________________
६३७
धूवसुंदरनिवकहा वावल्ल-सेल्ल-भल्लय-भल्ली-नाराय-भरपहारेहिं । भिज्जता गुरुगयघडभडतुरया जंति जमगेहं ॥ ८१७९ ॥ अन्नोन्नं दंतेहिं तोडंति सिराई मुक्कहक्काई । निप्पसरअसिप्पहरे वियरंति य वग्गिरघडाइं ॥ ८१८० ॥ नवरंगमेहडंबरसियछत्तेहिं मही जहिं सहइ । रत्तुप्पलइंदीवरपुंडरियकयोवहार व्व ॥ ८१८१ ॥ खग्गाहयगयकुंभग्गनिग्गयाओ पडंतमुत्ताओ । रेहति खग्गपाणीय गहिरगुरुबिंदुणो व जहिं ॥ ८१८२ ॥ असिघायुच्छलियठियं गयस्स जस्स तिगे मुहं करिणो । सो सहइ तेण दुकरो व सचउकुंभो व्व दुमुहो व्व ॥ ८१८३ ॥ एयारिसे रउद्दे रणम्मि रणवीररायकुमरेहिं । पारद्धं पहरेउं परोप्परं करडिचडिएहिं ॥ ८१८४ ॥ लल्लक्कमुक्कहक्का छलप्पहारेहिं दो वि पहरंति । भिंदंति य अन्नोन्नं दंतप्पहरेहिं करिणो वि ॥ ८१८५ ॥ रिउकरिणा कुमरकरी निवाडिओ दसणपहरजज्जरिओ । पडिओ कुमरो गहिओ य वेरिकरिणा करग्गेण ॥ ८१८६ ॥ उच्छालिओ य गयणे निवडते निवसुए रिउनिवेण । धरिओ खग्गो उड्ढे जह भिज्जइ निवडिरो कुमरो ॥ ८१८७ ॥ निवडतेणं तेणं रिउखग्गं वंचिउं तओ झ त्ति । पयघाएणं पट्ठीए पहणिउं पाडिओ वेरी ॥ ८१८८ ॥ पडिओ सो करिपुरओ कोवमयंधेण तयणु तेणावि । दिन्नो पाओ सीसे दलियकवालो मओ राया ॥ ८१८९ ॥ दटुं वेरिविणासं असुरामरखेयरेहिं परिमुक्का । कुमरसिरम्मि निवडिया अलिउलमुहला कुसुमवुट्ठी ॥ ८१९० ॥ अहियम्मि हए गहिया कुमरेणमनग्घसिरी सयला । “को वा कुणइ पमायं लाहे अच्चब्भुयत्थस्स ?” ॥ ८१९१ ॥
Jain Education International
For Private & Personal Use Only
www.jainelibrary.org
