ॥ हरिणिंदखाममज्झा हरिणकमुही य हरिणसमनयणी । विद्दुमअहरा पीवरपओहरा कणयवन्नधरा ॥ ८२१९ ॥ तं पेच्छिऊणमस्सावहारओ चिंतए कयत्थो सो । नियरूवसिरीअहरीकयस्सिरी जस्सिमा भज्जा ॥ ८२२० ॥ एत्थंतरम्मि दुद्धासु सयलसुरहीसु सेरहीसुं च । बद्धेसु तुरंगेसुं जणपयारे ठिए विरले ॥ ८२२१ ॥ परिवालंते अस्सावहारिपुरिसम्मि हयहरणसमयं । मंदं मंदं गेहाओ निग्गया सा मयंकमुही ॥ ८२२२ ॥ तं दटुं संचरिओ सो झ त्ति वरंडयोवरिमसाहं । आगच्छंतिं ता नियइ वडतले दारमग्गेण ॥ ८२२३ ॥ संपत्ता वडतलवियडनियडविडभडसपासे । तीए अवलोईओ सो नववयदिढदेहसंठाणो ॥ ८२२४ ॥ मयणाहिमासलामोयमणहरो रईयरम्मसिंगारो । पडिपीडियतूणीरो करकलियपयंडकोदंडो ॥ ८२२५ ॥ दठूण तयं उक्कंठियाए तक्कंठठवियबाहाए । आलिंगिऊण भणियं किं सुहय ! तुब्भेत्तिया वेला || ८२२६ ॥ सो जंपइ सुयणु ! जणप्पयारपसमं ठिओम्हि पालंतो । “अह वेरिसकज्जरओ पयडइ किं को वि अत्ताणं ?” ॥ ८२२७ ॥ तुह मोहमोहियमई मयच्छि ! अहमागओ गुरुरएण ।। “लीलावईविलासावहियमणाणं कुओ थिरया ॥ ८२२८ ॥ गयगमणि ! तुझं कज्जे मुत्तुं कंतं सिरिं च इह पत्तो । “अहवा तं सव्वस्सं जम्मि मणो निव्वुई वहइ ॥ ८२२९ ॥ सा आह कहं तुमए नाओ अपयासिओ वि संकेओ । तेणुत्तं बिंबाहरि ! आयन्नसु तुज्झ साहेमि ॥ ८२३० ॥
Jain Education International
For Private & Personal Use Only
www.jainelibrary.org
