________________
६३८
सिरिअणंतजिणचरियं मोत्तुं नियपहुपुत्तं रिउसामंता कुमारमणुसरिया । “लज्जंति जियंताणं सव्वे विरल च्चिय मयाणं” ॥ ८१९२ ॥ तो झत्ति समरवीरो रिउपुत्तो कुमरमस्सिओ सरणं । “समयाणुवत्तणं सइय नीई किं पुण ईयावाए” ॥ ८१९३ ॥ कुमरेणावि विइन्नो तप्पिट्ठीए निओ अभयहत्थो । “इयरम्मि वि निरणुसया किं पुण सरणागए गरुया ॥ ८१९४ ॥ काराविय निययाणं दिन्नं तस्सेव तज्जणयरज्जं । “असमाण च्चिय निच्चं कोवपसाया महंताण" || ८१९५ ॥ तेण वि सिंगारसिरिं भइणिं परिणाविओ नरिंदसुओ । “पच्चुवयरियव्वे नो कालविलंबं कुणइ गरुओं ॥ ८१९६ ॥ चलिओ सदेससमुहो रायंगरुहो जयज्जियजसोहो । “सिद्ध कज्जे को वा वसइ सयन्नो विएसम्मि ?” ॥ ८१९७ ॥ कुमरेण समं नवनरवई वि चलिओ सकीयबलकलिओ । “निय पहुपयसेव च्चिय मूलं लच्छीए नियमाओं ॥ ८१९८ ॥ आगच्छंतो कुमरो पत्तो वियडाडईए एक्काए । हिंताल-ताल-ताली-तमाल-वडसालकलियाए ॥ ८१९९ ॥ जा उत्तमसोहंजणविसालदक्खा मणोहरपवाला । पाडल-अहरा-पव्वय-पओहरा सहइ रमणि व्व ॥ ८२०० ॥ विलसंतसरलचित्ता गुरुहयमारा व साहुसेणि व्व । भव्वावलि व्व संजायपत्तहोही असोया जा || ८२०१ ॥ मज्झम्मि तीए वणसंडवेढियं गयणलग्गगुरुसिहरं । सप्पायारं पि भयावहारयं नियइ जिणभवणं ॥ ८२०२ ॥ रेहतरूवदारं नरिंदमिव पत्तमूलरेहं जं । संपूरियसुयणासं लसिरामलसालसहियं च ॥ ८२०३ ॥ सव्वत्तो अनिलचला तमाल-कंकेल्लिसाहिणो जस्स । जिणरायभयुब्भंता रागद्दोस व्व कंपंति ॥ ८२०४ ॥
Jain Education International
For Private & Personal Use Only
www.jainelibrary.org
